iNCOVACC Covid Nasal Vaccine Price : દેશમાં કોરોના વાયરસે ફરી એન્ટ્રી કરી છે, અનેક રાજ્યોમાં રોજબરોજ કેસ નોંધાઈ રહ્યા છે. સોમવારે ચાર હજારથી વધુ કેસો નોંધાયા છે, જેમાં સૌથી વધુ કેરળમાં 1500 કેસ આવ્યા છે. આ ઉપરાંત મહારાષ્ટ્ર અને દિલ્હીમાં જેવા રાજ્યોમાં 500ની આસપાસ કેસ પહોંચી ગયા છે. આવી સ્થિતિમાં કોરોના વેક્સિન અને તેની કિંમતને લઈને ફરી લોકોમાં નવી ચર્ચાઓ શરુ થઈ ગઈ છે. તો જાણીએ દેશમાં અત્યાર સુધીમાં કઈ કઈ વેક્સિનને મંજૂરી અપાઈ છે.
કોવિશિલ્ડ, કોવેક્સિન, સ્પુતનિક V, મોર્ડના બાદ નેઝલ વેક્સિનને મંજૂરી
કોરોના વખતે દેશના મોટાભાગના લોકોને સીરમ ઇન્સ્ટીટ્યૂટ ઑફ ઇન્ડિયાની કોવિશિલ્ડ અને ભારત બાયોટેકની કોવેક્સિન અપાઈ હતી. આ ઉપરાંત ઈમરજન્સી ઉપયોગ માટે રશિયાની સ્પુતનિક વી અને મોર્ડના વેક્સિનને પણ મંજૂરી અપાઈ હતી. જોકે કોરોનાના કેસ ઘટ્યા બાદ વધુ એક નેઝલ વેક્સિન બનાવાઈ હતી. ભારત બાયોટેકે આ નેઝલ વેક્સિનને ‘iNCOVACC’નામ આપ્યું છે, જોકે તે પહેલા આ વેક્સિનનું નામ BBV154 હતું.
સરકારે 2022માં નેઝલ વેક્સિનને મંજૂરી આપી હતી
કેન્દ્ર સરકારે 23 ડિસેમ્બર-2022ના રોજ ભારત બાયોટેકની નેઝલ વેક્સિનને મંજૂરી આપી હતી, જેનો ઉપયોગ બૂસ્ટર ડોઝ તરીકે કરાયો હતો. તેનો ઉપયોગ શરુઆતમાં ખાનગી હૉસ્પિટલમાં કરાયો હતો ત્યારબાદ તેને સરકારી વેક્સિન પ્રોગ્રામમાં સામેલ કરાઈ હતી. આ માટે સરકાર દ્વારા ફન્ડિંગ કરવામાં આવ્યું છે. ભારતના ડ્રગ કંટ્રોલ જનરલ DCGIએ ઈમરજન્સી ઉપયોગ માટે ભારતની બાયોટેકની ઈન્ટ્રાનેઝલ કોવિડ વેક્સિનને મંજૂરી આપી હતી, જોકે ત્યારબાદ અન્ય કોઈ નેઝલ વેક્સિન તૈયાર કરાઈ નથી અને માત્ર ભારત બાયોટેકની નેઝલ વેક્સિન જ માર્કેટમાં ઉપલબ્ધ છે.
iNCOVACC વેક્સિનની કિંમત
કોવિન એપ પર iNCOVACC વેક્સિન ઉપલબ્ધ છે, જેની માર્કેટમાં કિંમત 800 રૂપિયા છે, જ્યારે ભારત સરકાર અને અન્ય રાજ્યોને સપ્લાય કરવા માટે 325 રૂપિયા કિંમત રખાઈ છે. ઈન્ટ્રાનેઝલ કોવિડ વેક્સિનને 2થી 8 ડિગ્રી સેલ્સિયસ તાપમાનમાં સ્ટોરેજ અને ડિસ્ટ્રીબ્યુશન માટે રાખી શકાય છે. તેને સરળતાથી એક જગ્યાએથી બીજી જગ્યાએ લઈ જઈ શકાય છે. ભારત બાયોટેક અને વોશિંગ્ટન યુનિવર્સિટીની ભાગીદારી હેઠળ આ વેક્સિન બનાવાઈ છે.
આ પણ વાંચો : 8-8 લાખના ઈનામી રીતા અને રાહુલ સહિત 16 નક્સલીનું આત્મસમર્પણ
નાકથી અપાતી વેક્સિનથી અનેક ફાયદા
આ વેક્સિન નાક દ્વારા સ્પ્રે કરીને આપવામાં આવે છે, એટલે કે તેમાં ઈન્જેક્શનની જરૂર નથી. એમ્સના પૂર્વ ડાયરેક્ટર ડૉ. રણદીપ ગુલેરિયાએ કહ્યું હતું કે, નેઝલ વેક્સિન શ્રેષ્ઠ છે, કારણ કે તેને સરળતાથી લઈ શકાય છે તેમજ મ્યુકોસામાં જ ઇમ્યુનિટી બનાવી દે છે, જેના કારણે સંક્રમણની શરુઆતથી જ બચી શકાય છે. આવી સ્થિતિમાં વર્તમાન કોરોના લહેરમાં આ વેક્સિન અસરકારક સાબિત થઈ શકે છે.
વેક્સિનના તમામ ટેસ્ટિંગ સફળ
iNCOVACC વેક્સિનના અત્યાર સુધીમાં ત્રણ વખત ટેસ્ટિંગ કરવામાં આવ્યા છે અને ત્રણેયમાં સફળતા મળી છે. કંપનીએ પ્રથમ તબક્કામાં 175 લોકો, બીજા તબક્કામાં 200 લોકોને સામેલ કર્યા હતા. જ્યારે ત્રીજા તબક્કામાં બે પ્રકારના પરિક્ષણ કરવાયા હતા, જેમાં પ્રથમ પરિક્ષણમાં 3100 લોકોને સામેલ કરીને વેક્સિનના બે ડોઝ અપાયા હતા, જ્યારે બીજા પરિક્ષણમાં 875 લોકોને વેક્સિનનો બુસ્ટર ડોઝ અપાયો હતો. કંપનીએ દાવો કર્યો છે કે, ટ્રાયલમાં વેક્સિન કોરોના વિરુદ્ધ લડવામાં અસરકારક સાબિત થઈ છે.
