હવામાન વિભાગની મૂશળધાર વરસાદની આગાહી, ગુજરાત-મહારાષ્ટ્ર સહિત દેશના અનેક રાજ્યોમાં એલર્ટ
Updated: Aug 17th, 2025
GS TEAM
IMD Heavy Rain Alert : હવામાન વિભાગે દેશના ઘણા રાજ્યોમાં આગામી કેટલાક દિવસો સુધી ભારેથી અતિભારે વરસાદની આગાહી કરી છે. 18 ઓગસ્ટની આસપાસ ઉત્તર-પશ્ચિમ બંગાળની ખાડીમાં નવું હળવું દબાણનું ક્ષેત્ર બનવાની સંભાવના છે, જેના કારણે પૂર્વ અને મધ્ય ભારતમાં વરસાદનું જોર વધશે. આ સમયગાળા દરમિયાન, ભારે પવન અને ગાજવીજ સાથે ભારે વરસાદ પડશે, જેના કારણે પૂર અને ભૂસ્ખલનનું જોખમ વધશે. ખાસ કરીને પશ્ચિમ ભારતના કોંકણ, ગોવા, મહારાષ્ટ્ર અને ગુજરાતમાં વરસાદનો કહેર જોવા મળશે. આ ઉપરાંત, દક્ષિણ ભારત, પૂર્વ, મધ્ય, ઉત્તર-પશ્ચિમ અને ઉત્તરપૂર્વ ભારતના ઘણા ભાગોમાં ભારેથી અતિ ભારે વરસાદની પણ આગાહી છે. ચાલો જાણીએ કે કયા રાજ્યોમાં ક્યારે અને કેવું હવામાન રહેશે.
ગુજરાત અને મહારાષ્ટ્રમાં ભારે વરસાદની શક્યતા
18 અને 19 ઓગસ્ટના રોજ કોંકણ (મુંબઈ સહિત) અને ગોવા તેમજ મધ્ય મહારાષ્ટ્રના પહાડી વિસ્તારોમાં ભારે વરસાદ પડી શકે છે. 18 થી 20 ઓગસ્ટ દરમિયાન ગુજરાતમાં અને 19 અને 20 ઓગસ્ટના રોજ સૌરાષ્ટ્રમાં પણ અતિભારે વરસાદની શક્યતા છે. આગામી 7 દિવસોમાં મધ્ય મહારાષ્ટ્ર, કોંકણ અને ગોવાના ઘણા વિસ્તારોમાં ભારેથી અતિભારે વરસાદની ચેતવણી આપવામાં આવી છે.
દક્ષિણ અને મધ્ય ભારતમાં વરસાદ
દક્ષિણ ભારતની વાત કરીએ તો, આગામી 4-5 દિવસ સુધી દક્ષિણ ભારતમાં ભારેથી અતિભારે વરસાદ ચાલુ રહેશે. 18 અને 19 ઓગસ્ટના રોજ દરિયાકાંઠાના કર્ણાટકમાં અને 18 થી 20 ઓગસ્ટ દરમિયાન કેરળમાં પણ ભારે વરસાદની સંભાવના છે.
મધ્ય અને પૂર્વ ભારતની વાત કરીએ તો, 18 ઓગસ્ટના રોજ પશ્ચિમ મધ્ય પ્રદેશમાં અતિભારે વરસાદની આગાહી છે. આગામી 7 દિવસમાં મધ્ય પ્રદેશ અને છત્તીસગઢના ઘણા વિસ્તારોમાં પણ ભારે વરસાદ પડશે. બિહારમાં 20 થી 22 ઓગસ્ટ અને ઝારખંડમાં 19, 21 અને 22 ઓગસ્ટના રોજ ભારે વરસાદની શક્યતા છે.
ઉત્તર ભારતમાં પણ વરસાદની આગાહી
હવામાન વિભાગના જણાવ્યા અનુસાર, આગામી 7 દિવસમાં પૂર્વ રાજસ્થાન અને ઉત્તરાખંડના કેટલાક ભાગોમાં ભારે વરસાદની સંભાવના છે. આ ઉપરાંત, હિમાચલ પ્રદેશમાં 18 થી 20 ઓગસ્ટ સુધી, જમ્મુ-કાશ્મીરમાં 18 અને 19 ઓગસ્ટ સુધી અને પંજાબમાં 19 ઓગસ્ટના રોજ ભારે વરસાદની આગાહી કરવામાં આવી છે.
આ પણ વાંચો : 'અમે ખોટા કાયદાઓને વીણી-વીણીને ખતમ કરીશું', દિલ્હીની જનસભામાં બોલ્યા વડાપ્રધાન મોદી
