'વાળ ખેંચ્યા, પ્રાઈવેટ પાર્ટ અને પેટમાં માર્યું....', NSUI સ્ટુડન્ટ્સના દિલ્હી પોલીસ સામે ગંભીર આક્ષેપ

NSUI Students Police Torture Allegations : દિલ્હીમાં ચૂંટણી પંચ અને મુખ્ય ચૂંટણી કમિશનર જ્ઞાનેશ કુમાર સામે વિરોધ પ્રદર્શન બાદ NSUIની વિદ્યાર્થિનીઓએ પોલીસ પર મારપીટ અને હેરાનગતિના ગંભીર આક્ષેપ કર્યા છે. કોંગ્રેસના નેતા રાહુલ ગાંધી સાથે યોજાયેલી પત્રકાર પરિષદમાં વિદ્યાર્થિનીઓએ દાવો કર્યો કે અટકાયત દરમિયાન તેમના વાળ ખેંચવામાં આવ્યા, પેટના નીચેના ભાગમાં લાત મારવામાં આવી અને ગળું દબાવવામાં આવ્યું હતું. એક વિદ્યાર્થિનીએ પ્રાઇવેટ પાર્ટ પર હુમલો કરાયાનો પણ આક્ષેપ કર્યો હતો. જોકે, આ આક્ષેપો અંગે દિલ્હી પોલીસનો પક્ષ સામે આવ્યો નથી.

ઋતુ બરારાએ મારપીટના આક્ષેપ કર્યા

વિરોધ પ્રદર્શનમાં સામેલ ઋતુ બરારાએ આક્ષેપ કર્યો કે પોલીસકર્મીઓએ તેમના પેટના નીચેના ભાગમાં લાત મારી હતી અને તેમને બસમાંથી ખેંચીને લઈ જવામાં આવ્યાં હતાં. તેમણે એક મહિલા પોલીસકર્મીએ ગળું દબાવ્યું હોવાનો પણ દાવો કર્યો હતો. ઋતુએ કોન્સ્ટેબલ ચંચલ પર મારપીટ કરવાનો આક્ષેપ પણ કર્યો હતો. તેમના જણાવ્યા પ્રમાણે, પોલીસકર્મીઓ તેમને કહેતા હતા કે તેમના કારણે તેઓ ઊંઘી શકતા નથી.

કનોટ પ્લેસ પોલીસ સ્ટેશનમાં મારપીટનો દાવો

અન્ય એક વિદ્યાર્થિનીએ દાવો કર્યો કે અટકાયત બાદ તેને કનોટ પ્લેસ પોલીસ સ્ટેશન લઈ જવામાં આવી હતી. ત્યાં રૂમ નંબર 107માં સાદા કપડાંમાં હાજર મહિલા અધિકારીઓએ તેની સાથે મારપીટ કરી હોવાનો આક્ષેપ તેણે કર્યો હતો. વિદ્યાર્થિનીના જણાવ્યા પ્રમાણે, તેના પગ પર ઈજાનાં નિશાન પડ્યાં હતાં અને પગ વાદળી થઈ ગયા હતા. એક મહિલા કોન્સ્ટેબલે તેને ખેંચીને પોલીસ સ્ટેશન લઈ ગઈ હોવાનો પણ તેણે દાવો કર્યો હતો. અન્ય એક વિદ્યાર્થિનીએ જણાવ્યું કે અટકાયત દરમિયાન થયેલી ધક્કામુક્કીમાં તેની કાનની બુટ્ટી કાનમાં ફસાઈ ગઈ હતી. બાદમાં તબીબોએ તેને બહાર કાઢવી પડી હતી. વિદ્યાર્થિનીઓએ પોલીસ પર તેમના મોબાઇલ ફોન લઈ લેવાનો પણ આક્ષેપ કર્યો છે.

રાહુલ ગાંધીએ પુરાવા સાચવી રાખવા કહ્યું

વિદ્યાર્થિનીઓની રજૂઆત સાંભળ્યા બાદ રાહુલ ગાંધીએ તેમને પોતાની સાથે બનેલી ઘટનાના પુરાવા સાચવી રાખવા અને વીડિયો નોંધવા જણાવ્યું હતું. તેમણે કહ્યું કે વિદ્યાર્થીઓએ વીડિયો અને અન્ય પુરાવા તેમની પાસે મોકલવા જોઈએ, જેથી યોગ્ય સમયે તેનો ઉપયોગ કરીને જવાબદારી નક્કી કરી શકાય. ચૂંટણી પંચ અને મુખ્ય ચૂંટણી કમિશનર સામેના વિરોધ બાદ સામે આવેલા આ આક્ષેપોએ અટકાયત દરમિયાન મહિલા પ્રદર્શનકારીઓ સાથે થયેલા વર્તન અંગે સવાલો ઉઠાવ્યા છે. જોકે, વિદ્યાર્થિનીઓના આક્ષેપોની સ્વતંત્ર પુષ્ટિ થઈ નથી અને આ મામલે દિલ્હી પોલીસનો સત્તાવાર પક્ષ સામે આવ્યા બાદ જ સમગ્ર ઘટનાની વધુ સ્પષ્ટતા થઈ શકશે.