ઇન્દિરા ગાંધી ઇન્ટરનેશનલ ઍરપૉર્ટથી લઈને દિલ્હીના માર્ગો સુધી પાણી જ પાણી, BRICSના મહેમાનો સામે નીચાજોણું થાય તેવા દૃશ્યો

Delhi Rain: રાજધાની દિલ્હીમાં 12-13 સપ્ટેમ્બરે આયોજિત થનારી BRICS સમિટના બરાબર આઠ દિવસ પહેલાં શુક્રવારે બપોરે પડેલા મુશળધાર વરસાદે નાગરિક સંસ્થાઓ અને દિલ્હી ઇન્ટરનેશનલ ઍરપૉર્ટ લિમિટેડ(DIAL)ના દાવાઓની હવા કાઢી નાખી હતી. આ મુશળધાર વરસાદના કારણે દિલ્હી પાણી-પાણી થઈ ગઈ છે. જ્યારે બીજી તરફ દિલ્હીમાં એક અઠવાડિયા પછી BRICS સમિટ યોજાવા જઈ રહી છે. ત્યારે આ સમિટ પહેલા વરસાદના કારણે સર્જાયેલા દૃશ્યોએ સરકારના વિકાસના દાવાઓની પોલ ખોલ નાખી છે.

ઇન્દિરા ગાંધી ઇન્ટરનેશનલ ઍરપૉર્ટના ટર્મિનલ 2અને 3ની બહાર ઘૂંટણસમા ભરાયેલા પાણી વચ્ચે મુસાફરો પોતાના પેન્ટ વાળીને અને ટ્રોલી બેગ ખેંચીને નીકળતા જોવા મળ્યા હતા. બીજી તરફ ખરાબ હવામાનના કારણે ઉડ્ડયન સેવાઓ ગંભીર રીતે પ્રભાવિત થઈ હતી.

ફ્લાઇટ ડાયવર્ઝન અને ફ્લાઇટ્સમાં વિલંબ

ખરાબ હવામાન અને 76 કિમી પ્રતિ કલાકની ઝડપે ફેંકાયેલા તેજ પવનોને કારણે ઍરપૉર્ટ પર કામગીરી ઠપ થઈ ગઈ છે.

11 ફ્લાઇટ્સ ડાયવર્ટ: બપોરે 3:30થી સાંજે 7:00 વાગ્યા વચ્ચે 11 ફ્લાઇટ્સને અન્ય શહેરોમાં ડાયવર્ટ કરવામાં આવી હતી. આમાંથી 5 ફ્લાઇટ જયપુર, 4 લખનઉ અને 1-1 ફ્લાઇટ અમદાવાદ અને ચંદીગઢ મોકલવામાં આવી હતી.

400થી વધુ ફ્લાઇટ્સમાં વિલંબ: ફ્લાઇટ-ટ્રેકિંગ ડેટા પ્રમાણે દિલ્હી ઍરપૉર્ટથી આવતી-જતી 400થી વધુ ફ્લાઇટ્સ મોડી પડી હતી.

સફાઈનો દાવો: DIALના જણાવ્યા પ્રમાણે ભારે વરસાદને કારણે થોડા સમય માટે જળભરાવ થયો હતો, જેને બાદમાં પંપોની મદદથી દૂર કરવામાં આવ્યો હતો.

દિલ્હીમાં વરસાદનો રૅકોર્ડ

હવામાન વિભાગ(IMD)ના જણાવ્યા પ્રમાણે શુક્રવારે સૌથી વધુ વરસાદ ઍરપૉર્ટ પાસે આવેલા પાલમ કેન્દ્ર પર નોંધાયો હતો:

કનૉટ પ્લેસથી લઈને મહિપાલપુર સુધી જળભરાવ

જન્માષ્ટમીની રજા હોવાને કારણે રસ્તાઓ પર વાહનોની સંખ્યા ઓછી હતી, જેથી ટ્રાફિક જામમાંથી થોડી રાહત મળી હતી. જોકે, લુટિયન્સ દિલ્હી અને આસપાસના વિસ્તારોની હાલત ખરાબ રહી હતી.

મહિપાલપુરમાં બાળકો ભરાયેલા પાણીમાં તરતા જોવા મળ્યા હતા, જ્યારે કનૉટ પ્લેસ(CP)ના રસ્તાઓ પર વાહનો ડૂબતા નજરે પડ્યા હતા. સુબ્રતો પાર્ક પાસે ફ્લાયઓવર પરથી પાણી ઝરણાની જેમ વાહનો પર પડતું જોવા મળ્યું હતું.

માલવીય નગર મેટ્રો સ્ટેશન પાસે અને અક્ષરધામથી આઇટીઓ તરફ જતાં લૂપ રોડ પર વૃક્ષો ધરાશાયી થવાથી ટ્રાફિક ખોરવાયો હતો.

દિલ્હી-ગુરુગ્રામ બોર્ડર(શિવ મૂર્તિ પાસે) જળભરાવ બાદ ગુરુગ્રામ પોલીસે વાહનચાલકો માટે રૂટ ડાયવર્ઝન ઍડવાઇઝરી જાહેર કરી હતી.

હવામાનનો મિજાજ અને આગામી અંદાજ

સ્કાયમેટ વેધર(Skymet)ના ઉપાધ્યક્ષ મહેશ પલાવતના જણાવ્યા પ્રમાણે દક્ષિણ-પશ્ચિમ ઉત્તર પ્રદેશ પર લો પ્રેશર એરિયા બનવા અને મોનસૂન ટ્રફ દિલ્હી-હરિયાણા પરથી પસાર થવાને કારણે આ મુશળધાર વરસાદ પડ્યો છે.

IMDએ શનિવાર માટે 'યલો ઍલર્ટ' જાહેર કર્યું છે, જેમાં હળવાથી મધ્યમ વરસાદ અને ગાજવીજ સાથે વરસાદ પડવાની શક્યતા વ્યક્ત કરવામાં આવી છે. રવિવારથી શુષ્ક પશ્ચિમી પવનોની અસરથી વરસાદી પ્રવૃત્તિઓમાં ઘટાડો થવાની અપેક્ષા છે.

ક્યારથી ક્યાં સુધી યોજાશે BRICS સમિટ?

દિલ્હીમાં 12–13 સપ્ટેમ્બર 2026ના રોજ 18મી બ્રિક્સ શિખર સંમેલન યોજાવાનું છે, જેની અધ્યક્ષતા ભારત કરી રહ્યું છે. આ સમિટ ભારત મંડપમ, પ્રગતિ મેદાન ખાતે યોજાશે. 11 સપ્ટેમ્બરે BRICS બિઝનેસ ફોરમ અને 12-13 સપ્ટેમ્બરે લીડર્સ સમિટ યોજાશે.

બ્રિક્સ સમિટનું ફોકસ વૈશ્વિક દક્ષિણ(ગ્લોબલ સાઉથ)ની પ્રાથમિકતાઓ, ક્લાઇમેટ એક્શન, ડિજિટલ સહયોગ, ઇનોવેશન, સસ્ટેનેબિલિટી અને આર્થિક વિકાસ જેવા મુદ્દાઓ પર રહેશે.

11 સભ્ય દેશોના નેતાઓ કે પ્રતિનિધિઓ - બ્રાઝિલ, રશિયા, ભારત, ચીન, દક્ષિણ આફ્રિકા, ઈજિપ્ત, ઈથોપિયા, ઈન્ડોનેશિયા, ઈરાન, સાઉદી અરેબિયા, યુએઈ સાથે સાથે પાર્ટનર/આઉટરીચ દેશોના નેતાઓ અને આંતરરાષ્ટ્રીય સંગઠનોના પ્રતિનિધિઓ પણ તેમાં ભાગ લેશે.

BRICS માટે દિલ્હીની કેવી છે તૈયારી?

11 સપ્ટેમ્બરે કેન્દ્ર અને દિલ્હી સરકારની કચેરીઓ, સ્વાયત્ત સંસ્થાઓ અને પબ્લિક સેક્ટર અંડરટેકિંગ્સ (PSUs) બંધ રહેશે. શાળા અને કૉલેજો અંગેના આદેશો અલગ-અલગ હોઈ શકે છે.

VVIP અવરજવર માટે ટ્રાફિક ડાયવર્ઝન, મોટરકેડ રિહર્સલ અને ચુસ્ત સુરક્ષા બંદોબસ્ત ગોઠવવામાં આવ્યો છે. વિદેશી ડેલિગેશન 10 સપ્ટેમ્બરથી દિલ્હી પહોંચવાનું શરૂ કરશે.

NDMCએ 5-14 સપ્ટેમ્બર સુધી 24x7 ઈન્ટિગ્રેટેડ કમાન્ડ ઍન્ડ કન્ટ્રોલ સેન્ટર(ICCC) પાલિકા કેન્દ્ર ખાતે શરૂ કર્યું છે, જે ફરિયાદો, નાગરિક સુવિધાઓ અને ગ્રાઉન્ડ ઈશ્યૂઝનું મોનિટરિંગ કરશે.