SIR મુદ્દે વિવાદ વધ્યો, CEC જ્ઞાનેશ કુમારના 14 ઓર્ડર રદ કરવા બોમ્બે હાઈકોર્ટમાં કરાઈ માગ

Bombay High Court SIR Petition: મહારાષ્ટ્રમાં ચૂંટણી પંચની સ્પેશિયલ ઈન્ટેન્સિવ રિવિઝન (SIR) પ્રક્રિયા હવે કાનૂની વિવાદમાં સપડાઈ છે. આ મામલે બોમ્બે હાઈકોર્ટ અને તેની કોલ્હાપુર સર્કિટ બેન્ચમાં બે અલગ-અલગ અરજીઓ દાખલ કરવામાં આવી છે. અરજીઓમાં મતદાર યાદીમાંથી મનસ્વી રીતે નામ હટાવવા, પ્રક્રિયામાં ગડબડ અને ચૂંટણી પંચની અંદર આંતરિક મતભેદો જેવા ગંભીર આરોપો લગાવવામાં આવ્યા છે.

કોલ્હાપુર બેન્ચ સમક્ષ પહેલી અરજી

કોલ્હાપુર બેન્ચમાં દાખલ કરવામાં આવેલી પહેલી અરજી ત્રણ સ્થાનિક રહેવાસીઓએ વકીલ અસીમ સરોદેની ટીમ મારફતે દાખલ કરી છે. તેમાં ચીફ ઈલેક્શન કમિશનર જ્ઞાનેશ કુમારના 14 વહીવટી આદેશો રદ કરવાની માંગ કરવામાં આવી છે. અરજીમાં એવું પણ કહેવામાં આવ્યું છે કે, ઈલેક્શન કમિશનર સુખબીર સિંહ સંધૂ અને વિવેક જોશીએ 14 વખત મતદારોના નામ હટાવવા, ડેટાબેઝ એક્સેસ, સોફ્ટવેરમાં વિક્ષેપ અને ફોર્મ 6 માં જુલાઈ મહિનામાં થયેલા ફેરફારો પર વાંધો ઉઠાવ્યો હતો. અરજીમાં તેને સીઈસી એન્ડ અધર ઈસીએસ એક્ટ, 2023 (CEC and Other ECs Act, 2023) ની કલમ 18 નું ઉલ્લંઘન ગણાવવામાં આવ્યું છે.

મુંબઈની પ્રિન્સિપલ બેન્ચમાં અરજી

બીજી અરજી મુંબઈની પ્રિન્સિપલ બેન્ચમાં વંચિત બહુજન આઘાડી (VBA) ના યુવા અધ્યક્ષ સાગર રમેશ ગાયકવાડ અને એક અન્ય રહેવાસીએ દાખલ કરી છે. તેને વકીલ હેમંત ઘડીગાંવકર, સંદેશ મોરે અને હિતેન્દ્ર ગાંધી રજૂ કરી રહ્યા છે. આ અરજી સુપ્રીમ કોર્ટના ADR ચુકાદાનો સંદર્ભ આપતા દાવો કરે છે કે, બૂથ લેવલ અધિકારીઓ ઘરે-ઘરે જઈને ઓળખપત્ર માગી રહ્યા છે, જે ચૂંટણી પંચના નિયમોની વિરુદ્ધ છે. સાથે જ જે મતદારો ઘરે ન મળ્યા, તેમને કોઈપણ સુનાવણી કે લેખિત આદેશ વિના ગેરહાજર, સ્થળાંતરિત, મૃત્યુ પામેલા અથવા ડુપ્લિકેટ શ્રેણીમાં મૂકી દેવામાં આવ્યા.

અરજદારોની કોર્ટ સમક્ષ અરજીમાં માગ

અરજદારોએ સ્પષ્ટ કર્યું છે કે, તેઓ ચૂંટણી રોકવા માગતા નથી, પરંતુ માત્ર કાયદાનું સાચું પાલન કરવા ઈચ્છે છે. બંને અરજીઓમાં હટાવવામાં આવેલા મતદારોના નામ ફરીથી જોડવા, મહારાષ્ટ્રમાં SIR પ્રક્રિયા પર સ્ટે લાવવા અને મામલાની તપાસ માટે રિટાયર્ડ હાઈકોર્ટ જજની અધ્યક્ષતામાં એક સ્વતંત્ર સમિતિ બનાવવાની માંગ કરવામાં આવી છે. બંને અરજીઓ પર આગામી અઠવાડિયે તાત્કાલિક સુનાવણી થવાની શક્યતા છે.