CJP આંદોલન પહેલા યુપી-બંગાળમાં અનેકની અટકાયતનો દાવો, પાર્ટીએ કહ્યું- કેટલાને પકડશો? અમે અઢી કરોડ છીએ...

મુખ્ય ચૂંટણી કમિશનર જ્ઞાનેશ કુમાર સામે દિલ્હીના જંતર-મંતર પર આગામી 10 ઓક્ટોબરે યોજાનાર વિરોધ પ્રદર્શન પહેલાં રાજકારણ ગરમાયું છે. કોકરોચ જનતા પાર્ટી (CJP) દ્વારા દાવો કરવામાં આવ્યો છે કે ઉત્તર પ્રદેશ, મહારાષ્ટ્ર અને પશ્ચિમ બંગાળ જેવા રાજ્યોમાં તેમના હજારો સ્વયંસેવકો અને કાર્યકર્તાઓને પોલીસ દ્વારા કસ્ટડીમાં લેવામાં આવી રહ્યા છે. CJPના સહ-સંયોજક આશુતોષ રાંકાએ પોલીસ કાર્યવાહી સામે આક્રમક વલણ અપનાવતા જણાવ્યું હતું કે પોલીસ કેટલા લોકોને અરેસ્ટ કરશે, કારણ કે દેશમાં 2.5 કરોડ કોકરોચ છે.

અબ્દુલની ટીમને સાદા કપડામાં આવેલા લોકો ઉઠાવી ગયા

દિલ્હીમાં યોજાનારા આ પ્રદર્શન અગાઉ ગુરુવારે બેંગલુરુમાં પણ એક વિરોધ કાર્યક્રમનું આયોજન કરવામાં આવ્યું હતું. આશુતોષ રાંકાએ સોશિયલ મીડિયા પર વીડિયો શેર કરીને દાવો કર્યો છે કે મહારાષ્ટ્ર, યુપી અને બંગાળમાં જે વોલન્ટિયર્સ 10 ઓક્ટોબરના પ્રોટેસ્ટમાં જોડાવાની તૈયારી કરી રહ્યા હતા, તેમની અટકાયત કરવામાં આવી છે. તેમણે કોલકાતાની એક ઘટનાનો ઉલ્લેખ કરતા દાવો કર્યો કે અબ્દુલ અને તેની ટીમને સાદા કપડામાં આવેલા લોકોએ ઉઠાવી લીધા છે અને અજ્ઞાત સ્થળે લઈ ગયા છે.

કેટલા લોકોને કસ્ટડીમાં લેશો અઢી કરોડ કોકરોચ છે

સીજેપી નેતાએ વ્યંગ કરતા કહ્યું કે આ રાજ્યો હવે સંપૂર્ણપણે અપરાધ મુક્ત થઈ ગયા હોય તેમ પોલીસ શાંતિપૂર્ણ પ્રદર્શન કરનારાઓને પકડવામાં વ્યસ્ત છે. આંદોલન સાથે જોડાયેલા અન્ય નેતા સૌરભ દાસે પણ અગાઉ આશંકા વ્યક્ત કરી હતી કે 10 ઓક્ટોબર પહેલા પોલીસ તેમને અને અન્ય નેતાઓને કસ્ટડીમાં લઈ શકે છે. સૌરભ દાસે સ્પષ્ટ કર્યું છે કે ચૂંટણી કમિશનરના રાજીનામાની આ લડાઈ લાંબી ચાલી શકે છે અને આપણામાંથી ભલે ગમે તેટલા લોકોને કસ્ટડીમાં લેવામાં આવે, પરંતુ જો મતદાન કરવાનો અધિકાર સુરક્ષિત રાખવો હશે તો આ ભ્રષ્ટ સિસ્ટમ સામેની લડાઈ ચાલુ જ રાખવી પડશે. પોલીસ પણ કેટલા લોકોને કસ્ટડીમાં લેશે આ દેશમાં અઢી કરોડ કોકરોચ છે.