નવા લેબર કોડમાં બોનસ અંગે મોટી જાહેરાત, 21 હજાર સુધી પગાર હશે તો શરતોને આધીન ફરજિયાત બોનસ મળશે

Labor Ministry Bonus Rules: કેન્દ્ર સરકારના શ્રમ અને રોજગાર મંત્રાલય તરફથી બે નવા નોટિફિકેશન બહાર પાડવામાં આવ્યા છે. આ નોટિફિકેશનમાં સૌથી ખાસ વાત એ છે કે હવે દર મહિને 21 હજાર રૂપિયા સુધીનો પગાર મેળવતા તમામ કર્મચારીઓને અમુક શરતોને આધીન બોનસનો લાભ મળશે.નિયુક્તિ કરનારે આ બોનસ આપવું જ પડશે.

21 હજારથી વધુ પગાર ધરાવતા કર્મચારીઓ માટે નિયમ

બીજી તરફ, દર મહિને 21000 રૂપિયાથી વધુ પગાર મેળવતા કર્મચારીઓ માટે આ બોનસ ફરજિયાત નથી. તેનો અર્થ એ છે કે કંપની 21 હજારથી વધુ પગાર ધરાવતા લોકોને બોનસ આપવા માટે બંધાયેલી રહેશે નહીં. માત્ર 21,000 રૂપિયા સુધીનો પગાર ધરાવતા લોકો જ આ બોનસનો લાભ લઈ શકે છે.

બોનસ મેળવવા માટેની પાત્રતા અને શરતો

નવા પગાર પંચના નોટિફિકેશનમાં કહેવામાં આવ્યું છે કે વેતન સંહિતા, 2019ની કલમ 26(1) અનુસાર, દર મહિને 21000 રૂપિયાથી ઓછો પગાર મેળવનાર કર્મચારી બોનસ મેળવી શકે છે, પરંતુ શરત એ છે કે વર્ષમાં ઓછામાં ઓછા 30 દિવસ કામ કરેલું હોવું જોઈએ.

બોનસ ગણતરીનો આધાર અને લઘુત્તમ વેતનનો નિયમ

કર્મચારીઓને બોનસ કેટલું અને કયા આધારે આપવામાં આવશે?
પાત્ર કર્મચારીઓને મળતું વાર્ષિક બોનસ ઓછામાં ઓછું પગારના 8.33 ટકા અને મહત્તમ 20 ટકા રહેશે. આ બોનસની ગણતરી- દર મહિને 7,000 રૂપિયા અથવા લાગુ પડતા લઘુત્તમ વેતનમાંથી, જે પણ વધુ હોય તેના આધારે કરવામાં આવશે. ધારી લો કે તમે દર મહિને 15,000 રૂપિયા કમાઓ છો, પરંતુ એવા રાજ્યમાં કામ કરો છો જ્યાં તમારા દ્વારા કરવામાં આવેલા કામ માટે લઘુત્તમ વેતન 10,000 રૂપિયા નક્કી કરવામાં આવ્યું છે. આવી સ્થિતિમાં નવા શ્રમ કાયદા હેઠળ બોનસની ગણતરી 10,000 રૂપિયા પર જ કરવામાં આવશે.

ઉદાહરણ સાથે વાર્ષિક બોનસની ગણતરી

હવે આગળ આ જ આધારે બોનસની ગણતરી કરવામાં આવે તો…
વાર્ષિક બોનસ - (લઘુત્તમ પગાર અથવા 7000 રૂપિયા) × 8.33% × 12 (એક વર્ષ) ફોર્મ્યુલા લાગુ થશે. હવે ઉદાહરણ દ્વારા સમજીએ કે કેટલું બોનસ બનશે.
ધારો કે કર્મચારીનો લઘુત્તમ પગાર 12,000 રૂપિયા છે એટલે કે આ 7000 રૂપિયાના બેઝ પ્રાઈસ કરતાં વધુ છે, તો હવે કર્મચારીનું વાર્ષિક બોનસ કંઈક આ મુજબ રહેશે…
12000 × 8.33% × 12 = 11,995 રૂપિયા

લઘુત્તમ બોનસ રકમનું તારણ

આનો અર્થ એ છે કે 12,000 રૂપિયા લઘુત્તમ પગાર ધરાવતા કર્મચારીઓનું વાર્ષિક બોનસ ઓછામાં ઓછું 11,995 રૂપિયા રહેશે.

બોનસ ચુકવણી માટેની સમયસીમા અને નિયમો

'કોડ ઓન વેજીસ, 2019' ની કલમ 39 (1) અનુસાર, કર્મચારીને બોનસ તરીકે આપવામાં આવેલી તમામ રકમની ચુકવણી એકાઉન્ટિંગ વર્ષ પૂરું થયાના આઠ મહિનાની અંદર કર્મચારીના બેંક ખાતામાં જમા કરીને કરી દેવી જોઈએ. જો એમ્પ્લોયર સમય લંબાવવા માટે પૂરતું કારણ દર્શાવીને અરજી કરે છે, તો આ સમયગાળો બે વર્ષ સુધી લંબાવી શકાય છે. 'પેમેન્ટ ઓફ બોનસ એક્ટ, 1965' ની કલમ 19 માં પણ એકાઉન્ટિંગ વર્ષ પૂરું થયા પછી 8 મહિનાની સમયસીમા નક્કી કરવામાં આવી હતી.