હોર્મુઝમાં ફરી વેપારી જહાજ પર પ્રોજેક્ટાઇલથી હુમલો, 11 ભારતીયો ઈજાગ્રસ્ત, ભારતે કરી નિંદા

Attack On Commercial Ship Near Oman Coast : ઓમાનના દરિયાકાંઠા નજીક મંગળવારે પનામાનો ધ્વજ ધરાવતા કોમર્શિયલ જહાજ 'MT On Peace' પર પ્રોજેક્ટાઇલ વડે હુમલો કરવામાં આવ્યો હતો. આ હુમલો ત્યારે થયો જ્યારે જહાજ હોર્મુઝ જળમાર્ગમાંથી પસાર થઈ રહ્યું હતું. ભારતીય વિદેશ મંત્રાલયના જણાવ્યા અનુસાર, આ હુમલામાં જહાજના 12 ક્રૂ સભ્યો ઘાયલ થયા છે, જેમાં 11 ભારતીય નાવિકોનો સમાવેશ થાય છે.

જહાજ પર કુલ 19 ક્રૂ સભ્યો, જેમાંથી 17 ભારતીય

હુમલા બાદ તરત જ ઓમાનના સુરક્ષા અધિકારીઓની મદદથી તમામ ઘાયલ સભ્યોને જહાજમાંથી સુરક્ષિત બહાર કાઢવામાં આવ્યા હતા. હાલમાં ઓમાનના ખસાબ શહેરમાં તેમની હૉસ્પિટલમાં સારવાર ચાલી રહી છે. આ જહાજ પર કુલ 19 ક્રૂ સભ્યો હાજર હતા, જેમાંથી 17 નાગરિકો ભારતીય છે. ભારતે આ કાયરતાપૂર્ણ હુમલાની સખત શબ્દોમાં નિંદા કરી છે અને ભારતીય નાવિકોને તાત્કાલિક મદદ પૂરી પાડવા બદલ ઓમાનના અધિકારીઓનો આભાર વ્યક્ત કર્યો છે.

હુમલા અટકાવવા અને જળમાર્ગોની સુરક્ષા માટે ભારતની અપીલ

વિદેશ મંત્રાલયે આ ઘટના અંગે ઊંડી ચિંતા વ્યક્ત કરતાં જણાવ્યું કે, આ સંવેદનશીલ વિસ્તારમાં જહાજો પર સતત થઈ રહેલા હુમલા ગંભીર બાબત છે. ક્ષેત્રમાં શાંતિ અને સ્થિરતા જાળવવા માટે આવા હુમલાઓ તુરંત રોકવા જરૂરી છે. વેપારી જહાજો, નાવિકો અને નાગરિક માળખાગત સુવિધાઓને નિશાન બનાવવાનું બંધ થવું જોઈએ અને આંતરરાષ્ટ્રીય જળમાર્ગો પરથી વેપાર તથા અવરજવર કોઈપણ અવરોધ વિના શરૂ રહેવી જોઈએ.

ઑક્ટોબરના પ્રથમ સપ્તાહમાં 7 ટેન્કરો પર હુમલા

MT On Peace પર થયેલો આ હુમલો હોર્મુઝ અને તેની આસપાસના જળક્ષેત્રમાં વધતી અસુરક્ષા દર્શાવે છે. મીડિયા અહેવાલ મુજબ, ઑક્ટોબરના પ્રથમ સપ્તાહમાં આ દરિયાઈ વિસ્તારમાં ઓછામાં ઓછા 7 ટેન્કરો પર હુમલા નોંધાયા છે. અગાઉ જુલાઈ મહિનામાં ઈરાનની ક્રૂઝ મિસાઇલોએ UAE સાથે જોડાયેલા બે ટેન્કરોને નિશાન બનાવ્યા હતા, જેમાં એક ભારતીય ક્રૂ સભ્યનું મૃત્યુ થયું હતું અને 10 અન્ય ઘાયલ થયા હતા. સમગ્ર વિશ્વના લગભગ 20% ક્રૂડ ઓઇલ અને LNGનો પુરવઠો હોર્મુઝ જળમાર્ગમાંથી પસાર થાય છે, જેથી અહીં વારંવાર ઊભી થતી અડચણોને કારણે ક્રૂડના વૈશ્વિક ભાવો, શિપિંગ ખર્ચ અને ઊર્જા સુરક્ષા પર ગંભીર સંકટ ઊભું થયું છે.