જામજોધપુરના સમાણા ગામમાં મજૂરીના બાકી નાણાં માંગતા યુવક પર હુમલો : પથ્થર મારી ઇજા પહોંચાડતાં એક શખ્સ સામે ફરિયાદ

Jamnagar Crime : જામનગર જિલ્લાના જામજોધપુર તાલુકાના સમાણા ગામમાં મજૂરીના બાકી નાણાં માંગવા ગયેલા યુવક પર હુમલો કરાયાની ઘટના સામે આવી છે. આ મામલે શેઠવડાળા પોલીસ મથકે એક શખ્સ સામે ગુનો નોંધવામાં આવ્યો છે.
પ્રાપ્ત વિગતો મુજબ સમાણા ગામની આંબેડકરનગર સોસાયટીમાં રહેતા દિવ્યેશભાઈ જેંતીભાઈ વાઘેલા (ઉંમર 19 વર્ષ) આશરે ત્રણ મહિના અગાઉ આરોપી કિશોરભાઈ નાનજીભાઈ વાઘેલા સાથે મજૂરી કામે ગયા હતા. તે દરમિયાન બે દિવસની મજૂરીના નાણાં દિવ્યેશભાઈને મળવાના બાકી હતા.
ફરિયાદ મુજબ દિવ્યેશભાઈએ અનેક વખત બાકી રહેલા નાણાંની માંગણી કરી હતી, પરંતુ આરોપી દ્વારા નાણાં ચૂકવવામાં આવતા ન હતા. દરમિયાન ફરી એક વખત નાણાં માંગતા કિશોરભાઈ ઉશ્કેરાઈ ગયા હતા અને દિવ્યેશભાઈને ગાળો આપી જાનથી મારી નાખવાની ધમકી આપી હતી.
આરોપીએ પથ્થર વડે હુમલો કરી દિવ્યેશભાઈના માથાના ડાબા ભાગે તેમજ જમણા પગના સાથળના ભાગે ઇજા પહોંચાડી હતી. ઇજાગ્રસ્ત યુવકે સારવાર લીધા બાદ સમગ્ર બનાવ અંગે પોલીસ ફરિયાદ નોંધાવી હતી.
શેઠવડાળા પોલીસે આરોપી કિશોરભાઈ નાનજીભાઈ વાઘેલા સામે ભારતીય ન્યાય સંહિતાની સંબંધિત કલમો હેઠળ ગુનો નોંધી વધુ તપાસ હાથ ધરી છે.