જામનગર તાલુકાના મોખાણા ગામે વાડી વિસ્તારમાં પુનઃ દીપડાના આંટાફેરાની ગ્રામજનોની ફરિયાદ : વન વિભાગ દ્વારા પાંજરું મૂકવામાં આવ્યું

Jamnagar: જામનગર જિલ્લાના મોખાણા ગામના વાડી વિસ્તારમાં ફરી એકવાર દીપડો દેખાયો હોવાની ગ્રામજનો દ્વારા ફરિયાદ ઉઠતાં સમગ્ર વિસ્તારમાં ભયનો માહોલ સર્જાયો છે. આશરે પાંચ દિવસના વિરામ બાદ દીપડાની હલચલ જોવા મળી હોવાનું સ્થાનિકો જણાવી રહ્યા છે.
ગ્રામજનોએ વાડી વિસ્તારમાં દીપડાના આંટાફેરા અને પગલાંના નિશાન જોવા મળ્યાની જાણ વન વિભાગને કરી હતી. જાણ મળતા જ વન વિભાગની ટીમ સ્થળ પર પહોંચી હતી અને પ્રાથમિક તપાસ હાથ ધરી હતી.
વન વિભાગ દ્વારા દીપડાને પકડવા માટે સંભવિત અવરજવરવાળા વિસ્તારમાં પાંજરું મૂકવામાં આવ્યું છે. સાથે જ વિસ્તાર પર સતત નજર રાખવા માટે પેટ્રોલિંગ અને મોનિટરિંગની કામગીરી પણ શરૂ કરવામાં આવી છે.
દીપડાની હાજરીના સમાચારથી ખેડૂતો અને પશુપાલકોમાં ચિંતા ફેલાઈ છે. ખાસ કરીને વહેલી સવારે અને સાંજના સમયે વાડી વિસ્તારમાં અવરજવર કરતા લોકોમાં ભયનો માહોલ જોવા મળી રહ્યો છે.
વન વિભાગે ગ્રામજનોને સતર્ક રહેવા, એકલા ખેતરોમાં ન જવા તેમજ કોઈપણ શંકાસ્પદ હલચલ જણાય તો તાત્કાલિક જાણ કરવા અપીલ કરી છે. હાલ દીપડાની હાજરી અંગે વધુ પુરાવા મેળવવા અને તેને સુરક્ષિત રીતે પકડવા માટે કાર્યવાહી ચાલુ રાખવામાં આવી છે.