જામનગરના કનસુમરા જી.આઈ.ડી.સી. પાસે કારમાંથી રૂ. 85 હજારનો વિદેશી દારૂ ઝડપાયો
Summarized by AI; it may make mistakes. Check important info
Summarized by AI; it may make mistakes. Check important info
Jamnagar: જામનગર નજીક કનસુમરા જી.આઈ.ડી.સી. વિસ્તારમાં કોપેક્સ કારખાના પાસે પંચકોશી 'બી' ડિવિઝન પોલીસે બાતમીના આધારે દરોડો પાડી વર્ના કારમાંથી વિદેશી દારૂની 426 બોટલ અને ચપલાનો જથ્થો ઝડપી પાડ્યો છે. પોલીસે રૂ. 85,200ની કિંમતનો દારૂ તથા રૂ. પાંચ લાખની કિંમતની કાર સહિત કુલ રૂ. 5.85 લાખનો મુદ્દામાલ કબજે કરી બે શખ્સોની ધરપકડ કરી છે. જ્યારે દારૂ સપ્લાય કરનાર બે અને મંગાવનાર બે મળી અન્ય ચાર શખ્સોને ઝડપી પાડવા તપાસ હાથ ધરવામાં આવી છે.
રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય અને જામનગર જિલ્લા પોલીસ અધિક્ષક ડો. રવિ મોહન સૈનીની સૂચના અનુસાર દારૂ-જુગારની ગેરકાયદે પ્રવૃત્તિઓ અટકાવવા કાર્યવાહી હાથ ધરવામાં આવી રહી છે. લાલપુર વિભાગના એ.એસ.પી. પ્રતીભાના માર્ગદર્શન હેઠળ પંચકોશી 'બી' ડિવિઝનના પી.આઈ. વી.જે. રાઠોડ અને તેમની ટીમ પેટ્રોલિંગમાં હતી.
તે દરમિયાન એ.એસ.આઈ. શૈલેન્દ્રસિંહ એસ. જાડેજા અને પોલીસ કોન્સ્ટેબલ જયપાલસિંહ આર. જાડેજાને બાતમી મળી હતી કે, કનસુમરા જી.આઈ.ડી.સી. રોડ પર કોપેક્સ કારખાના સામે એક વર્ના કારમાં વિદેશી દારૂનો જથ્થો રાખીને બે શખ્સો ઊભા છે. આ બાતમીના આધારે પોલીસે સ્થળ પર દરોડો પાડીને તપાસ કરતાં કારની ડીકીમાંથી વિદેશી દારૂનો જથ્થો મળી આવ્યો હતો.
પોલીસે જી.જે.-12-ડી.જી.-2581 નંબરની વર્ના કારમાંથી રૂ. 85,200ની કિંમતની વિદેશી દારૂની 426 બોટલ અને ચપલાનો જથ્થો કબજે કર્યો હતો. આ સાથે રૂ. પાંચ લાખની કિંમતની કાર જપ્ત કરી સ્થળ પરથી બે શખ્સોને ઝડપી લીધા હતા.
પકડાયેલા આરોપીઓમાં નાઘેડી ગામમાં હનુમાનજી મંદિર પાસે રહેતો અને ડ્રાઇવિંગનો વ્યવસાય કરતો આશિફભાઈ કાસમભાઈ કાટલીયા (ઉ.વ. 30) તથા જામનગરના ગોકુલનગર વિસ્તારમાં શિવમનગર શેરી નં. 4માં રહેતો અને મજૂરીકામ કરતો અરજણભાઈ એભાભાઈ ભારવાડીયા (ઉ.વ. 26)નો સમાવેશ થાય છે.
આ પ્રકરણમાં દારૂ સપ્લાય કરનાર નાઘેડીનો રામ ઉર્ફે રામકો મેર જીવાભાઈ મોઢવાડીયા અને લાખાબાવળનો ભરત સાજનભાઈ ગઢવી તથા દારૂ મંગાવનાર ગોકુલનગરનો દિગ્વિજયસિંહ ઉર્ફે દિગુભા રામસંગ જાડેજા અને રાજ ધોકીયા સામે પણ કાર્યવાહી માટે તપાસ હાથ ધરવામાં આવી છે.
પોલીસે પ્રોહિબિશન એક્ટની વિવિધ કલમો હેઠળ ગુનો નોંધી આગળની કાયદેસરની કાર્યવાહી હાથ ધરી છે. આ કામગીરીમાં પી.આઈ. વી.જે. રાઠોડ, એ.એસ.આઈ. શૈલેન્દ્રસિંહ જાડેજા, સંજયભાઈ જીલરીયા, મયુરસિંહ જાડેજા, જયપાલસિંહ જાડેજા અને દિવ્યરાજસિંહ જાડેજા જોડાયા હતા.
