અમેરિકાથી દુઃખદ સમાચાર, ગુજરાતી યુવકની ધોળા દિવસે ગોળી મારી હત્યા

Gujarati Man Shot At In America: અમેરિકામાં વધુ એક ગુજરાતીની હત્યા કરવામાં આવી છે. નોર્થ કેરોલિનામાં વસતા મૈનાક પટેલની એક સગીરે તેના સ્ટોર્સને લૂંટતી વખતે ગોળી મારીને હત્યા કરી હતી. મૈનાક પટેલ 2,580 એરપોર્ટ રોડ પર ટોબેકો હાઉસનો માલિક હતો. પોલીસે આરોપીની ધરપકડ કરી હતી, પરંતુ તે સગીર હોવાથી તેનું નામ જાહેર કરાયું નથી.

મૈનાક પટેલને પાંચ વર્ષની પુત્રી છે 

ગુજરાતી મૂળના મૈનાક પટેલને પાંચ વર્ષની પુત્રી છે. તેના મૃત્યુથી પરિવારમાં શોકનો માહોલ છવાયો છે. મૈનાક પટેલના પરગજુ અને બોલકા સ્વભાવના લીધે સ્થાનિકો તેમને માઈક કહેતા હતા. રોવન કાઉન્ટી શેરિફ ઓફિસના પબ્લિક ઈન્ફોર્મેશન ઓફિસર કેપ્ટન માર્ક મેકડિનાયલે જણાવ્યું હતું કે, 'ડેપ્યુટીને ટોબેકો હાઉસ સ્ટોરમાંથી 911 કોલ આવ્યો હતો. તેઓ ઘટના સ્થળે પહોંચ્યા ત્યારે મૈનાક પટેલને અનેક ગોળીઓ વાગેલી હતી. તેને તરત જ નોવન્ટ હેલ્થ રોવન મેડિકલ સેન્ટર લઈ ગયા હતા અને તેને ત્યાંથી હોસ્પિટલ શિફ્ટ કરાયા હતા, પરંતુ તે બચી શક્યો ન હતો.'

આ પણ વાંચો: 7.2 ની તીવ્રતાના ભૂકંપથી જ્વાળામુખી ફાટતાં હચમચ્યું રશિયા, 8 કિ.મી. ઊંચે સુધી રાખ ઊડી

લૂંટના ઇરાદે ગોળી મરાઈ હોવાનું પ્રાથમિક તારણ

મેકડેનિયલે જણાવ્યું હતું કે, 'સિક્યોરિટી વીડિયોમાં શખસ સ્ટોર પાર્કિંગમાં દોડતો જોઈ શકાય છે. તેણે બ્લેક શોટ, બ્લેક હૂડી, બ્લેક સ્કી માસ્ક અને વ્હાઈટ નાઇક ટેનિસ શૂઝ પહેર્યા હતા. તેના હાથમાં કાળા રંગની હેન્ડગન જોવા મળી હતી. હાલમાં તો આ હત્યા પાછળ લૂંટ સિવાયનો કોઈ બીજો ઇરાદો દેખાતો નથી.'