ઝેલેન્સ્કી અને પુતિનનો મોટો નિર્ણય, 1000 યુદ્ધ કેદીઓની અદલાબદલી કરવા સંમત

Russia-Ukraine Peace Talks : રશિયા અને યુક્રેન વચ્ચે ત્રણ વર્ષથી ચાલી રહેલા યુદ્ધ દરમિયાન પહેલીવાર બંને દેશોના પ્રતિનિધિ મંડળ વચ્ચે પ્રત્યક્ષ બેઠક થઈ હતી. બેઠકમાં યુદ્ધ વિરામ કરવા પર કે યુદ્ધ અટકાવવાનો કોઈ નિવેડો આવ્યો નથી, પરંતુ બંને દેશો 1000 યુદ્ધ કેદીઓની અદલાબદલી કરવા માટે સંમત થયા છે.

યુદ્ધ કેદીઓની અદલાબદલી બંને દેશો માટે સારા સંકેત

યુક્રેનના સંરક્ષણ મંત્રી રૂસ્તમ ઉમરોવે યુદ્ધ કેદીઓની અદલાબદલીની માહિતી આપવાની સાથે કહ્યું છે કે, યુદ્ધની શરૂઆત થયા બાદ બંને દેશો વચ્ચે આ સૌથી મહત્ત્વનો નિર્ણય છે. બંને દેશો વચ્ચે ઘણા લાંબા સમયથી ચાલી રહેલા યુદ્ધને સમાપ્ત કરવા માટે ઈસ્તંબુલમાં શાંતિ બેઠક યોજાઈ હતી. તાજેતરમાં જ બંને દેશો ત્રણ વર્ષમાં પ્રથમ વખત પ્રત્યક્ષ રીતે શાંતિ વાર્તા યોજવા માટે સંમત થયા છે.

આ પણ વાંચો : રશિયા અને યુક્રેન વચ્ચે ત્રણ વર્ષ બાદ વાતચીત, પુતિનની ગેરહાજરી પર ઉઠ્યા સવાલ

પુતિન બેઠકમાં ન આવતા ઝેલેન્સ્કી નારાજ

ઉલ્લેખનીય છે કે, બેઠકમાં પુતિને પોતે આવવાના બદલે વરિષ્ઠ અધિકારીઓને મોકલ્યા હતા, જેના કારણે યુક્રેનના રાષ્ટ્રપતિ વોલોદિમીર ઝેલેન્સ્કી (Ukraine President Volodymyr Zelenskyy) નારાજ થયા છે. બીજીતરફ યુક્રેનના એક અધિકારીએ આક્ષેપ કર્યો છે કે, ‘તુર્કેઈમાં બે કલાક યોજાયેલી બેઠકમાં રશિયાએ અસ્વિકાર્ય માંગો મુકી છે.’

બેઠકમાં ડોનાલ્ડ ટ્રમ્પ પણ આવ્યા

રશિયા અને યુક્રેન વચ્ચેનું યુદ્ધ બંધ થાય તે માટે અમેરિકાના રાષ્ટ્રપ્રમુખ ડોનાલ્ડ ટ્રમ્પ (US President Donald Trump) દ્વારા અનેક પ્રયાસો થઈ રહ્યા છે. ટ્રમ્પના પ્રયાસના ભાગરુપે જ તુર્કેઈમાં બેઠકનું આયોજન કરવામાં આવ્યું હતું અને તેઓ પણ અહીં આવી પહોંચ્યા હતા. બેઠકમાં તુર્કેઈના વિદેશમંત્રી હકાન ફિદાન પણ ઉપસ્થિત રહ્યા હતા.

પુતિન બેઠકમાં ગેરહાજર, પ્રતિનિધિઓને મોકલ્યા

રશિયાના રાષ્ટ્રપ્રમુખ વ્લાદિમીર પુતિન (Russia President Vladimir Putin) તો સ્વયં ઉપસ્થિત રહ્યા ન હતા, પરંતુ તેઓએ રશિયન પ્રતિનિધિ મંડળમાં વ્લાદીમીર મેડીન્સ્કી, નાયબ વિદેશ મંત્રી મિસાઈલ ગાલુઝિન, નાયબ સંરક્ષણ મંત્રી, એલેકઝાંડર ફોમિન અને રશિયન આર્મ્ડ ફોર્સીસની મેઈન ડીરેકટરેસના વડા ઈગોર કોસ્યુકોવને મોકલ્યા હતા. ઉપરાંત ફર્સ્ટ ડેપ્યુટી હેડ ઓફ ધ જનરલ સ્ટાફ ઈર્ન્ફમેશન ડીપાર્ટમેન્ટ ડેપ્યુટી હેડ ઓફ પ્રેસિડેન્શ્યલ ડીરેકરટરેટ ફોર હ્યુમેનિટેરિયન પોલીસી એલેક્સી એલેક્સી પોલિચ્યુક અને ડીફેન્સ મીનિસ્ટ્રીનો ઈન્ટરનેશનલ મિલીટરી કો-ઓપરેશનની ડીરેકટરોના ડેપ્યુટી હેડ, વિક્ટર શેવત્સોવ પણ હતા. આ પ્રતિનિધિ મંડળનું નેતૃત્વ વ્લાદીમીર મેડીન્સ્કીએ કર્યું હતું.

આ પણ વાંચો : ઈઝરાયલનો ગાઝા પર ફરી ભયાનક હુમલો, 93ના મોત, અનેક લોકો કાટમાળ નીચે દબાયા