અમેરિકા બાદ ઈઝરાયલનો ફોર્ડો ન્યુક્લિયર સાઈટ પર હુમલો, ઈરાને પણ મિસાઈલો છોડી

Iran-Israel War News: અમેરિકા બાદ હવે ઈઝરાયલ તરફથી ઈરાનના ફોર્ડો સ્થિત અંડરગ્રાઉન્ડ પરમાણુ મથક પર હુમલો થયો છે. જેનો વળતો જવાબ આપતાં ઈરાને ઈઝરાયલ પર મિસાઈલ અને ડ્રોનનો વરસાદ કર્યો છે. ઈરાને અમેરિકાને ખુલ્લેઆમ ચેતવણી આપી છે કે, ડોનાલ્ડ ટ્રમ્પ સરકાર દ્વારા કરવામાં આવેલા પરમાણુ મથકો પર હુમલાના કારણે અમને અમેરિકાના સૈન્ય મથકો પર હુમલો કરવાની છૂટ મળી છે. રવિવારે અમેરિકાએ ઈરાનના ત્રણ પરમાણુ મથક પર હુમલો કરી યુદ્ધમાં એન્ટ્રી લીધી હતી.

ઈઝરાયલના પણ હુમલા

ઈરાનની રાજધાની તેહરાન અને તેની આસપાસના વિસ્તારોમાં ઈઝરાયલની એરસ્ટ્રાઈક ચાલુ જ છે. ઈરાનના પરમાણુ મથકોને ટાર્ગેટ બનાવાઈ રહ્યા છે. વિયેનામાં ગ્રોસીએ જણાવ્યું કે, IAEA સહિત કોઈપણ હજી સુધી ફોર્ડો પરમાણુ મથક પર થયેલા નુકસાનની આંકલન કરવાની સ્થિતિમાં નથી.

ફોર્ડો પરમાણુ મથકને મોટુ નુકસાન

ઈરાને સરકારી ટીવીમાં જણાવ્યું હતું કે, ફોર્ડો સ્થિત પરમાણુ મથક રવિવારના હુમલામાં પ્રભાવિત થયુ છે. સોમવારે ફરી આ મથક પર હુમલો થયો હતો. આ હુમલો કોણે કરાવ્યો અને કેટલું નુકસાન થયુ તેની માહિતી નથી. જો કે, ઈઝરાયલે અગાઉ આ હુમલો પોતે કરાવ્યો હોવાનો દાવો કર્યો હતો. વિયેનામાં યુએન ન્યૂક્લિયર વોચડોગના હેડએ કહ્યું હતું કે, રવિવારે અમેરિકા દ્વારા બંકર બસ્ટર બોમ્બ મારફત કરવામાં આવેલા હુમલાના કારણે ફોર્ડો પરમાણુ મથકને ભારે નુકસાન થયુ હોવાની શક્યતા છે. આ હુમલામાં ઉપયોગમાં લેવામાં આવેલા વિસ્ફોટક પેલોડને ધ્યાનમાં લેતાં મોટાપ્રમાણમાં નુકસાન થયુ હોવાની આશંકા છે.

આ પણ વાંચોઃ અમેરિકા ઈઝરાયલની પડખે આવ્યું પણ રશિયાએ ઈરાનની મદદ કેમ ન કરી? પુતિનનો ચોંકાવનારો જવાબ

ઈરાનની અમેરિકા-ઈઝરાયલને ચેતવણી

પરમાણુ મથકો પર હુમલા બાદ ઈરાને કહ્યું કે, અમેરિકાએ મિસાઈલો અને 30,000 પાઉન્ડના બંકર બસ્ટર બોમ્બ મારફત ત્રણ મથકો પર હુમલો કરી પોતાનું જોખમ વધાર્યું છે. તેના માઠા પરિણામ ભોગવવા પડશે. ઈઝરાયલને પણ ખુલ્લેઆમ હુમલા કરવાની ધમકી આપી છે. ઈઝરાયલના લોકોને સુરક્ષિત આશ્રય સ્થળો પર જવા નિર્દેશ આપવામાં આવ્યો છે. ઈરાને હાઈફા અને તેલ અવીવને ટાર્ગેટ બનાવ્યુ હતું. જેરૂસેલમમાં પણ હુમલા કર્યા છે. જો કે, નુકસાનનો સત્તાવાર આંકડો જાહેર થયો નથી.

અમેરિકાએ ત્રણ મથકોને નુકસાન પહોંચાડ્યું

અમેરિકાએ ગઈકાલે સવારે ત્રણ પરમાણુ મથક ફોર્ડો, નતાંજ અને ઈસ્ફહાન પર હુમલો કર્યો હતો. આ હુમલો ઈરાનના પરમાણુ કાર્યક્રમનો અંત લાવવા કર્યો હોવાનું ટ્રમ્પે જણાવ્યું હતું. ઈરાન-ઈઝરાયલ વચ્ચે ચાલી રહેલા ભીષણ યુદ્ધમાં અમેરિકાની એન્ટ્રીથી વિશ્વભરમાં ખળભળાટ મચ્યો છે. આ યુદ્ધનું કારણ ઈરાનનો ન્યૂક્લિયર એનરિચમેન્ટ પ્રોગ્રામ છે. જો કે, ઈરાને સ્પષ્ટતા આપી હતી કે, તેનો આ પ્રોગ્રામ માત્ર નાગરિકોના ઉદ્દેશ માટે છે. જ્યારે ઈઝરાયલ અને અમેરિકા તેના પર પરમાણુ હથિયારો બનાવવાનો આરોપ મૂકી રહ્યા છે.