US પ્રમુખ ટ્રમ્પે કહ્યું- 'હું ઇલૉનથી નિરાશ', તો ઇલૉન મસ્કે કહ્યું- 'મારા વિના તમે જીતી શક્યા ન હોત'

Musk-Trump feud: અમેરિકાના પ્રમુખ ડોનાલ્ડ ટ્રમ્પે ગુરૂવારે 'વન બિગ બ્યૂટીફુલ બિલ'ની ઇલૉન મસ્ક દ્વારા આકરા શબ્દોમાં કરાયેલી ટિકા પર નિરાશા વ્યક્ત કરી હતી. તેમણે કહ્યું કે, 'ટેસ્લાના સીઈઓ હંમેશાથી બિલની મુખ્ય જોગવાઈઓથી વાકેફ હતા. ખાસ કરીને ઇલેક્ટ્રિક વાહન (EV) આદેશમાં પ્રસ્તાવિત કાપ અંગે.' ટ્રમ્પે ઓવલ ઓફિસમાં પત્રકારો સાથેની વાતચીતમાં કહ્યું કે, 'હું ઈલૉનથી ખૂબ જ નિરાશ છું. મેં તેમને ઘણી મદદ કરી છે. તેઓ બિલની આંતરિક કામગીરીને અહીં બેઠેલા કોઈપણ કરતાં વધુ સારી રીતે જાણતા હતા. તેમને તેમાં કોઈ સમસ્યા નહોતી. અચાનક તેમને એક સમસ્યા થઈ અને જ્યારે તેમને ખબર પડી કે અમે EV આદેશમાં ઘટાડો કરવા જઈ રહ્યા છીએ ત્યારે સમસ્યા વધી ગઈ.'

X પરની એક પોસ્ટમાં મસ્કે ડોનાલ્ડ ટ્રમ્પના 'વન બિગ બ્યુટીફુલ બિલ' વિશેના દાવાઓને ખોટા ગણાવ્યા. તેમણે ટ્રમ્પની ટિપ્પણીઓના જવાબમાં લખ્યું, 'ખોટું, આ બિલ મને એક વાર પણ બતાવવામાં આવ્યું ન હતું અને તે રાત્રિના અંધારામાં એટલું ઝડપથી પસાર થઈ ગયું કે કોંગ્રેસમાં લગભગ કોઈ તેને વાંચી પણ શક્યું નહીં.' બીજી પોસ્ટમાં, મસ્કે કહ્યું કે, 'જે કંઈ હોય. બિલમાં EV/સોલર ઇન્સેન્ટિવ રાખો, ભલે તેલ અને ગેસ સબસિડીને સ્પર્શ ન કરવામાં આવે (ખૂબ જ અન્યાયી!!).'

ટ્રમ્પ મારા વિના ચૂંટણી જીતી શક્યા ન હોત: ઈલૉન મસ્ક

બિલના સત્તાવાર શીર્ષકનો ઉલ્લેખ કરતા, મસ્કે કટાક્ષમાં કહ્યું, 'સંસ્કૃતિના સમગ્ર ઇતિહાસમાં, ક્યારેય એવો કાયદો બન્યો નથી જે બિગ અને બ્યુટીફુલ બંને હોય. દરેક વ્યક્તિ આ જાણે છે! કાં તો તમને BIG અને UGLY બિલ મળે અથવા SLIM અને BEAUTIFUL બિલ મળે. SLIM અને BEAUTIFUL જ રસ્તો છે.' ઇલૉન મસ્કે એક યુઝરને જવાબ આપતા લખ્યું, 'મારા વિના, ટ્રમ્પ ચૂંટણી હારી ગયા હોત, ડેમોક્રેટ્સે ગૃહ પર નિયંત્રણ મેળવ્યું હોત અને રિપબ્લિકન્સ પાસે સેનેટમાં 51-49 બેઠકો હોત.' તેમણે ટ્રમ્પને કૃતઘ્ન ગણાવ્યા.

આ પણ વાંચો: અમેરિકન પ્રમુખ ટ્રમ્પ અને ટેસ્લાના માલિક મસ્કની મિત્રતામાં ભંગ કેમ પડ્યો? જાણો પાંચ મુખ્ય કારણો

આ ટકરાવ એવા સંબંધોમાં નાટકીય વળાંક દર્શાવે છે જે અત્યાર સુધી મોટાભાગે રાજકીય રીતે સંકળાયેલા હતા. મસ્ક, જે એક સમયે ટ્રમ્પના સૌથી કટ્ટર સમર્થકોમાંના એક હતા, તેમણે 2024 ની ચૂંટણીમાં રિપબ્લિકન ઉમેદવાર ડોનાલ્ડ ટ્રમ્પને ટેકો આપવા માટે લગભગ $300 બિલિયન ખર્ચ કર્યા હોવાનું કહેવાય છે અને હવે નિષ્ક્રિય થયેલા ડિપાર્ટમેન્ટ ઓફ ગવર્નમેન્ટ એફિશિયન્સીના વડા તરીકે ટ્રમ્પના વ્યાપક ફેડરલ ખર્ચ-ઘટાડા પહેલમાં મુખ્ય ભૂમિકા ભજવી હતી. પરંતુ DOGE માંથી રાજીનામું આપ્યા પછી, મસ્ક નવા કાયદાના સૌથી વધુ અવાજ ઉઠાવનારા વિરોધીઓમાંના એક બની ગયા છે.

તેમણે આ બિલના વિરોધમાં X પર ઘણી પોસ્ટ્સ કરી છે. તેમણે અગાઉ પણ તેમની પોસ્ટ્સમાં આ વાત છુપાવી ન હતી. ઇલૉન મસ્કે મંગળવારે એક પોસ્ટમાં લખ્યું, 'માફ કરશો, પણ હું હવે તે સહન કરી શકતો નથી. આ બિગ બ્યુટીફુલ બિલ માટે મતદાન કરનારાઓને શરમ આવે છે. તમે જાણો છો કે તમે ખોટું કર્યું છે. તમે તે જાણો છો.'

આ પણ વાંચો: ચીન અને અમેરિકા વચ્ચે ટેરિફ ડીલ થવાની તૈયારી! ટ્રમ્પ અને શી જિનપિંગ વચ્ચે થઈ વાતચીત