નાઇજરમાં સત્તાપલટાનો પ્રયાસ, એરપોર્ટ અને રાષ્ટ્રપતિ ભવન સામે જ ફાયરિંગની ઘટના...

Coup Attempt In Niger: નાઇજરની રાજધાની નિયામેમાં શનિવારે એક મહત્ત્વના સૈન્ય ઠેકાણા પર સૈનિકો દ્વારા અધિકારીઓ સામે બળવાની ઘટના સામે આવી છે. અધિકારીઓના જણાવ્યા પ્રમાણે સૈનિકોના એક જૂથે સૈન્ય ઠેકાણા પર પોતાના અધિકારીઓ વિરુદ્ધ બળવો કર્યો અને રાજધાનીમાં સંવેદનશીલ સ્થળો પર ફાયરિંગ કર્યું. આ દરમિયાન ફાયરિંગ અને વિસ્ફોટના અવાજો સંભળાયા હતા.

શનિવારે સવાર સુધી શહેરમાં સતત ફાયરિંગ અને વિસ્ફોટના અવાજો આવતા રહ્યા. જેમાં મુખ્ય એરપોર્ટ પણ સામેલ હતું, જ્યાં સૈન્ય એર બેઝ 'Base 101' આવેલું છે. આ ઉપરાંત રાષ્ટ્રપતિ ભવન અને પ્રમુખ સંસ્થાઓ ધરાવતા વહીવટી વિસ્તારમાં પણ ફાયરિંગના અવાજો સંભળાયા હતા.

નાઇજરમાં 2023માં સત્તાપલટા દ્વારા સત્તા સંભાળનારી સૈન્ય સરકાર માટે આ વધુ એક પડકાર છે. સૈન્ય સરકારના પ્રમુખ અબ્દુર્રહમાન ત્ચિયાનીના નેતૃત્વમાં દેશે લાંબા સમયથી ચાલી આવતા પશ્ચિમી સુરક્ષા સહયોગીઓ સાથેના સંબંધો તોડીને રશિયા તરફ વલણ અપનાવ્યું છે. તે છતાં, દેશને જિહાદી બળવાખોરોના હુમલાઓ અને સહાયમાં કાપ બાદ વધતી આર્થિક સમસ્યાઓનો સામનો કરવો પડી રહ્યો છે.

પરિસ્થિતિ પર કાબૂ

નાઇજરના સંરક્ષણ મંત્રી જનરલ સલીફૂ મોડીએ કહ્યું કે કેટલાક સૈનિકોએ ઠેકાણા પર કેટલાક અધિકારીઓને બંધક બનાવી લીધા અને સંવેદનશીલ સ્થળો પર ફાયરિંગ કર્યું. તેમણે આને શિસ્ત અને સૈન્ય નિયમોથી અલગ હટવાની ઘટના ગણાવી. અધિકારીઓના જણાવ્યા પ્રમાણે પરિસ્થિતિ પર ફરીથી કાબુ મેળવી લેવામાં આવ્યો છે. આ વર્ષે આ ત્રીજી વખત છે જ્યારે ડિયોરી હમાની ઈન્ટરનેશનલ એરપોર્ટ સ્થિત આ સૈન્ય ઠેકાણા પર હુમલો થયો છે. આ પહેલા બે વખત જિહાદી બળવાખોરોએ હુમલો કર્યો હતો.

સુરક્ષા દળોને એરપોર્ટ વિસ્તારમાં તહેનાત કરવામાં આવ્યા છે, જ્યારે નિયામે તરફ જતો એક મુખ્ય માર્ગ બંધ કરી દેવાયો છે. સત્તામાં રહેલી સૈન્ય પરિષદે લોકોને એકજૂથ રહેવા અપીલ કરી. સ્થાનિક સાંસદ બાના વગાના ઈબ્રાહિમે આ ઘટનાને કાયરતાપૂર્ણ હુમલો ગણાવ્યો અને કહ્યું કે પરિસ્થિતિ નિયંત્રણમાં છે.

સરકાર પર વધ્યું દબાણ

આ એરપોર્ટ વ્યુહાત્મક રીતે ખૂબ જ મહત્ત્વપૂર્ણ છે. અહીં નાઇજરની વાયુસેનાનું બેઝ અને નાઇજર-બુર્કિના ફાસો-માલીની સંયુક્ત સૈન્ય તાકાતનું મુખ્યાલય પણ છે. હવે આ તાજેતરની ઘટનાએ સૈન્ય સરકાર પર દબાણ વધુ વધારી દીધું છે, જે જિહાદી હિંસા પર કાબૂ મેળવવા માટે સંઘર્ષ કરી રહી છે. આ હિંસાથી સાહેલ વિસ્તારના ઘણા ભાગો પ્રભાવિત છે, જેમાં નાઇજરના પાડોસી દેશો બુર્કિના ફાસો અને માલી પણ સામેલ છે, જ્યાં સૈન્ય સરકારો સત્તામાં છે.