કેનેડામાં 'ડે કેર સેન્ટર'માં કાર ઘૂસી જતાં અફરાતફરી, અનેક બાળકોને કચડ્યાં, એકનું મોત, 9 ઘાયલ
Updated: Sep 11th, 2025
GS TEAM
Canada Accident: કેનેડાના ઉત્તરમાં સ્થિત રિચમંડ હિલમાં 11 સપ્ટેમ્બરે એક કાર અચાનક બાલવાટિકા (ડે કેર)ની બારીને તોડીને તેની અંદર ઘૂસી ગઈ હતી. આ દરમિયાન કારે ત્યાં રમી રહેલા અનેક બાળકોને કચડ્યા હતા. આ ઘટનામાં એક બાળકનું મોત નિપજ્યુ હતું, જ્યારે 9 જેટલા બાળકો ઈજાગ્રસ્ત થયા હતા. આ બાળકોમાંથી અનેકની હાલત ગંભીર હોવાનું સામે આવ્યું છે.
આ પણ વાંચોઃ એશિયાના ઘરેણાં સમાન સાવજ સંકટમાં, બે વર્ષમાં 307માંથી અધધધ 256 સિંહોના કમોત
નૉટિંઘમ ડ્રાઇવ નજીક બની ઘટના
કેનેડાની પોલીસ પાસેથી મળતી માહિતી મુજબ, આ ઘટના નોટિંઘમ ડ્રાઇવ નજીક ડે કેર સેન્ટરમાં આ ઘટના બની હતી. આ ઘટના ઓન્ટારિયોના રિચમંડ હિલમાં 'યોંગ સ્ટ્રીટ' અને 'નોટિંઘમ ડ્રાઇવ' ની ખૂબ નજીક બની હતી, જ્યારે બાળકો બાલવાટિકામાં હાજર હતા. આ ઘટનામાં એક દોઢ વર્ષના બાળકનું મોત નિપજ્યું છે.
18 મહિનાથી 3 વર્ષ સુધીના બાળકો ઈજાગ્રસ્ત
આ અકસ્માતમાં 18 મહિનાથી ત્રણ વર્ષની વયના છ અન્ય બાળકો પણ ઈજાગ્રસ્ત થયા હતા, જેમાંથી એકની હાલત ગંભીર હોવાનું કહેવાય છે. આ સાથે જ બાલવાટિકાના ત્રણ કર્મચારીઓ પણ ઈજાગ્રસ્ત થયા હતા.
70 વર્ષીય ડ્રાઇવરની ધરપકડ
મળતી માહિતી મુજબ, આ કેસમાં એસયુવીના 70 વર્ષીય ડ્રાઇવરની ધરપકડ કરવામાં આવી છે. જોકે, પોલીસનું માનવું છે કે, આ ઘટના ઈરાદાપૂર્વક કરવામાં નહતી આવી પરંતુ એક ભૂલથી થયેલું કૃત્ય હતું. હાલ, સમગ્ર ઘટનાની તપાસ કરવામાં આવી રહી છે.
