જોર્ડનમાં 2 સૈનિકોના મોતથી ભડક્યું અમેરિકા, ટ્રમ્પના આદેશથી ઈરાન પર પ્રચંડ એરસ્ટ્રાઈક

USA and Iran war Updates : અમેરિકા અને ઈરાન વચ્ચે ચાલી રહેલો સૈન્ય સંઘર્ષ હવે અત્યંત ગંભીર વળાંક પર પહોંચી ગયો છે. જોર્ડનમાં શુક્રવારે રાત્રે થયેલા હુમલામાં બે અમેરિકન સૈનિકોના મોત અને એક સૈનિક ગુમ થતાં અમેરિકા લાલચોળ થયું છે. અમેરિકન સેનાના સેન્ટ્રલ કમાન્ડ (CENTCOM) એ શનિવારે સત્તાવાર જાહેરાત કરી છે કે પ્રમુખ ડોનાલ્ડ ટ્રમ્પના કડક નિર્દેશ પર ઈરાન વિરુદ્ધ એક મોટું હવાઈ અભિયાન (એરસ્ટ્રાઈક) શરૂ કરી દેવામાં આવ્યું છે.

IRGC ને પાઠ ભણાવવા અને હોર્મુઝ સ્ટ્રેટની સુરક્ષા માટે હુમલા
CENTCOM ના સત્તાવાર નિવેદન અનુસાર, આ નવા હવાઈ હુમલાઓનો મુખ્ય હેતુ હોર્મુઝ સ્ટ્રેટ (Hormuz Strait) માંથી પસાર થતા કોમર્શિયલ જહાજોને ખતરો પહોંચાડવાની ઈરાનની ક્ષમતાને તોડી પાડવાનો છે. આ સાથે જ જોર્ડનમાં અમેરિકન સૈનિકો પર બેલિસ્ટિક મિસાઈલ અને ડ્રોન વડે હુમલો કરનારા ઈરાનના 'ઈસ્લામિક રિવોલ્યુશનરી ગાર્ડ કોર્પ્સ' (IRGC) ના દળોને તાત્કાલિક અને કડક પાઠ ભણાવવાનો છે. અમેરિકાનો સીધો આક્ષેપ છે કે શુક્રવાર રાત્રે થયેલા આ ઘાતક હુમલા પાછળ IRGC નો જ હાથ હતો.

અમેરિકન સૈનિકો ખુવારી અને નેતાઓનું નિવેદન
અમેરિકન સેનાએ માહિતી આપી છે કે 17 જુલાઈએ જોર્ડનમાં થયેલા ઈરાની હુમલા દરમિયાન બે સૈનિકો શહીદ થયા છે અને એક હજુ પણ લાપતા છે. આ ઉપરાંત ચાર ઘાયલ સૈનિકોને સારવાર બાદ હોસ્પિટલમાંથી રજા આપવામાં આવી છે, જ્યારે અન્ય ઇજાગ્રસ્ત જવાનો ફરજ પર પરત ફર્યા છે. શહીદ સૈનિકોના પરિવારોને જાણ કર્યા બાદ જ તેમના નામ જાહેર કરાશે. પ્રમુખ ડોનાલ્ડ ટ્રમ્પે આ ઘટના પર ઊંડા દુઃખની લાગણી વ્યક્ત કરતા તેને અત્યંત દુખદ ગણાવી છે. જ્યારે સંરક્ષણ મંત્રી પીટ હેગસેથે સોશિયલ મીડિયા પર શહીદોને શ્રદ્ધાંજલિ આપતા કહ્યું કે આ બલિદાન અમેરિકાના સંકલ્પને વધુ મજબૂત કરશે.

વૈશ્વિક સ્તરે તેલ અને વ્યાપારી સંકટનો ખતરો
અમેરિકાની આ જવાબી એરસ્ટ્રાઈક બાદ સમગ્ર પશ્ચિમ એશિયા (મિડલ ઈસ્ટ) માં યુદ્ધ જેવો તણાવ વ્યાપી ગયો છે. સંરક્ષણ નિષ્ણાતો માની રહ્યા છે કે જો બંને દેશો વચ્ચે આ પ્રકારે સૈન્ય કાર્યવાહી ચાલુ રહેશે, તો સમગ્ર વિસ્તાર એક મોટા યુદ્ધની લપેટમાં આવી શકે છે. આ સ્થિતિના કારણે આગામી સમયમાં વૈશ્વિક સ્તરે કાચા તેલની સપ્લાય ખોરવાઈ જવાનો અને મોટો વ્યાપારી આર્થિક સંકટ ઊભો થવાનો ભય સેવાઈ રહ્યો છે.