મસ્કે હાથ ખંખેર્યા, ટ્રમ્પે પીઠમાં ખંજર ભોંક્યું! યુકેના PM સમક્ષ ઝેલેન્સ્કીનું દર્દ છલકાયું

Ukraine Starlink speed restriction: યુક્રેનના પ્રમુખ વોલોદોમિર ઝેલેન્સ્કીએ અમેરિકાના પ્રમુખ ડોનાલ્ડ ટ્રમ્પ પર ગંભીર આક્ષેપ મૂકતાં જણાવ્યું છે કે તેઓ વ્યક્તિગત રીતે વિશ્વાસઘાત અનુભવી રહ્યા છે. યુક્રેન અને રશિયા વચ્ચે ચાર વર્ષથી વધુ સમયથી ચાલી રહેલા યુદ્ધ દરમિયાન યુક્રેની સેના માટે અત્યંત મહત્ત્વપૂર્ણ ગણાતી ઈલોન મસ્કની 'સ્ટારલિંક' સેટેલાઇટ સેવા પર અચાનક કાપ મૂકવામાં આવ્યો છે. આ ઘટનાક્રમે કીવ (યુક્રેન) માટે લાંબા ગાળાના અમેરિકન સમર્થન સામે મોટા પ્રશ્નો ઊભા કર્યા છે. લંડનની મુલાકાતે પહોંચેલા ઝેલેન્સ્કીએ આક્ષેપ કર્યો હતો કે ટ્રમ્પ સામેના પક્ષ(રશિયા)નો સાથ આપી રહ્યા છે, જેનાથી બંને દેશોના સંબંધો વણસી રહ્યા છે.

100 mphથી વધુ સ્પીડ પર લિંક બ્લોક, ડ્રોન અને એર ડિફેન્સ સિસ્ટમ ઠપ્પ

યુક્રેનની સેનાના જણાવ્યા અનુસાર, સ્પેસએક્સ દ્વારા નિર્મિત અને યુએસ સરકાર દ્વારા સંચાલિત સ્ટારલિંક કોમ્યુનિકેશન સિસ્ટમ અચાનક 100 mph(માઇલ પ્રતિ કલાક)થી વધુની સ્પીડ પર કામ કરતી બંધ થઈ ગઈ છે. આ તકનીકી આંચકાને કારણે ફ્રન્ટલાઇન પાછળ હુમલો કરવા માટે વપરાતા યુક્રેનના મોટાભાગના ડ્રોન નકામા થઈ ગયા છે. આ સિવાય, કીવ પર બોમ્બમારો કરતાં રશિયાના જેટ-સંચાલિત ડ્રોનને રોકવા માટેની સૌથી અસરકારક એર ડિફેન્સ સિસ્ટમ પણ ખોરવાઈ ગઈ છે. ઝેલેન્સ્કીએ એક ઇન્ટરવ્યૂમાં કહ્યું હતું કે, 'અમેરિકા અને સ્પેસએક્સ દ્વારા રાત્રે 1 વાગ્યે સ્ટારલિંકને બ્લોક કરવામાં આવ્યું હતું. આ નિર્ણયને કારણે ઘણા નિર્દોષ લોકો પોતાના જીવ ગુમાવશે.'

ગુપ્ત માહિતી શેર કરવા પર પણ અમેરિકાનો આડકતરો કાપ

સ્ટારલિંક પર કાપ મૂકવાની સાથે જ રશિયાએ કોઈપણ પૂર્વ ચેતવણી વગર યુક્રેન પર બેલેસ્ટિક મિસાઇલો છોડી હતી. સામાન્ય રીતે અમેરિકા રશિયન હુમલા પહેલા યુક્રેનને ગુપ્ત માહિતી આપતું હોય છે. જોકે, ટ્રમ્પે ગુપ્ત માહિતી અટકાવવાના અહેવાલોને નકાર્યા છે, પરંતુ ઝેલેન્સ્કીના લશ્કરી સલાહકારોના જણાવ્યા મુજબ યુએસ તરફથી ભવિષ્યમાં આ માહિતી સીમિત કરવાની ધમકીઓ મળી રહી છે. ટ્રમ્પે યુક્રેનને રશિયન ઓઇલ રિફાઇનરીઓ પર હુમલા બંધ કરવા માંગ કરી છે, જેના કારણે વૈશ્વિક સ્તરે ઇંધણના ભાવ વધી રહ્યા હોવાનો તેમનો દાવો છે.

બ્રિટિશ પ્રધાનમંત્રી સાથે મુલાકાત: યુકે તરફથી સહાયની ખાતરી

આ તમામ વિવાદો વચ્ચે ઝેલેન્સ્કીએ લંડનમાં બ્રિટિશ પીએમ એન્ડી બર્નહામ (Andy Burnham) અને કિંગ ચાર્લ્સ સાથે મુલાકાત કરી હતી. 10 ડાઉનિંગ સ્ટ્રીટ ખાતે યોજાયેલી બેઠકમાં બ્રિટિશ પીએમ બર્નહામે સ્પષ્ટ કર્યું હતું કે બ્રિટનનું સમર્થન યુક્રેન સાથે અડીખમ રહેશે અને યુક્રેન ખાલી હાથે પાછું નહીં ફરે. યુકે દ્વારા લાઇટવેઇટ મલ્ટી-રોલ મિસાઇલોનો પુરવઠો ઝડપી બનાવવાની અને રશિયન હુમલાથી ક્ષતિગ્રસ્ત થયેલા ચોર્નોબિલ પરમાણુ પ્લાન્ટના રીપેરીંગ માટે £17 મિલિયન(આશરે 17 મિલિયન પાઉન્ડ)ની આર્થિક સહાય આપવાની જાહેરાત કરવામાં આવી છે.

રશિયાનો ઊર્જા ક્ષેત્રો પર મોટો હુમલો, 6 લાખ લોકો અંધારપટમાં

બીજી તરફ, રશિયાએ કીવ અને ખારકીવ સહિતના મુખ્ય શહેરોની ઊર્જા માળખાકીય સુવિધાઓ પર 39 બેલેસ્ટિક મિસાઇલો અને 120 એટેક ડ્રોન વડે ભીષણ હુમલો કર્યો છે. આ હુમલામાં 5 મોટા પાવર પ્લાન્ટ્સ અને સબ-સ્ટેશનો નષ્ટ થઈ ગયા છે, જેના કારણે આશરે 6,00,000(6 લાખ)થી વધુ લોકો વીજળી વગર અંધારપટમાં જીવવા મજબૂર બન્યા છે. ટ્રમ્પ દ્વારા દાવો કરાયેલા 'એનર્જી સીઝફાયર' અંગે રશિયાએ સ્પષ્ટતા કરી છે કે આ સીઝફાયરમાં કયા પાવર પ્લાન્ટ્સ સામેલ છે તેની સ્પષ્ટ વિગતો ન હોવાથી તેઓ તેનો ભંગ કરી રહ્યા નથી.