દુબઈમાં નોટિસ વિના નોકરી છોડી ફસાયો ભારતીય યુવક, 4 મહિનાથી જેલમાં, પરિવારે માગી મદદ

UAE contract job arrest: ઝારખંડના પલામુ જિલ્લાના 23 વર્ષીય યુવક શશિ કુમાર પાસવાન છેલ્લા ચાર મહિનાથી યુનાઇટેડ આરબ એમિરેટ્સ (UAE)ની જેલમાં બંધ છે. પરિવારે જણાવ્યા મુજબ, શશિ દુબઈની એક ખાનગી કંપનીમાં કોન્ટ્રાક્ટ પર કામ કરતો હતો. પોતાની બહેનના લગ્નમાં હાજરી આપવા માટે તે ભારત પાછો ફરવા માગતો હતો. આ માટે તેણે એક એજન્ટને પૈસા આપ્યા હતા, પરંતુ તે મુશ્કેલીમાં ફસાઈ ગયો અને જેલ ભેગા થવું પડ્યું. હવે પરિવારે પ્રશાસન અને ભારત સરકાર પાસે તેને સુરક્ષિત પાછા લાવવા અને કાનૂની મદદ માગી છે.

કંપનીને જાણ કર્યા વગર કામ પર ન જવા અને નોકરી છોડવાનો આરોપ

પોલીસ અધિકારીના જણાવ્યા અનુસાર, શશિ પર આરોપ છે કે તેણે પોતાની કંપનીને યોગ્ય રીતે જાણ કર્યા વગર જ નોકરી છોડી દીધી હતી અને તે સતત સાત દિવસ સુધી કામ પર ગયો નહોતો. આ સમય દરમિયાન જ તેણે ભારત પાછા ફરવા માટે એક એજન્ટનો સંપર્ક કર્યો હતો અને તેને પૈસા ચૂકવ્યા હતા. કંપની અને એજન્ટ સંબંધિત આ જ મામલામાં તેમને દુબઈમાં જેલમાં રાખવામાં આવ્યા છે.

બહેનના લગ્ન માટે ઘરે આવવાનો પ્રયાસ બન્યો આફત

શશિના પિતા લાલાન પાસવાને જણાવ્યું કે, 'મારો પુત્ર વર્ષ 2025માં દુબઈની એક ખાનગી કંપનીમાં કામ કરવા ગયો હતો. પરિવારે શશિની બહેનના લગ્ન 26 જૂનના રોજ નક્કી કર્યા હતા. શશિ આ લગ્નમાં સામેલ થવા માટે કોઈપણ ભોગે ઘરે આવવા માગતો હતો. આ ચક્કરમાં તેણે એજન્ટને પૈસા આપ્યા, પરંતુ તે મદદ કરવાના બદલે ફસાઈ ગયો.'

ચાર મહિનાથી જેલમાં બંધ, પરિવારે સરકાર પાસે માંગી મદદ

પિતાના જણાવ્યા મુજબ, 'શશિ દુબઈના અલ રાશિદિયા વિસ્તારની જેલમાં છેલ્લા ચાર મહિનાથી બંધ છે. શશિએ અગાઉ પરિવારને ભરોસો આપ્યો હતો કે તે ટૂંક સમયમાં જેલમાંથી બહાર આવી જશે. આ જ આશામાં પરિવારે ચાર મહિનાથી વધુ સમય સુધી રાહ જોઈ, પરંતુ કોઈ ઉકેલ ન આવતાં અંતે પોલીસનો સંપર્ક કર્યો.'

પિતાએ હુસૈનાબાદ પોલીસ સ્ટેશનમાં અરજી આપીને પુત્રને ભારત પાછો લાવવા માટે સરકાર પાસે હસ્તક્ષેપની માંગ કરી છે. પલામુના પોલીસ અધિક્ષક કપિલ ચૌધરીએ જણાવ્યું કે અરજીને આગળની કાર્યવાહી માટે ઉચ્ચ અધિકારીઓને મોકલી દેવામાં આવી છે.