- ગેમના રીચાર્જ વખતે છૂટ, પણ વિડ્રો વખતે બ્લોક થતાં મુશ્કેલી
- ખાતાધારકો બેંકમાં જાય તો સાયબર સેલે એકાઉન્ટ બ્લોક કર્યું છે કહીં હાથ અધ્ધર કરતા બેંક કર્મીઓ
સુરેન્દ્રનગર : ડિજિટલ યુગમાં સુરેન્દ્રનગર જિલ્લાના યુવાનો માટે ઓનલાઇન ગેમિંગ એક મોટો અભિશાપ બની રહી છે. ફેસબુક અને ઇન્સ્ટાગ્રામ જેવા સોશિયલ મીડિયા પ્લેટફોર્મ પર આવતી લોભામણી જાહેરાતોના કારણે અનેક યુવાનો ઓનલાઇન જુગાર અને ગેમિંગના રવાડે ચડયા છે. મનોરંજનના નામે શરૂ થયેલી આ લત હવે યુવાનોની મહેનતની કમાણી ધોઈ રહી છે અને તેમને આથક પાયમાલી તરફ ધકેલી રહી છે.
ભોગ બનનાર યુવાનોના જણાવ્યા અનુસાર, જ્યારે તેઓ ગેમ રમવા માટે રકમ જમા કરાવે (રીચાર્જ કરે) છે, ત્યારે બેંક કે સાયબર ટીમ દ્વારા કોઈ જ રોકટોક કરવામાં આવતી નથી. પેમેન્ટ ગેટવે ખુલ્લા હોય છે અને પૈસા સરળતાથી કપાઈ જાય છે. પરંતુ, ખરી મુસીબત ત્યારે આવે છે જ્યારે કોઈ યુવાન ગેમમાં મોટી રકમ જીતે છે. જેવી આ રકમ પોતાના બેંક એકાઉન્ટમાં 'વિડ્રો' કરવાનો પ્રયાસ કરવામાં આવે છે, ત્યારે અચાનક જ બેંક એકાઉન્ટ ફ્રીઝ કરી દેવામાં આવે છે. ગેમ સંચાલકો રકમ જમા થયાના મેસેજ મોકલે છે, પરંતુ સાયબર સેલ તે રકમ બ્લોક કરી દે છે, પરિણામે અનેક લોકોના લાખો રૂપિયા ફસાઈ ગયા છે.
જ્યારે યુવાનો પોતાના ફસાયેલા રૂપિયા પાછા મેળવવા બેંકમાં જાય છે, ત્યારે અધિકારીઓ 'ઉપરથી સાયબર સેલે એકાઉન્ટ બ્લોક કર્યું છે' તેમ કહીને હાથ અધ્ધર કરી લે છે. આ સ્થિતિમાં જાગૃત નાગરિકો સવાલ ઉઠાવી રહ્યા છે કે જો આ એપ્લિકેશન્સ ગેરકાયદેસર હોય તો તેમને ચાલવા જ કેમ દેવામાં આવે છે? રીચાર્જ વખતે કેમ કોઈ બેંક એલર્ટ આપતી નથી? ગેમ સંચાલકો હજારો બોગસ કંપનીઓના નામે ખાતા ખોલાવી નાણાં મેળવે છે છતાં તેમની સામે કાર્યવાહી કેમ થતી નથી? હાલ આ મુદ્દો સુરેન્દ્રનગરમાં ચર્ચાનો વિષય બન્યો છે અને મધ્યમ વર્ગના યુવાનો ન્યાયની આશા રાખી રહ્યા છે.
ઓનલાઇન રૂપીયાથી રમાતી ગેમો ડાઉનલોડ ન કરોઃ એસપી
સુરેન્દ્રનગર જિલ્લા પોલીસ વડા પ્રેમસુખ ડેલુએ યુવાનોને ઓનલાઇન રૂપિયાથી રમાતી ગેમ્સ ડાઉનલોડ ન કરવા અપીલ કરી છે. તેમણે જણાવ્યું કે, આવી ગેમોના સંચાલકો સામે કડક કાર્યવાહી કરાશે. સાયબર ક્રાઈમની મદદથી ફ્રીઝ થયેલા જેન્યુન એકાઉન્ટ્સની વિગતો મેળવી આગળની તપાસ હાથ ધરવામાં આવશે. સાવચેત રહીને નાણાકીય નુકસાનથી બચવા તેમણે ખાસ સૂચન કર્યું છે.
