અમદાવાદમાં સોલા પોલીસે મોજશોખ માટે સ્પોર્ટસ બાઇકની ચોરી કરતા યુવકને ઝડપી પાડ્યો

Ahmedabad Crime news : સોલા પોલીસ સ્ટેશનની હદમાંથી એક સ્પોર્ટસ બાઇકની ચોરી થઇ હતી. જે અનુસંધાનમાં પોલીસે સીસીટીવી એનાલીસીસ અને બાતમીના આધારે વિકાસ પરમાર (રહે. મેમનગર, ઘાટલોડિયા) નામના ચોરીના બાઇક સાથે ઝડપી લીધો હતો. તેની સઘન પુછપરછ કરતા જાણવા મળ્યું હતું કે તેણે તેના મિત્રોની સાથે મળીને શહેરના વાસણા, વ્યાસવાડી, સતાધાર ચાર રસ્તા, વસ્ત્રાપુર, આનંદનગરમાંંથી પણ બાઇકની ચોરી કરીને એએમસીના પાર્કિગ પ્લોટમાં સંતાડયા હતા.

જેના આધારે પોલીસે તપાસ કરતા કુલ છ બાઇક જપ્ત કર્યા હતા. આ બાઇકને મોજશોખ માટે ફેરવીને બાદમાં રાજસ્થાનમાં સસ્તામાં વેચાણ કરતા હતા. આ અંગે સોલા પોલીસે વધુ તપાસ શરૂ કરી છે. પોલીસને જાણવા મળ્યું હતું કે આરોપીઓ માત્ર સ્પોર્ટસ બાઇકને જ ટારગેટ કરતા હતા. આરોપીઓ રાજસ્થાનના વતની હતા અને ઘરઘાટી તેમજ અન્ય કામકાજ માટે અમદાવાદમાં રહેતા હતા. રાજસ્થાનના ગામડાઓમાં યુવકોને સસ્તામા બાઇક આપતા હતા. જેથી એડવાન્સમાં ગ્રાહકો મળી રહેતા હતા.