ઘેર બેઠા ટાસ્ક પુરા કરી રોજ 2000 કમાવવાની ઓફરમાં ફસાયેલા યુવકે 16.60 લાખ ગુમાવ્યા

Vadodara Fraud Case : વડોદરાના એક યુવક સાથે ઓનલાઇન ઠગોએ ટાસ્ક પૂરા કરવાના નામે 16.60 લાખ પડાવી લીધા હોવાનો બનાવ બન્યો છે.

સયાજીપુરામાં રહેતા અને ખાનગી નોકરી કરતા સાહિલ કહારે પોલીસને કહ્યું છે કે, ગઈ તા.13 જુલાઈએ ચંચલ ચક્રવર્તીના નામે ટેલિગ્રામ પર મને મેસેજ આવ્યો હતો અને ઓનલાઇન કામ માટે ઓફર કરવામાં આવી હતી. મને રોજ બે રાઉન્ડ ટાસ્ક પુરા કરી 900 થી 2000 રૂપિયા સુધી કમાવવાની વાત કરવામાં આવી હતી. એક રાઉન્ડમાં 30 ઓર્ડર રીવ્યુ કરવાના હતા.

યુવકે કહ્યું છે કે, રજીસ્ટ્રેશન કરાવ્યા બાદ શરૂઆતમાં જ મને 9898 રૂપિયા બોનસ આપવામાં આવ્યું હતું. ત્યારબાદ મેં મારા ખાતામાં ટાસ્કની સામે રકમ પણ જમા થઈ હતી. જે રકમ મારે એકાઉન્ટમાંથી ઉપડી શકી હતી અને મને વિશ્વાસ બેઠો હતો.       

મારા એકાઉન્ટમાં કુલ રૂ.17.12 લાખ જમા થયા હતા અને તેની સામે મારા ખાતામાં રૂ.52,854 જમા થયા હતા. પરંતુ બાકીની રકમ માટે મારી પાસે વધુને વધુ રકમની માંગણી કરવામાં આવતી હતી. જેથી મને શંકા જતા સાયબર સેલને જાણ કરી હતી. પોલીસે ગુનો નોંધી બેન્ક એકાઉન્ટ તેમજ મોબાઇલ મેસેજને આધારે તપાસ હાથ ધરી છે.