વડોદરામાં પાન-પડીકી ખાઇને રોડ પર પિચકારી નહીં મારવા મ્યુ. કમિશનર અરુણ બાબુની અપીલ

Vadodara Corporation : વડોદરા પાલિકા તંત્ર દ્વારા ચાલી રહેલી વન ડે વન રોડ ઝુંબેશના ભાગરૂપે શહેરના પૂર્વ વિસ્તારમાં વાઘોડિયા રોડ-ઉમા ચાર રસ્તાથી પાણી ગેટ આયુર્વેદિક ત્રણ રસ્તા સુધી વિશેષ સફાઈ અને દબાણ દૂર કરવાની કામગીરી હાથ ધરવામાં આવી હતી. મ્યુ.કમિશનરનું ચેકિંગ અને નજર હેઠળ આ કામગીરી કરી દબાણ શાખાની ટીમે દુકાનો આગળના બોર્ડ, લારી-ગલ્લા મળીને ત્રણ ટ્રક જેટલો માલ સામાન કબજે કર્યો હતો. જ્યારે કારેલીબાગ દીપિકા ગાર્ડન આસપાસ ત્રાટકેલી પાલિકા ટીમે વધુ બે ટ્રક જેટલો માલ સામાન મળીને કુલ પાંચ ટ્રક જેટલો માલ સામાન કબજે કર્યો હતો.

 સ્માર્ટ સિટી વડોદરામાં પાલિકા તંત્ર દ્વારા છેલ્લા એક મહિનાથી વન ડે વન રોડ અભિયાન હાથ ધરવામાં આવ્યું છે. આ અભિયાન હેઠળ આજે વાઘોડિયા રોડ-ઉમા ચાર રસ્તાથી પાણીગેટ આયુર્વેદિક કોલેજ ત્રણ રસ્તા સુધીના વિસ્તારમાં મ્યુનિસિપલ કમિશનર અરુણ મહેશ બાબુ તેમજ કોર્પોરેશનના સ્ટાફે સ્થળ કામગીરીનું નિરીક્ષણ કર્યું હતું. આ અભિયાન હેઠળ રોડ પરના દબાણો દૂર કરવામાં આવ્યા હતા. ફૂટપાથ પર મુકાયેલા લારી ગલ્લા સહિત ગેરકાયદે શેડના દબાણોને હટાવવામાં આવ્યા હતા. આ ઉપરાંત ડિવાઈડર પર જામેલા કચરા, ઘાસ તેમજ ગંદકીની સફાઈ કરવામાં આવી હતી તેમજ દબાણની ટીમ દ્વારા લારીગલ્લા સહિત ત્રણ ટ્રક જેટલો માલ સામાન જપ્ત પણ કરવામાં આવ્યો હતો જ્યારે, મ્યુ. કમિશનર અરુણ મહેશ બાબુએ નાગરિકોને અપીલ કરી હતી કે, પાન-પડિકી જેવા પદાર્થો ખાઈ રસ્તા કે ડિવાઈડર પર થુકવા નહીં અને શહેરને સ્વચ્છ રાખવામાં સહયોગ આપવા જણાવ્યું હતું. આવી જ રીતે શહેરના અન્ય વિસ્તારોમાં પણ આગામી દિવસોમાં સફાઈ ઝુંબેશ અને દબાણ દૂર કરવાની કામગીરી હાથ ધરવામાં આવશે તેમ જણાવ્યું હતું. જ્યારે કારેલીબાગ દીપિકા ગાર્ડન આસપાસથી લારી ગલ્લા, ચાની કીટલી અને શક્કરટેટીના તંબુઓ હટાવીને વધુ બે ટ્રક મળી કુલ પાંચ ટ્રક જેટલો માલ સામાન કબજે કરાયો હતો.