વીજ થાંભલાઓ પર ગેરકાયદે કેબલો નાખવા મુદ્દે વડોદરા કોર્પોરેશનની ચેતવણી

Vadodara : વડોદરા કોર્પોરેશન હસ્તકના વીજ થાંભલાઓ ઉપર ગેરકાયદે કેબલ અને ઉપકરણ લગાવી શહેરની સુંદરતામાં ઘટાડો કરનાર સામે કોર્પોરેશન દંડાત્મક કાર્યવાહી કરશે.

કોર્પોરેશનની જાહેર નોટિસમાં જણાવાયું છે કે, શહેરમાં સ્ટ્રીટલાઈટના પોલ પર કેટલાક કેબલ નેટવર્ક-ઇન્ટરનેટ પ્રોવાઈડર તેમજ અન્ય વ્યક્તિઓએ અનઅધિકૃત રીતે ફાઈબર કેબલો, જંકશન બોક્સ, કંટ્રોલ કેબલો અને તેની એસેસરીઝ લગાવી છે. આવા ગેરકાયદે દબાણોના કારણે સ્ટ્રીટલાઈટની નિયમિત નિભાવણીમાં અવરોધ ઉભા થાય છે તેમજ લાઇટનું બ્રેકેટ ડીવાઈડર સાથે સમાંતર થઈ જવું કે પ્રકાશની દિશા બદલાઈ જવાથી શહેરની રાત્રિ દ્રશ્ય સુંદરતામાં ઘટાડો થાય છે. આવા તમામ કેબલ, વાયર તથા ઉપકરણો આગામી 07 દિવસમાં સ્વેચ્છાએ દૂર કરવામાં આવે. નહીંતર કોર્પોરેશન દ્વારા જવાબદાર સંસ્થાઓ અને વ્યક્તિઓ સામે શિક્ષાત્મક તથા દંડાત્મક પગલાં લેવામાં આવશે. સાથે જ કોર્પોરેશન દ્વારા અનધિકૃત વાયર હટાવવાની કાર્યવાહી હાથ ધરાશે.