સાયલાના હોળીઘારમાં એક જ જ્ઞાતિના બે જૂથ વચ્ચે અથડામણ: ધિંગાણામાં 9 લોકોને ઈજા

Surendranagar News: સુરેન્દ્રનગર જિલ્લાના સાયલામાં આવેલા હોળીધાર વિસ્તારમાં એક જ જ્ઞાતિના બે જૂથો વચ્ચે સામાન્ય બાબતે બોલાચાલી થયા બાદ મામલો બિચક્યો હતો. જોતજોતામાં બંને પક્ષો આમને-સામને આવી ગયા હતા. ઉશ્કેરાયેલા બંને જૂથના લોકોએ એકબીજા પર લાકડીઓ, ધોકા અને ધારીયા જેવા ઘાતક હથિયારો વડે હિચકારો હુમલો કરી દીધો હતો. આ હિંસક મારામારીની ઘટનાને પગલે સમગ્ર વિસ્તારમાં ભારે અફરાતફરી અને તંગદિલીનો માહોલ સર્જાયો હતો. આ લોહિયાળ સંઘર્ષમાં બંને પક્ષના થઈને કુલ 9 લોકોને નાની-મોટી ઇજાઓ પહોંચી હતી.

ઘટનાની જાણ થતાં જ સાયલા પોલીસનો કાફલો તાત્કાલિક ઘટનાસ્થળે દોડી ગયો હતો અને પરિસ્થિતિ પર કાબૂ મેળવ્યો હતો. પોલીસે તમામ ઇજાગ્રસ્તોને તાબડતોબ સારવાર અર્થે સાયલાની સરકારી હોસ્પિટલ ખાતે ખસેડ્યા હતા. જો કે, ઇજાગ્રસ્તો પૈકી 3 લોકોની તબિયત વધુ ગંભીર જણાતા તેઓને પ્રાથમિક સારવાર આપીને વધુ સારવાર અર્થે સુરેન્દ્રનગરની હોસ્પિટલમાં રીફર કરવામાં આવ્યા છે. હાલ પોલીસે સમગ્ર મામલે ગુનો નોંધીને કાયદેસરની કાર્યવાહી હાથ ધરી છે.