લવ મેરેજ કરનાર દીકરી જમાઇ પર માતા,પિતાનો હુમલો

 વડોદરા,લવ મેરેજ કરનાર દીકરી અને જમાઇ પર  માતા, પિતાએ   હુમલો કરી જાનથી મારી નાંખવાની ધમકી આપતા બાપોદ પોલીસે ગુનો દાખલ કરી કાયદેસરની કાર્યવાહી હાથ ધરી છે.

વાઘોડિયા ગામ કસ્તૂરબા ફળિયામાં રહેતી વૈદૈહીબેન રાહુલભાઈ પટેલ ખાનગી હોસ્પિટલમાં ઓ.ટી. આસિસ્ટન્ટ તરીકે  નોકરી કરે છે. બાપોદ પોલીસ સ્ટેશનમાં તેણે  ફરિયાદ નોંધાવી જણાવ્યું  છે કે, ૨૬ -૦૩ -૨૦૨૪ ના રોજ મેેં લવ મેરેજ કર્યા છે અને મારા પતિ સાથે રહું છું. મારા લવ મેરેજમાં મારા માતા પિતાની સંમતિ ના હોય તેઓ મને બોલાવતા નથી અને લગ્ન તોડી નાખી ઘરે પરત આવવા માટે દબાણ કરે છે. ગઈકાલે સવારે ૧૦  વાગ્યે હું અને મારી ફ્રેન્ડ બંને બ્યૂટિ પાર્લરના કામ માટે વાઘોડિયા રોડ વૃંદાવન ચાર રસ્તા નજીક બ્યૂટિ  પાર્લરમાં ગયા હતા. ત્યાં મારા માતા, પિતા તથા આશિષ નામના વ્યક્તિએ આવીને તકરાર કરી મારા પતિ પર હુમલો કર્યો હતો. હું તેઓને છોડાવવા વચ્ચે પડતા મારા પર પણ હુમલો કર્યો હતો.  મારા પિતાએ અમને ધમકી આપી હતી કે, તમે વાઘોડિયા આવો મારા માણસોથી તમને જાનથી મરાવી નાખીશ તેમણે મારો ફોન લઈને કાદવમાં નાખી દીધો હતો અને ઝપાઝપીમાં મારું ૬ ગ્રામનું મંગળસૂત્ર પણ તૂટી ગયું હતું