આસોજમાં ભાડાના મકાનમાં નકલી નોટો છાપવાનું કૌભાંડ : બેની ધરપકડ

Vadodara Duplicate Currency : વડોદરા જિલ્લાના સાવલી તાલુકાના આસોજ ગામે ભાડાના એક મકાનમાં છેલ્લા ઘણા સમયથી ચાલતું ડુપ્લીકેટ ચલણી નોટો છાપવાનું રેકેટ ઝડપાયું છે.

 પ્રાપ્ત માહિતી મુજબ આસોજ ગામની સીમમાં એક મકાનમાં નકલી નોટો છાપીને તેને બજારમાં ફરતી કરવામાં આવે છે તેવી માહિતીના આધારે જિલ્લા એલસીબીની ટીમે સાંજે દરોડો પાડયો હતો. પ્રાથમિક દ્રષ્ટિએ ભેજાબાજોએ પોલીસની નજરથી બચવા માટે આસોજ ગામમાં એક શાંત મકાન ભાડે રાખ્યું હતું. જેમાં રાત-દિવસ 500 અને 200ના દરની હૂબહૂ નકલી નોટો છાપવામાં આવતી હતી તેમ જાણવા મળ્યું હતું.

 પોલીસે મકાનમાંથી નકલી નોટો છાપવાનું  કલર પ્રિન્ટર, ખાસ પ્રકારના કાગળ અને શાહી મળતા કબજે કરી હતી. પ્રાથમિક માહિતી મુજબ પોલીસે ઘટનાસ્થળેથી આ કૌભાંડના મુખ્ય બે સૂત્રધારોને દબોચી લીધા છે જેઓની ઘનિષ્ઠ પુછપરછ ચાલી રહી છે. મકાનમાંથી  500 ના દરની 14 અને 200ના દરની 2 મળી કુલ 16 નકલી નોટો પણ જપ્ત કરવામાં આવી છે. આ નકલી નોટો અત્યાર સુધી કયા કયા બજારોમાં વટાવવામાં આવી છે તે દિશામા તપાસ હાથ ધરાઈ છે.

પોલીસે નરેન્દ્ર જંગલાલ પાલ અને હેમંત મગનલાલ જાંગીડની ધરપકડ કરી તેઓની વધુ તપાસ હાથ ધરવામાં આવી છે.