જુદા-જુદા કારખાનામાંથી 21 મજૂરોના મોબાઇલ ફોનની ચોરી

લોધિકાના રાવકી ઇન્ડસ્ટ્રીઅલ એરિયામાં આવેલા

ચોરી કરનાર બે શખ્સો સીસીટીવીમાં કેદ થઇ ગયા, એક આરોપીને રાજકોટ ક્રાઈમ બ્રાંચે ઝડપી લીધો

રાજકોટ: લોધીકાના રાવકી ઇન્ડસ્ટ્રીયલ એરિયામાં આવેલા જુદા-જુદા કારખાનાની ઓરડીમાં રહેતા શ્રમિકોના ૨૧ મોબાઇલ ફોન ચોરાઇ ગયાની લોધીકા પોલીસમાં ફરિયાદ નોંધાઇ છે. બે શખ્સો સીસીટીવી કેમેરામાં કેદ થઇ જતાં તેના આધારે પોલીસે તપાસ આગળ ધપાવી હતી. મોડી સાંજે રાજકોટ ક્રાઈમ બ્રાંચે એક આરોપીને ૧૦ ચોરાઉ મોબાઈલ સાથે ઝડપી લીધો હતો. 

વિશાલ ફાઉન્ડ્રી નામના કારખાનામાં સુપરવાઇઝર તરીકે નોકરી કરતાં દિવ્યેશ સોજીત્રા (ઉ.વ.૩૮, રહે. મવડી ગામ)એ નોંધાવેલી ફરિયાદમાં જણાવ્યું છે કે ગઇ તા. ૧૩નાં રોજ તેના કારખાનામાં કામ કરતાં આઠેક મજૂરોએ પોતાના મોબાઇલ ફોન ચોરાઇ ગયાની ફરિયાદ કરી હતી. સીસીટીવી ફૂટેજ ચેક કરતાં તે જ દિવસે મોડી રાત્રિના બે શખ્સો મજૂરોની ઓરડી પાસે આટાફેરા કરતા હોવાનું જોવા મળ્યું હતું.

ત્યાર પછી તપાસ કરતાં જાણવા મળ્યું હતું કે તેના કારખાનાની બાજુમાં આવેલા ભરડિયામાં કામ કરતાં મજૂરોની ઓરડીમાંથી પણ બે મોબાઇલ ચોરાયા હતાં. આ ઉપરાંત નજીકમાં આવેલ વિયા હોમવેરના ૮ મજૂરોના, એન.વી. મેટલના ૩ મજૂરોના પણ મોબાઇલ ફોન ચોરાયા હતાં. 

આ રીતે બંને શખ્સો રૂા. ૫૨ હજારની કિંમતના ૨૧ મોબાઇલ ફોન ચોરી ગયા હતાં. મજૂરો મોબાઇલના બીલ શોધતા હોવાથી ફરિયાદમાં મોડુ થયું હતું. લોધીકા પોલીસ સાથે એલસીબીએ પણ તપાસમાં ઝંપલાવ્યું હતું. બીજી તરફ રાજકોટ ક્રાઈમ બ્રાંચે ચોરી કરનાર એક આરોપી અલ્તાફ ઉર્ફે છોટુ ઉર્ફે દુડી મુનીમ શેખ (ઉ.વ.૧૯, રહે. એકતા કોલોની શેરી નં.૭, જંગલેશ્વર)ને ઝડપી લઈ તેની પાસેથી ૧૦ ચોરાઉ ફોન પણ કબજે કર્યા હતા.  જંગલેશ્વરમાં રહેતો બીજો આરોપી સદામ જાવીદ અન્સારી ભાગી જતાં તેની પોલીસે શોધખોળ શરૂ કરી છે.