વડોદરાઃ વડોદરાની મકરપુરાની કેન્દ્રિય વિદ્યાલયને ઉડાવી દેવાની ધમકી આપવાના એક સપ્તાહ પહેલાં બનેલા બનાવનો ભેદ ઉકેલવામાં વડોદરા સાયબર સેલને સફળતા મળી છે.પોલીસે સ્કૂલના જ એક વિદ્યાર્થીને ઝડપી પાડી તેના વાલીની હાજરીમાં કાઉન્સેલિંગ કર્યું હતું.
મકરપુરા એરફોર્સ વિસ્તારની કેન્દ્રિય વિદ્યાલયના શિક્ષકને ગઇ તા.૫મી માર્ચે મળસ્કે ૩.૪૩ કલાકે વોટ્સએપ પર મેસેજ મળ્યો હતો.જેમાં નંબર યુએસનો દેખાતો હતો.આ મેસેજ અરબી ભાષામાં હોવાથી શિક્ષકે ગૂગલમાં ટ્રાન્સલેટ કરતાં તેમાં યોર સ્કૂલ વીલ બી કમ્પલિટલી ડિસ્ટ્રોય ટુમોરો, ગોડ ઇઝ ગ્રેટ..અલ્લા હુ અક્બર...લખેલું હતું.
બનાવની જાણ પોલીસને કરાતાં ડોગ સ્કવોડ દ્વારા સ્કૂલમાં ચેકિંગ કરવામાં આવ્યું હતું.પરંતુ કાંઇ હાથ લાગ્યું નહતું.પોલીસ કમિશનરે આ બનાવની તપાસ સાયબર સેલના એસીપી મયૂરસિહ રાજપૂતને સોંપી હતી.
પોલીસે જે નંબર પરથી મેસેજ આવ્યો તેની ડીટેલ તપાસતાં સ્કૂલનો જ માધ્યમિક વિભાગનો એક સગીર વિદ્યાર્થી સુધી પગેરું પહોંચ્યું હતું.પોલીસે વિદ્યાર્થીને બોલાવી કાઉન્સેલિંગ કરતાં તેણે પરીક્ષા ના આપવી પડે તે માટે આવી મજાક કરી હોવાનું સ્વીકાર્યું હતું.વિદ્યાર્થીના વાલીએ પણ તેના વતી માફી માગી હતી.
કારેલીબાગની સ્કૂલને પણ સગીર વિદ્યાર્થીએ ધમકીનો મેઇલ કર્યો હતો
કારેલીબાગ વિસ્તારની સ્કૂલને પણ ધમકીનો મેઇલ મોકલવા બદલ સગીર વિદ્યાર્થી પકડાયો હતો.જેથી વાલીઓ તેમના સંતાનોના સોશ્યલ મીડિયના ઉપયોગ બાબતે વધુ એલર્ટ રહે તેવી સાયબર સેલ દ્વારા અપીલ કરવામાં આવી છે.
વડોદરામાં ગયા મહિને ૨૨ સ્કૂલોને બોમ્બ બ્લાસ્ટની ધમકીના મેલ મળ્યા હતા. આખો દિવસ પોલીસની દોડધામ બાદ સાંજે કારેલીબાગની બ્રાઇટ સ્કૂલને ધમકીનો છેલ્લો મેઇલ મળતાં સાયબર સેલે તપાસ કરી હતી.
આ મેઇલના તાર ૧૦થી૧૨ વર્ષીય વિદ્યાર્થી સુધી પહોંચતા પોલીસે તેનું કાઉન્સેલિંગ કર્યું હતું.જેમાં વિદ્યાર્થીએ સ્કૂલે નહિ જવા માટે આવો મેલ કર્યો હોવાનું કબૂલ્યું હતું.સાયબર સેલના પીઆઇ જેડી પરમારે વાલીઓને ટેકનોલોજીના વધુ પડતા એક્પોઝર અને તેના દુરુપયોગ સામે સતર્ક રહેવા તેમજ વિદ્યાર્થીઓ પર નજર રાખવા અપીલ કરી છે.
યુએસ નો નંબર દેખાય તેવી એપનો ઉપયોગ
મકરપુરાની કેન્દ્રિય વિદ્યાલયને બોમ્બ થ્રેટ મોકલનાર સગીર વિદ્યાર્થીએ તે પકડાઇ ના જાય અને સ્કૂલ પણ બંધ રહે તે માટે મેસેજમાં તેનો નંબર નહિ પણ વિદેશનો નંબર દેખાય તેવી એપનો ઉપયોગ કર્યો હોવાની કબૂલાત કરી હતી.આ એપ પર થી જ પોલીસ તેના સુધી પહોંચી હતી.
