Case Filed Against BJP MP Jashu Rathwa In Chhota Udepur: છોટા ઉદેપુરમાં ભાજપના સાંસદ જશુ રાઠવા, પુત્ર સંગ્રામસિંહ રાઠવા અને તાલુક પ્રમુખ રમેશ રાઠવા સામે બંદૂક સાથેનો વીડિયો વાઈરલ થવાના મામલે પોલીસ દ્વારા જાહેરનામા ભંગનો ગુનો દાખલ કરવામાં આવ્યો છે. આ કાયદાકીય કાર્યવાહી વચ્ચે આજે સાંસદ જશુ રાઠવા નર્મદા જિલ્લાના રાજપીપળા ખાતે આવેલા ભાજપ કાર્યાલય 'કમલમ' ખાતે વિજેતા ઉમેદવારની શુભેચ્છા મુલાકાત માટે પહોંચ્યા હતા, જ્યાં તેમણે આ મામલે પ્રતિક્રિયા આપતા કહ્યું કે, 'આ વખતે અમે અતિ ઉત્સાહમાં હતા અને કાયદો ભૂલી ગયા એટલે બંદૂક લઈને નીકળ્યા હતા.'
કાયદો જે કરશે તે સ્વીકારીશું: જશુ રાઠવા
પોલીસ દ્વારા જાહેરનામા ભંગનો ગુનો દાખલ કરવા અંગે ભાજપના સાંસદ જશુ રાઠવાએ જણાવ્યું હતું કે, 'આદિવાસી સમાજની એક પરંપરા રહી છે કે જ્યારે પણ કોઈ ખુશીનો પ્રસંગ હોય ત્યારે લોકો લાકડી, ધારિયા અને તીર-કામઠા જેવા પરંપરાગત સાધનો લઈને નાચતા હોય છે. આ વખતે અમે પણ જીતના અતિ ઉત્સાહમાં આવી ગયા હતા. તે સમયે અમને કાયદો યાદ ન રહ્યો અને અમે બંદૂક લઈને નીકળી પડ્યા હતા.'
બચાવ કરતાં સાંસદ જશુ રાઠવાએ જણાવ્યું હતું કે, 'એક જવાબદાર સાંસદ (MP) તરીકે મારો કે મારા પરિવારનો હથિયાર ચલાવવાનો કે કોઈને ડરાવવાનો કોઈ જ ખોટો ઈરાદો નહોતો. આ બધું માત્ર અને માત્ર વિજયના અતિ ઉત્સાહના કારણે થયું હતું. જોકે, હવે કાયદાકીય પ્રક્રિયા શરૂ થઈ ચૂકી છે, એટલે કાયદો જે પણ કાર્યવાહી કરશે તે અમને મંજૂર રહેશે અને અમે તેનો સ્વીકાર કરીશું.'
વીડિયો વાઈરલ થતાં જ પોલીસ એક્શનમાં આવી
ઉલ્લેખનીય છે કે, સોશિયલ મીડિયા પર છોટા ઉદેપુરના સાંસદ જશુ રાઠવા, તેમના પુત્ર અને સ્થાનિક તાલુકા પ્રમુખનો જાહેરમાં બંદૂક સાથેનો એક વીડિયો વાઈરલ થયો હતો. જવાબદાર પદ પર બેઠેલા નેતાઓ દ્વારા જાહેરમાં હથિયાર પ્રદર્શન કરવા બદલ ભારે ટીકાઓ થઈ હતી, જે બાદ પોલીસે કાયદાનું ભાન કરાવતા તેમની સામે જાહેરનામા ભંગનો ગુનો નોંધી આગળની તપાસ હાથ ધરી છે.
