જામનગરની ચૂંટણીમાં અનોખો વિરોધાભાસ: એક તરફ ભાજપની વિજયી રેલી, બીજી તરફ જેલમાંથી જીતેલા નેતાનું સરઘસ

Jamnagar Municipal Corporation Election Results: જામનગર મહાનગરપાલિકાના ચૂંટણી પરિણામોએ શહેરના રાજકીય ઇતિહાસમાં બે સાવ અલગ અને કદી ન ભૂલાય તેવા ચિત્રો અંકિત કર્યા છે. 16માંથી 15 વૉર્ડમાં ભાજપના ભગવા લહેરની ગુંજ સંભળાઈ રહી છે, ત્યારે વૉર્ડ નં. 12 માં સર્જાયેલા દ્રશ્યોએ સમગ્ર ગુજરાતનું ધ્યાન ખેંચ્યું છે.

ભાજપનો ભવ્ય વિજયોત્સવ: શહેરભરમાં 'ભગવો માહોલ'

ભાજપને મળેલા પ્રચંડ જનસમર્થન બાદ જામનગરની સડકો પર વિજય રેલીઓનો રેલો ઉતરી આવ્યો હતો. સાંસદ પૂનમબહેન માડમ, શિક્ષણમંત્રી રિવાબા જાડેજા અને અન્ય દિગ્ગજ નેતાઓની હાજરીમાં વિજેતા ઉમેદવારોએ ડી.જે.ના તાલે મતદારોનો આભાર માન્યો હતો. ભવ્ય આતશબાજી અને 'રામ રાજ ફિર આયેગા'ના નારાઓ વચ્ચે ભાજપના કાર્યકરોમાં ભારે ઉત્સાહ જોવા મળ્યો હતો. 15 વૉર્ડમાં એકતરફી જીત મેળવીને ભાજપે પોતાનો ગઢ મજબૂત કર્યો છે.

વૉર્ડ નં. 12 ની અનોખી ગાથા: નેતા જેલમાં, આરોપીના કટઆઉટ સાથે રેલી!

જોકે, ભાજપના આ વિજય રથની વચ્ચે વૉર્ડ નં. 12ની તસવીરોએ વધુ કુતૂહલ જગાવ્યું છે. આ વૉર્ડમાં ભાજપનું ખાતું પણ ખુલ્યું નથી. અહીં કોંગ્રેસ અને આમ આદમી પાર્ટીના ઉમેદવારોએ જેલના સળિયા પાછળ હોવા છતાં જવલંત વિજય મેળવ્યો છે. કોંગ્રેસના ઉમેદવાર અલ્તાફ ખફી જેલમાં હોવાથી તેમના સમર્થકોએ તેમની મોટી ફોટો ફ્રેમ(કટઆઉટ)ને જીપમાં રાખીને ભવ્ય સરઘસ કાઢ્યું હતું.તો આવી જ સ્થિતિ 'આપ'ના વિજેતા ઉમેદવાર અસલમ ખીલજીની રહી. તેઓ પણ જેલમાં હોવાથી તેમની ગેરહાજરીમાં માત્ર તેમના ફોટા સાથે વિજય સરઘસ નીકળ્યું હતું. જામનગરના ઇતિહાસમાં આ પ્રથમ ઘટના છે જ્યાં ઉમેદવારો પોતે ગેરહાજર હોય અને તેમના માત્ર કટઆઉટ કે ફોટા જોઈને જનમેદની ઉમટી પડી હોય.

આ પણ વાંચો: જામનગર: શબ્દોના બાણ બાદ સ્નેહની સરવાણી! પૂનમ માડમ અને રિવાબા જૂની કડવાશ ભૂલી જીતના જશ્નમાં ભેટી પડ્યા

લોકશાહીના બે અલગ રંગો

એક બાજુ સત્તાધારી પક્ષનો શક્તિ પ્રદર્શન જેવો માહોલ અને બીજી બાજુ જેલમાંથી મળેલી જીતનો જુસ્સો—જામનગરની આ ચૂંટણીએ સાબિત કર્યું છે કે રાજકારણમાં જનમત ગમે તેવા સમીકરણો સર્જી શકે છે. જામનગરના રસ્તાઓ પર એક તરફ વિજેતા નેતાઓ પ્રત્યક્ષ હાથ હલાવીને આભાર માનતા હતા, તો બીજી તરફ વૉર્ડ નં. 12માં નેતાઓના 'કટઆઉટ' લોકશાહીની અનોખી વાર્તા કહી રહ્યા હતા.