જામનગરમાં પિતા-પુત્રે આચર્યું 23 કરોડનું GST કૌભાંડ, બોગસ બિલિંગ, ખોટી વેરાશાખ બતાવી સરકારને ચૂનો

Jamnagar GST Scam: જામનગર શહેરના ઔદ્યોગિક વિસ્તાર દરેડ GIDC ફેસ-3માંથી એક ચોંકાવનારું અને કરોડો રૂપિયાનું GST કૌભાંડ પ્રકાશમાં આવ્યું છે. રાજ્ય વસ્તુ અને સેવા કર (SGST) વિભાગે 'માંડવરા ટ્રેડિંગ કંપની' નામની પેઢી પર મેગા સર્ચ ઓપરેશન હાથ ધર્યું હતું. આ સઘન અને આકસ્મિક કાર્યવાહી દરમિયાન, બોગસ બિલિંગ અને ખોટી વેરાશાખ (ITC) મેળવવાના ગંભીર ગુના હેઠળ કંપનીના સંચાલક પિતા-પુત્રની ધરપકડ કરવામાં આવી છે. સરકારી તિજોરીને મોટું નુકસાન પહોંચાડતી આ મેગા-રેડને પગલે સમગ્ર જામનગરના ઔદ્યોગિક અને વ્યાપારી વર્ગમાં ભારે ફફડાટ વ્યાપી ગયો છે.

પિતા-પુત્રે આચર્યું 23 કરોડનું કૌભાંડ

પ્રાપ્ત વિગતો અનુસાર, દરેડ ફેસ-3ના પ્લોટ નંબર-3128 પર કાર્યરત આ પેઢી દ્વારા સુનિયોજિત ષડયંત્ર રચીને આ આર્થિક ગુનો આચરવામાં આવ્યો હતો. કૌભાંડમાં સંડોવાયેલા આયુષ સુરેશચંદ્ર શાહ અને તેમના પિતા સુરેશચંદ્ર મૂલચંદ્ર શાહ દ્વારા વાસ્તવિક માલસામાનની હેરફેર વિના, માત્ર કાગળ પર જ બોગસ બિલો દર્શાવીને અંદાજે રૂ. 23.08 કરોડની જંગી અને તદ્દન ખોટી વેરાશાખ (ઇનપુટ ટેક્સ ક્રેડિટ) ઊભી કરવામાં આવી હતી. સરકાર સાથે આયોજનબદ્ધ આર્થિક છેતરપિંડી આચરી હોવાનું પ્રાથમિક તપાસમાં સ્પષ્ટ થતાં જ SGST વિભાગે બંનેની ધરપકડ કરી કાયદેસરની કાર્યવાહી હાથ ધરી છે. આ મસમોટા કૌભાંડનો પર્દાફાશ થતાં જ સમગ્ર વિસ્તારમાં ખળભળાટ મચી ગયો છે.

વિભાગ દ્વારા ઊંડાણપૂર્વક તપાસ શરૂ

SGST વિભાગ દ્વારા કાયદાનો સકંજો કસાતા ટેક્સ ચોરી કરતા અન્ય તત્વોમાં પણ ભયનો માહોલ છે. હાલમાં, તપાસ એજન્સીઓ દ્વારા 'માંડવરા ટ્રેડિંગ કંપની'ના અન્ય આર્થિક વ્યવહારો, બેંક ખાતાઓ અને શંકાસ્પદ કનેક્શન્સ અંગે ઝીણવટભરી તપાસ તેજ કરવામાં આવી છે. સરકારી તિજોરીને થયેલા આ નુકસાનની ભરપાઈ કરવા અને કૌભાંડના મૂળ સુધી પહોંચવા વિભાગે કમર કસી છે, જેથી આગામી દિવસોમાં આ કેસમાં વધુ મોટા ખુલાસાઓ થવાની પ્રબળ શક્યતા છે.