સવાદ ક્વાટર્સમાં જીમ ટ્રેનર અને તેના ભાઇ પર ચાકૂના ઉપરાછાપરી ઘા ઝીંકી દીધા

વડોદરા,સવાદ ક્વાટર્સમાં માથાભારે યુવકે બે પિતરાઇ ભાઇ સહિત ત્રણ વ્યક્તિઓ પર ચાકૂના ઉપરાછાપરી ઘા ઝીંકી  દેતા ત્રણેય લોહીલુહાણ થઇ ગયા હતા. એક ઇજાગ્રસ્તને ગંભીર ઇજા થઇ હોઇ ખાનગી હોસ્પિટલમાં સારવાર માટે દાખલ કરવામાં આવ્યો છે.

ખોડિયારનગર ધુ્રવા હાઇટ્સમાં રહેતો નીકુલ નટવરભાઇ સોલંકી જીમ ટ્રેનર તરીકે કામ કરે છે. વારસિયા પોલીસ સ્ટેશનમાં તેણે ફરિયાદ નોંધાવી જણાવ્યું છે કે,ગત ૧૩ મી તારીખે રાત્રે પતંગનો દોરો લઇને હું તથા મારા માસીનો દીકરો બોની દશરથભાઇ સોલંકી સવાદ ક્વાર્સમાં રહેતા મામા ગણપતભાઇ સોલંકીના ઘરે ગયા હતા. ઘરનો દરવાજો બંધ હોઇ અમે સોનુ દીદી દરવાજો ખોલ તેવી બૂમો પાડતા હતા. તે સમયે મારા મામાના ઘરની સામે રહેતો પ્રેમ રમેશભાઇ મારવાડીએ આવીને કેમ બૂમો પાડે છે ? તેવુ ંકહીને મારા પર હુમલો કર્યો હતો. મારા મામા સાથે તેના સંબંધો સારા હોઇ મેં ફરિયાદ કરી નહતી. ત્યારબાદ ૧૪ મી તારીખે બપોરે ૧૨ વાગ્યે હું મારા મામાના ઘરે ઉત્તરાયણની ઉજવણી કરવા માટે ગયો હતો. રાત્રે  જમીને હું, મારા બહેન દામિની ઉર્ફે સોનુ, બનેવી મનિષભાઇ તથા બોની સોલંકી મામાના ઘરના ગેટ પાસે ઉભા રહીને વાતો કરતા હતા. તે સમયે પ્રેમ મારવાડીએ મારી પાસે આવીને તારે શું કરવું છે ? તેવું કહીને ફરીથી ઝઘડો શરૃ કર્યો હતો. તેણે ચાકૂ વડે મારા  ડાબા હાથના બાવડા પર તથા પાંસળી પર ઇજા પહોંચાડી હતી. પ્રેમના  પિતા રમેશભાઇ તથા માતા વૈશાલીબેન મને ગડદાપાટુનો માર મારતા હતા. મને છોડાવવા માટે મારા બનેવી મનિષભાઇ વચ્ચે  પડતા પ્રેમે તેઓને ડાબા ખભાની પાછળ તથા મારા પિતરાઇ ભાઇ બોનીને છાતીની જમણી બાજુ  તથા જમણા કાન પાસે ચાકૂના ઘા મારી દીધા હતા. પ્રેમના માતા કહેતા  હતા કે, બોનીને આજે મારી જ નાખવાનો છે. મારા માસી છોડાવવા વચ્ચે પડતા તેઓને પણ આરોપીએ  તમાચા માર્યા હતા. અમે વધુ મારથી બચવા માટે ઘરમાં જતા રહ્યા હતા. બોનીને ગંભીર ઇજા થઇ હોઇ સયાજી હોસ્પિટલમાં પ્રાથમિક સારવાર કરાવ્યા પછી ખાનગી હોસ્પિટલમાં લઇ ગયા હતા.