(પ્રતિનિધિ તરફથી) અમદાવાદ,મંગળવાર
ગુજરાત માધ્યમિક અને ઉચ્ચતર માધ્યમિક બોર્ડે આ વરસે પહેલાવાર દસમા અને બારમા ધોરણની માર્કશીટમાં ક્યૂઆર કોડ લગાવ્યો હોવાથી માર્કશીટમાં માર્ક બદલીને કે ટકાવારી બદલીને નોકરીમાં કે અન્ય સ્થળે લાભ લઈ લેવાની કે પછી એડમિશનમાં લાભ લઈ લેવાની ગેરરરીતિઓ પર પડદો પડી જશે. અત્યાર સુધી કોઈપણ સંસ્થાએ એડમિશન આપતી વેળાએ માર્કશીટની ચકાસણી કરવા માટે બોર્ડમાં મોકલવી પડતી હતી. આ વર્ષથી માર્કશીટમાં ક્યૂઆર કોડ લગાવ્યો હોવાથી ક્યૂઆર કોડને સ્કેન કરી દેવાથી બોર્ડની સત્તાવાર વેબસાઈટ પર મૂકેલી માર્કશીટ ખૂલી જશે. તેથી વિદ્યાર્થીએ રજૂ કરેલી અને બોર્ડની સત્તાવાર વેબસાઈટ પરની માર્કશીટ એક સમાન હોવાની ચકાસણી ગણતરીની સેકેન્ડ્સમાં થઈ જશે. આમ માર્કશીટ સાથે ચેડાં કરવાની પ્રવૃત્તિ પર પડદો પડી જશે.
બારકોડ સ્કેન કરો અને માર્કશીટ ચેક કરો
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના સૂત્રોનું કહેવું છે કે આ વરસથી માર્કશીટ લેઝર પ્રિન્ટર પર છાપવામાં આવી છે. અગાઉ માર્કશીટ લાઈન પ્રિન્ટર પર છાપવામાં આવતી હતી. લાઈન પ્રિન્ટરની સિસ્ટમ વરસોથી અમલમાં હતી. તેથી તેની ચકાસણી કરવામાં સમસ્યા નડતી હતી. પરંતુ આ વરસથી લેઝર પ્રિન્ટરની સિસ્ટમ દાખલ કરવામાં આવી છે. માર્કશીટમાં ચેડાં થવાની ઘટનાઓ ન બને તે માટે અને માર્કશીટ રજૂ કરવામાં કોઈ ગરબડ ન થાય તે માટે માર્કશીટ છાપવાની સમગ્ર પ્રક્રિયાની સમીક્ષા કરવામાં આવી હતી.
માર્કશીટની સાઈઝમાં પણ ફેરફાર
આ વરસે છાપવામાં આવેલી માર્કશીટમાં સુરક્ષા માટેના આધુનિક ફીચર્સનો ઉમેરો કરવામાં આવ્યો છે. હા, માર્કશીટની સાઈઝમાં પણ પહેલાની તુલનાએ ફેરફાર કરવામાં આવ્યો છે. આગામી ગુરૃવારથી વિદ્યાર્થીઓને મળવા માંડનારી માર્કશીટની સાઈઝ 210 મીમી બાય 297મીમીની રાખવામાં આવી છે. લેઝર પ્રિન્ટરથી છપાયેલી હોવાથી અગાઉની માર્કશીટ કરતાં આ વખતની માર્કશીટમાં વધુ ક્લેરિટી જોવા મળશે. ગયા વરસની માર્કશીટ સાત ઇંચ બાય નવ ઇંચની સાઈઝમાં છાપવામાં આવી હતી. જોકે નવી સાઈઝને કારણે જૂની માર્કશીટ અમાન્ય ગણાશે તેવી સમજણ કોઈએ કેળવવાની જરુરનથી.
માર્કશીટ લાંબો સમય ટકશે, ચેડાં કરવા પણ અશક્ય
આ વખતની માર્કશીટ વધુ લાંબો સમય ટકે તેવી પણ હશે. આ માર્કશીટ સાથે ચેડાં કરવાની કે પછી તેમાં બનાવટ કરવાની શક્યતા પર પણ પૂર્ણવિરામ મૂકાઈ જશે. તેને માટે જ માર્કશીટ પર નકલ ન કરી શકાય તેવો ક્યૂઆર કોડ મૂકવામાં આવ્યો છે. આ ક્યૂઆર કોડ સ્કેન કરીને માર્કશીટની ખરાઈની ચકાસણી ગણતરીની મિનિટોમાં કરી શકાશે.
