જામનગર નજીક દરેડ પાસે બાઈક અને કાર વચ્ચેના અકસ્માતમાં દંપત્તી અને તેના બે બાળકો સહિત ચાર વ્યક્તિને ઇજા

Jamnagar Accident : જામનગર નજીક દરેડ પાસે એક બાઈક અને કાર વચ્ચે અકસ્માત સર્જાયો હતો, જે અકસ્માતમાં બાઈક પર નીકળેલા એક દંપતિ અને તેના બે બાળકો સહિત 4 વ્યક્તિને નાની મોટી ઈજા થવાથી જી.જી.હોસ્પિટલમાં ખસેડાયા છે. પોલીસે કાર ચાલક સામે ગુનો નોંધ્યો છે.

 આ બનાવની વિગત એવી છે કે જામનગરમાં કાલાવડ નાકા બહાર ટીંબાફળી માં રહેતો અને ડ્રાઇવિંગ કામ કરતો મહેશ દિલીપભાઈ પરમાર નામનો 34 વર્ષનો સતવારા યુવાન ગત 27 ફેબ્રુઆરીના રોજ પોતાના બાઈકમાં પત્ની રીટાબેન, પુત્ર શુભમ (8 વર્ષ) અને પુત્રી હિરલ (11 વર્ષ) વગેરેને બેસાડીને જામનગરથી ખંભાળિયા ગયો હતો, અને ખંભાળિયાથી પોતાના ઘરે પરત ફરી રહ્યા હતા.

 જે દરમિયાન દરેડ વિસ્તારમાં પુર ઝડપે આવી રહેલી જી.જે. 03 પી.એમ. 8836 નંબરની ગ્રે કલરની એક કારના ચાલકે બાઈકને હડફેટમાં લઈ લેતાં અકસ્માત સર્જાયો હતો.

 જે અકસ્માતમાં ચારેયને નાની મોટી ઈજા થઈ હોવાથી 108 નંબરની એમ્બ્યુલન્સ મારફતે સારવાર માટે જી.જી. હોસ્પિટલમાં ખસેડાયા હતા. અકસ્માત સર્જનાર કાર ચાલક સૌપ્રથમ ભાગી છૂટ્યો હતો. પરંતુ સીસીટીવી કેમેરાના આધારે કારના રજીસ્ટ્રેશન નંબર મેળવી લીધા હતા, અને તે નંબરના આધારે મહેશભાઈ પરમાર દ્વારા પંચકોશી બી.ડિવિઝન પોલીસ મથકમાં કારચાલક સામે ફરિયાદ નોંધાવતાં એ.એસ.આઈ. હરિહરભાઈ પાંડવ તપાસ ચલાવી રહ્યા છે.