હોસ્પિટલમાં એડમિટ ૧૨ દર્દીઓનું રેસક્યૂ કરી અન્યત્ર રિફર કરાયા
ફાયર વિભાગે આશરે બે કલાકની જહેમત બાદ આગ કાબૂમાં લીધી, મોટી દુર્ઘટના ટળી
ભાવનગર - શહેરના લીલાસર્કલ વિસ્તારમાં આવેલા આલેખ કોમ્પ્લેક્સના પાર્કિંગમાં બપોરના ૪ કલાકના અરસામાં અગમ્ય કારણસર આગ લાગી હતી, જે કોમ્પ્લેક્ષમાં આવેલી સદવિચાર હોસ્પિટલમાં પ્રસરી હતી. બનાવની જાણ ફાયર વિભાગને કરવામાં આવતા ફાયર ટીમો ઘટના સ્થળે પહોંચી ૧૨ દર્દીઓનું રેસ્ક્યૂ કરી અન્યત્ર ખસેડી બે કલાકની જહેમત બાદ આગને કાબૂમાં લીધી હતી. સદનસીબે આ બનાવમાં મોટી દુર્ઘટના ટળી છે.
શહેરના લીલાસર્કલ વિસ્તારમાં આવેલા આલેખ કોમ્પ્લેક્સના બેઝમેન્ટમાં આજે બપોરના ૪ કલાકના અરસમાં આગ ભભૂકી ઉઠી હતી. જે કોમ્પ્લેક્ષમાં આવેલી સદવિચાર હોસ્પિટલમાં પ્રસરતા દોડધામ મચી હતી. બનાવની જાણ ભાવનગર મહાનગરપાલિકાના ફાયર વિભાગને કરતા ફાયર વિભાગની હેડ અને પૂર્વ ઝોનલ કચેરીમાંથી કુલ ૪ ગાડીઓ ઘટના સ્થળે પહોંચી હતી. જ્યાં આગના કારણે હોસ્પિટલમાં ધુમાડો પ્રસરેલો હોય ફાયરની ટીમો દ્વારા હોસ્પિટલમાં એડમિટ ૧૦થી ૧૨ દર્દીઓનું રેસ્ક્યૂ કરી અન્યત્ર ખસેડયા હતા અને આશરે ૨૬ હજાર લીટર પાણીનો છંટકાવ કરી હોસ્પિટલમાં ધુમાડાનું વેન્ટીલેશન કરી બે કલાકની જહેમત બાદ આગને સંપૂર્ણ કાબુમાં લીધી હતી. આગના કારણે બેઝમેન્ટમાં પાર્ક થયેલા અમુક વાહનોને પણ નુકસાન પહોંચ્યું હોવાનું જાણવા મળ્યું છે. સદ્નસીબે સમયસર આગ કાબુમાં આવી જતાં મોટી દુર્ઘટના ટળી હતી. આલેખ કોમ્પ્લેક્સમાં હોસ્પિટલ ઉપરાંત લાઈબ્રેરી અને કોચિંગ ક્લાસિસ પણ આવેલા હોય આગની ઘટનાથી દોડધામ મચી હતી. જોકે આગનું કારણ સામે આવ્યું નથી.
