શહેરના રસ્તાઓ પર વધુ ધ્યાન કેન્દ્રિત થશે : લાઠી રોડ પર નવો ટાઉન હોલ બનાવવાનું આયોજન : શહેરી બ્યુટિફિકેશન, જિલ્લા કક્ષાનું ફાયર સ્ટેશન બનાવાશે
અમરેલી, : અમરેલી પાલિકાની કારોબારી સમિતિની બેઠકમાં વર્ષ 2026-27નું રૂ. 113 કરોડનું બજેટ રજૂ કરાતા તેને મંજૂર કરવામાં આવ્યું હતું. આ બજેટ રૂ. 9.31 લાખની પુરાંત સાથેનું છે. તેમાં રસ્તાના આધુનિકીકરણ પર ફોકસ થશે અને પ્રાથમિક સુવિધાઓ, આરોગ્ય સુખાકારીને કેન્દ્રમાં રાખીને સર્વાંગી વિકાસનો લક્ષ્યાંક રાખવામાં આવ્યો હોવાનો દાવો કરાયો છે.
ડિસ્ટ્રીક્ટ મિનરલ ફાઉન્ડેશનની યોજનાકીય ગ્રાન્ટમાંથી અંદાજે રૂ. 5 કરોડના ખર્ચે અલગ અલગ સ્થળોએ એલ.ઈ.ડી લાઈટીંગ પોલ, એન્ટ્રી લાઈટીંગ ગેટ, બોક્ષ કલ્વર્ટ, પાણીના બોર, અવેડા, આંગણવાડીઓને કંપાઉન્ડ વોલ, ઓક્સિજન પાર્ક, વૃક્ષારોપણ, સી.સી રોડ રસ્તા, તેમજ સ્પોર્ટ્સ લગત સુવિધાઓ વધશે. સરકારની ઓ.જી. ગ્રાન્ટ હેઠળ અંદાજે રૂ. 5 કરોડના ખર્ચે શહેરબાહ્ય વિસ્તારમાં રોડ રસ્તાના વિકાસકાર્યો, તેમજ ગૌરવપથ હેઠળની ગ્રાન્ટ અંતર્ગત રૂ. 5 કરોડના ખર્ચે શહેરના મુખ્ય 3 રસ્તાઓ સિવિલ હોસ્પિટલ રોડ, સેન્ટર પોઈન્ટથી મણીનગર રોડ, ભીડભંજન મહાદેવ મંદિરથી ચક્કરગઢ રોડ બાયપાસને આઈકોનિક રોડ બનાવવાની કામગીરી હાથ ધરવામાં આવશે. મુખ્યમંત્રી શહેરી સડક યોજના હેઠળ અંદાજિત રૂ. 5 કરોડના ખર્ચે શહેરના રોડ રસ્તાઓના વિકાસકામો પણ હાથ ધરવામાં આવશે. ઉપરાંત સ્ટોર્મ વોટર ડ્રેનેજની કામગીરી કરવામાં આવશે.
લાઠી રોડ પર નવો ટાઉનહોલ બનાવવાનું આયોજન થયું છે. સુંદર શહેર યોજના હેઠળ રૂ. 125 લાખના ખર્ચે રસ્તાઓના બ્યૂટીફિકેશનની કામગીરી પણ કરવામાં આવશે. જિલ્લાકક્ષાનું અદ્યતન ફાયર સ્ટેશન આકાર પામશે જેના થકી આગ લાગવાની આકસ્મિક ઘટનાઓ સમયે મદદ મળશે. બાયપાસ રોડ પર આવેલ રોકડીયા સરોવરને અમૃત સરોવર તરીકે વિકસિત કરવામાં આવશે. કારોબારી સમિતિની બેઠકમાં કારોબારી સમિતિ ચેરમેન સહિત સભ્યો ઉપસ્થિત રહ્યા હતા
