અમદાવાદ: શેરબજારમાં 20 ટકા રિટર્નની લાલચમાં યુવાને લાખો ગુમાવ્યા, ઠગોએ SEBIના બોગસ સર્ટિફિકેટ બતાવ્યા

Ahmedabad Cyber Crime: અમદાવાદ સહિત સમગ્ર રાજ્યમાં ઓનલાઈન ઇન્વેસ્ટમેન્ટ ફ્રોડની ઘટનાઓ અટકવાનું નામ નથી લઈ રહી. તાજેતરમાં વેજલપુર વિસ્તારમાં રહેતા અને એક જાણીતી ફાર્મા કંપનીમાં સીનિયર એક્ઝિક્યુટિવ તરીકે ફરજ બજાવતા 35 વર્ષીય યુવક સાથે 22 લાખ રૂપિયાની ઓનલાઈન છેતરપિંડી થઈ હોવાની ફરિયાદ સાયબર ક્રાઈમ પોલીસ સ્ટેશનમાં નોંધાઈ છે. ઠગોએ SEBIના નકલી સર્ટિફિકેટ બતાવી યુવકને વિશ્વાસમાં લીધો હતો.

વોટ્સએપ લિંકથી શરૂ થઈ છેતરપિંડીની જાળ

મૂળ મહારાષ્ટ્રના વતની અને હાલ અમદાવાદમાં સ્થાયી થયેલા સચિન કાકડેના મોબાઈલ પર ગત ફેબ્રુઆરી 2026માં એક અજાણ્યા નંબર પરથી મેસેજ આવ્યો હતો. આ મેસેજમાં 'F5 Indian Stock Market Investor Discussion Group' માં જોડાવાની લિંક હતી. સચિનભાઈ આ ગ્રૂપમાં જોડાયા બાદ જતીન શર્મા નામના એડમિને પોતાની ઓળખ 'વેલ્થ અલાયન્સ ગ્રૂપ'ના મેમ્બર તરીકે આપી શેરબજારમાં ટિપ્સ આપવાનું શરૂ કર્યું હતું.

નકલી એપ્લિકેશન અને બોગસ દસ્તાવેજોનો ખેલ

ઠગે સચિનભાઈને વધુ નફો કમાવવા માટે 'FARLY LLP' નામની એક શંકાસ્પદ એપ્લિકેશન ડાઉનલોડ કરાવી હતી. યુવકને શંકા ન જાય તે માટે ઠગોએ SEBI (સેબી) અને 'U.S. Securities and Exchange Commission'ના સિક્કાવાળા નકલી રજિસ્ટ્રેશન સર્ટિફિકેટ્સ મોકલી આપ્યા હતા. આ હાઈ-ટેક ડોક્યુમેન્ટ્સ જોઈને સચિનભાઈ વિશ્વાસમાં આવી ગયા હતા અને રોકાણ શરૂ કર્યું હતું.

2.49 કરોડ રૂપિયાનો આભાસી નફો અને છેતરપિંડી

સચિનભાઈએ શરૂઆતમાં કરેલા રોકાણ પર એપ્લિકેશનમાં 10થી 20 ટકા પ્રોફિટ દેખાડવામાં આવતો હતો. આ જોઈ તેમણે અલગ-અલગ બેન્ક ખાતાઓ દ્વારા કુલ 22 લાખ રૂપિયાનું રોકાણ કરી દીધું. થોડા સમય બાદ તેમના ટ્રેડિંગ એકાઉન્ટમાં 2.49 કરોડ રૂપિયાનો તોતિંગ નફો દેખાવા લાગ્યો હતો. જોકે, જ્યારે તેમણે આ રકમ ઉપાડવાનો પ્રયત્ન કર્યો, ત્યારે ઠગોએ ટેક્સના નામે વધુ 30,74,861 રૂપિયાની માંગણી કરી હતી. આ સમયે સચિનભાઈને પોતાની સાથે છેતરપિંડી થઈ હોવાનો અહેસાસ થયો હતો.

પોતાની મહેનતના 22 લાખ રૂપિયા ગુમાવ્યા બાદ સચિન કાકડેએ તાત્કાલિક અમદાવાદ સાયબર ક્રાઈમ પોલીસ સ્ટેશનનો સંપર્ક કર્યો હતો. પોલીસે આ મામલે ગુનો નોંધી જે બેન્ક ખાતાઓમાં રકમ ટ્રાન્સફર થઈ છે તેની વિગતો મેળવી ઠગો સુધી પહોંચવા તપાસના ચક્રો ગતિમાન કર્યાં છે.