ઘરફોડ ચોરી, ચેઇન સ્નેચીંગ, વાહન ચોરીના ગુનાઓ આચરાનાર રીઢો આરોપી ઝડપાયો

ઘરફોડ ચોરી, ચેઇન સ્નેચીંગ, વાહન ચોરીના ગુનાઓ આચરાનાર રીઢા આરોપીને સોના ચાંદિના દાગીના, રોકડ રકમ સાથે શહેર ક્રાઈમ બ્રાન્ચની ટીમે દબોચી લીધો હતો.

શહેર ક્રાઇમ બ્રાન્ચની ટીમે બાતમીના આધારે મિલકત સબંધી ગુનાઓમાં સંડોવાયેલ આરોપીઓની ગુનાહિત પ્રવૃતિ ઉપર સતત વોચ અને તપાસ કરતી હતી. દરમ્યાન ઘરફોડ ચોરીના ગુનાઓ આચરનાર રીઢો ચોર અજય દર્શનસિંગ દુધાણીનો ગુનો આચરી સોનાની ચેઇન મેળવી આ સોનાની ચેઇન વેચી નાખવાની ફિરાકમાં હોવાની માહિતી આધારે ટીમે વારસીયા ધોબી તળાવથી ઇસમ અજય દર્શનસિંગ દુધાણી (સિક્લીગર) (રહે, વારસીયા, વિમા દવાખાના)ને સોનાની ચેઇન, રોકડા રૂ.7,500 અને મોબાઇલ ફોન સાથે શોધી કાઢી તેની પાસેના સોનાની ચેઇન, મોબાઇલ ફોનનુ બીલ તેમજ રોકડ રકમ બાબતે પુછપરછ કરતા તેણે સંતોષકારક જવાબ નહી આપતા  ઇસમની પુછપરછ કરતા તેણે સાગરીતો સાથે સવા મહિના પહેલા દંતેશ્વર ખાતે વહેલી સવારના સમયે એક વૃધ્ધ મહિલાના ગળામાંથી તોડી લાવેલ હોવાની તેમજ રોકડ રકમ સમા વિસ્તારમાંથી કરેલ ઘરફોડ ચોરીના ગુનામાં પોતાના ભાગમા આવેલ પૈકીની બચેલ રોકડ રકમ હોવાનુ જણાવ્યું હતું. તેમજ પ્રતાપનગર રેલ્વે કોલોની ખાતે રાત્રીના સમયે બંધ મકાનમાં ઘરફોડ ચોરી અને ફતેગંજ બ્રિજ નિચેથી ચોરી કરેલ વાહનના ગુનામાં સંડોવાયેલ અને નાસતો ફરતો હોવાનુ કબુલાત કરી હતી. આ સિવાય પોલીસ ધરપકડથી નાસતા ફરતા રહેવાના સમય દરમ્યાન અન્ય સાગરીત રાજાસિંગ ટાંક અને કમલસિંગ સિસોદીયા સાથે હાલોલ ખાતેના બે બંધ મકાનોમાંથી ચોરી કરેલ જે પૈકી ચાંદિના કડા, તેના ભાગમાં આવેલ પાંચ નંગ કડા રજુ કરતા ક્રાઇમ બ્રાન્ચે ઇસમ પાસેથી મળી આવેલ મુદ્દામાલ ચોરીનો હોય કબ્જે કર્યો હતો. પકડાયેલ આરોપીએ જણાવેલ હકિકત આધારે ખાત્રી તપાસ કરતા સમા, ફતેગંજ, મકરપુરા પોલીસ સ્ટેશનના ગુનામાં નાસતો ફરતો હોય તેમજ હાલોલ પોલીસ સ્ટેશનમાં અજાણ્યા ચોર સામે ઘરફોડ ચોરીનો ગુનો રજીસ્ટર થયેલ હોય જેથી આ તમામ પોલીસ સ્ટેશન ખાતે જાણ કરી આગળની તપાસ તજવીજ માટે લાગુ પડતા પોલીસ મથકને સોંપવા માટેની તજવીજ હાથ ધરવામાં આવેલ છે.