ગુજરાત પોલીસમાં પ્રથમવાર મોટો નિર્ણય: પતિ-પત્ની હોય તેવા 415 પોલીસ કર્મચારીઓની એકસાથે એક જ જિલ્લામાં બદલી

Gujarat Police Transfer: ગુજરાત રાજ્ય પોલીસ વિભાગના ઇતિહાસમાં પ્રથમ વખત એક અત્યંત સંવેદનશીલ અને ઐતિહાસિક નિર્ણય લેવામાં આવ્યો છે. રાજ્યના પોલીસ મહાનિર્દેશક (DGP) જ્ઞાનેન્દ્રસિંહ મલિકે પોલીસ કર્મચારીઓની પારિવારિક સ્થિતિ અને દાંપત્ય જીવનની ગંભીરતાને ધ્યાનમાં રાખીને એકસાથે 415 પોલીસ કર્મચારીઓની 'પતિ-પત્ની કેસ' અંતર્ગત સ્વવિનંતીથી બદલી કરી આપી છે.

ફરજ સાથે પરિવારનું જતન: 6 કેડરના કર્મચારીઓને મળ્યો લાભ

પોલીસ ખાતામાં નિષ્ઠાપૂર્વક ફરજ બજાવતા કર્મચારીઓને ઘણીવાર પોતાના પરિવારથી દુર રહેવાની નોબત આવતી હોય છે. ખાસ કરીને પતિ અને પત્ની બંને સરકારી સેવામાં હોય ત્યારે અલગ-અલગ જિલ્લા કે એકમમાં ફરજ બજાવવાના કારણે સંતાનોનું પાલન-પોષણ અને અન્ય પારિવારિક જવાબદારીઓ નિભાવવામાં ભારે મુશ્કેલીઓ પડતી હતી. રાજ્ય પોલીસ વડાએ આ તમામ બાબતોને અત્યંત સંવેદનશીલતાથી ધ્યાને લઈ બદલીની મંજૂરી આપી છે.

બદલી પામેલા 415 કર્મચારીઓનું માળખું:

બિનહથિયારી અને હથિયારી ASI: 27
બિનહથિયારી અને હથિયારી હેડ કોન્સ્ટેબલ: 33
બિનહથિયારી પોલીસ કોન્સ્ટેબલ: 226
હથિયારી પોલીસ કોન્સ્ટેબલ: 129

પોલીસ બેડામાં ખુશીનો માહોલ

રાજ્ય પોલીસ વડાના આ પ્રશંસનીય નિર્ણયથી પોલીસ કર્મચારીઓ હવે પોતાની કઠિન ફરજ અને પરિવાર વચ્ચે વધુ સારું સંતુલન જાળવી શકશે. પરિવાર નજીક આવવાથી કર્મચારીઓના મનોબળમાં વધારો થશે અને તેઓ વધુ ઉત્સાહથી કાયદો અને વ્યવસ્થાની ફરજ નિભાવી શકશે, જેને લઈને સમગ્ર પોલીસ બેડામાં ભારે આનંદની લાગણી જોવા મળી રહી છે.

પ્રમુખ શહેરો અને જિલ્લા આવરી લેવાયા

જાહેર કરાયેલા આદેશમાં અમદાવાદ, સુરત, વડોદરા અને રાજકોટ જેવા મહાનગરો ઉપરાંત ભાવનગર, ગાંધીનગર, મહેસાણા, બનાસકાંઠા, પાટણ, સાબરકાંઠા, દાહોદ, પંચમહાલ, ભરૂચ, નવસારી, વલસાડ અને જૂનાગઢ સહિતના જિલ્લા એકમોનો સમાવેશ થાય છે. કેટલાક કર્મચારીઓને શહેરી વિસ્તારમાંથી ગ્રામ્યમાં અને ગ્રામ્ય વિસ્તારમાંથી શહેરોમાં નવી ફરજ સોંપવામાં આવી છે.

તાત્કાલિક હાજર થવા અને નિયમોની કડક સૂચના

•નિયત સમયમાં હાજરી: બદલી પામેલા તમામ કર્મચારીઓએ નવી જગ્યાએ નિયત સમયમર્યાદામાં હાજર થવાનું રહેશે.
•પરત બદલીની મનાઈ: નવી ફરજ સંભાળ્યા બાદ તુરંત જૂની જગ્યાએ પરત બદલી માટેની રજૂઆત સ્વીકારવામાં આવશે નહીં.
•તપાસ હેઠળના કર્મચારીઓ: જે કર્મચારીઓ સામે વિભાગીય તપાસ કે ગંભીર ગુનાની તપાસ ચાલુ હોય, તેમના માટે આદેશમાં ખાસ શરતો મૂકવામાં આવી છે.

બદલી પામેલા કર્મચારીઓની યાદી