Jolly LLB 3: બોલિવૂડ અભિનેતા અક્ષય કુમાર અને અરશદ વારસીની આગામી ફિલ્મ 'જોલી એલએલબી 3' રિલીઝ પહેલાં જ કાયદાકીય મુશ્કેલીઓમાં ફસાયેલી દેખાઈ રહી છે. આ ફિલ્મના વિરુદ્ધ દાખલ કરાયેલી એક અરજીના સંબંધમાં પુણેની સિવિલ કોર્ટે અક્ષય કુમાર અને અરશદ વારસીને કોર્ટમાં હાજર થવા જણાવ્યું છે. ફિલ્મ 19 સપ્ટેમ્બરે રિલીઝ થવાની છે.
ટીઝરમાં વકીલ અને જજનું અપમાન થયાનો આરોપ
વકીલ વાજેદ ખાન (બિડકર) અને ગણેશ મ્હસ્કેએ એક અરજી દાખલ કરીને આરોપ લગાવ્યો છે કે ફિલ્મના ટીઝરમાં વકીલો અને જજોને અપમાનજનક રીતે બતાવવામાં આવ્યા છે. તેમણે દાવો કર્યો છે કે ક્રિએટિવિટીની સ્વતંત્રતાના નામે અભિનેતાઓ અને ફિલ્મ નિર્માતાઓએ અશ્લીલ રમૂજનો ઉપયોગ કરીને કાનૂની વ્યવસાયની મજાક ઉડાવી છે. આ મામલાને ધ્યાનમાં લેતા, 12મા જુનિયર ડિવિઝનના સિવિલ જજ જે.જી.પવારે અભિનેતાઓ અને ફિલ્મના નિર્માતાઓને સમન્સ મોકલીને 28 ઓગસ્ટે કોર્ટમાં હાજર રહેવાનો નિર્દેશ આપ્યો છે. આ ઉપરાંત, અરજદારોએ ફિલ્મની રિલીઝ પર રોક લગાવવાની પણ માગણી કરી છે.
અરજદાર વકીલોએ શું કહ્યું?
મીડિયા રિપોર્ટ્સ અનુસાર વકીલ વાજેદ ખાને જણાવ્યું, 'આ ફિલ્મમાં બધા વકીલો જજોને 'મામુ' કહે છે. આ ન્યાયપાલિકાનું અપમાન છે.' અરજદાર વકીલોમાંથી એકે આગળ કહ્યું, 'આ ઉપરાંત, વકીલોને કોર્ટમાં એવી રીતે દલીલો કરતા બતાવવામાં આવ્યા છે જાણે કોઈ પારિવારિક ઝઘડો હોય. ભલે આ વ્યંગાત્મક હોય, પરંતુ આ આખી કાનૂની સમુદાય માટે અપમાનજનક છે.'
આ પણ વાંચો: Coolie Box Office: રૂ.400 કરોડનું બજેટ 7 જ દિવસમાં વસૂલ! વોર-2 પણ પછડાઈ
જોલી એલએલબી 3 ક્યારે રિલીઝ થશે?
ગયા અઠવાડિયે, મેકર્સે અક્ષય કુમાર અને અરશદ વારસી સ્ટારર આગામી ફિલ્મ જોલી એલએલબી 3નું ટીઝર રિલીઝ કર્યું હતું. સુભાષ કપૂર દ્વારા લિખિત અને નિર્દેશિત, અને આલોક જૈન તથા અજીત અંધારે દ્વારા નિર્મિત, આ ફિલ્મમાં અક્ષય કુમાર અને અરશદ વારસી ઉપરાંત સૌરભ શુક્લા, હુમા કુરેશી, અમૃતા રાવ અને ગજરાજ રાવ પણ છે. આ ફિલ્મ 19 સપ્ટેમ્બરે મોટા પડદા પર રિલીઝ થશે.
