નોરા ફતેહીની મુશ્કેલીઓ વધી: 200 કરોડના વસૂલી કેસમાં કોર્ટમાં હાજર થવા સમન્સ મોકલાયું!

Nora Fatehi Summoned Sukesh Chandrashekhar Extortion Case: બોલિવૂડ એક્ટ્રેસ નોરા ફતેહી માટે મુશ્કેલીઓ વધતી દેખાઈ રહી છે. ઠગ સુકેશ ચંદ્રશેખર સાથે જોડાયેલા રૂપિયા 200 કરોડના મની લોન્ડરિંગ અને વસૂલી કેસમાં એક્ટ્રેસ સામે સમન જારી કરવામાં આવ્યું છે. દિલ્હીની રાઉઝ એવન્યુ કોર્ટે નોરા ફતેહીને આ કેસમાં સરકારી સાક્ષી તરીકે કોર્ટમાં હાજર થવા સમન મોકલ્યું છે. એક્ટ્રેસને 2 નવેમ્બર 2026ના રોજ કોર્ટ સમક્ષ હાજર થવું પડશે. આ મામલે એક્ટ્રેસ તરફથી હજુ સુધી કોઈ સત્તાવાર નિવેદન સામે આવ્યું નથી.

સરકારી સાક્ષી બની એક્ટ્રેસ

સમાચાર એજન્સી ANIના જણાવ્યા અનુસાર, આ કેસમાં દાખલ કરવામાં આવેલી ત્રીજી સપ્લીમેન્ટ્રી ચાર્જશીટમાં નોરા ફતેહીનું નામ સાક્ષી તરીકે સામેલ કરવામાં આવ્યું છે. નોરા ફતેહી આ કેસમાં પોતાને પીડિત ગણાવી ચૂકી છે, અને સુકેશ સાથેના અફેરના દાવાઓને ફગાવી ચૂકી છે. તેણે તાજેતરમાં જ એક પોડકાસ્ટમાં સ્પષ્ટતા કરી હતી કે, સુકેશ અને તેની પત્નીએ તેને કેટલાક મોંઘા ગિફ્ટ આપ્યા હતા, પરંતુ તે સમયે તેને સુકેશની અસલિયત ખબર નહોતી.

શું છે સમગ્ર મામલો?

જેલમાં બંધ ઠગ સુકેશ ચંદ્રશેખર પર 200 કરોડ રૂપિયાની ઠગાઈ કરવાનો આરોપ છે. આ કેસમાં બોલિવૂડ એક્ટ્રેસ જેક્લિન ફર્નાન્ડિસનું નામ પણ ચર્ચામાં રહ્યું છે. અહેવાલો મુજબ, જેક્લિને પણ આ કેસમાં સરકારી સાક્ષી બનવાની અપીલ કરી છે.