અમેરિકામાં ઝડપાયો લોરેન્સ બિશ્નોઈનો સાગરિત હેરી બોક્સર, રોહિત શેટ્ટીના ઘર પર કરાવ્યું હતું ફાયરિંગ

Harry Boxer Arrested In USA : લોરેન્સ બિશ્નોઈ ગેંગ સાથે જોડાયેલા ગેંગસ્ટર હેરી બોક્સરની અમેરિકામાં અટકાયત કરવામાં આવી છે. હેરી બોક્સર અમેરિકામાં બેસીને લોરેન્સ ગેંગની ગુનાઇત પ્રવૃત્તિઓ ચલાવતો હોવાનો આરોપ છે. ફિલ્મ નિર્દેશક રોહિત શેટ્ટીના મુંબઈના જુહુ સ્થિત ઘર બહાર થયેલા ફાયરિંગની જવાબદારી પણ તેણે લીધી હતી. આ ઉપરાંત બોલિવૂડની અનેક હસ્તીઓને ધમકીભર્યા ઓડિયો મોકલવામાં પણ તેનું નામ સામે આવ્યું હતું. અમેરિકાની એજન્સી ICEએ કેલિફોર્નિયામાંથી તેની અટકાયત કરી છે.

હેરી બોક્સર પર હત્યા અને ખંડણી સહિતના અનેક ગંભીર ગુનાના કેસ નોંધાયેલા છે. તે વિદેશમાં રહીને ભારતમાં લોરેન્સ બિશ્નોઈ ગેંગની પ્રવૃત્તિઓ ચલાવતો હોવાનો આરોપ છે. તેની અટકાયતને વિદેશમાં બેસીને ભારતમાં ગુનાહિત પ્રવૃત્તિઓ ચલાવતા ગેંગસ્ટરો સામેની કાર્યવાહીનો મહત્ત્વપૂર્ણ ભાગ માનવામાં આવે છે.

હિમાશુ ભાઉ અને નીરજ ફરીદપુરિયાની પણ અટકાયત

હેરી બોક્સર પહેલાં ગેંગસ્ટર હિમાશુ ભાઉ અને નીરજ ફરીદપુરિયાની પણ અમેરિકામાં અટકાયત કરવામાં આવી હતી. આ બંને પણ ભારતમાં અનેક ગુનાહિત કેસોમાં વોન્ટેડ હોવાનું જણાવાયું છે. વિદેશમાં રહીને ભારતમાં ગુનાહિત નેટવર્ક ચલાવતા ગેંગસ્ટરો સામે એજન્સીઓ કાર્યવાહી કરી રહી છે. હવે હેરી બોક્સરની અટકાયતથી આ દિશામાં વધુ એક મહત્ત્વપૂર્ણ કાર્યવાહી થઈ છે.

રોહિત શેટ્ટીના ઘર બહાર અનેક રાઉન્ડ ફાયરિંગ થયું હતું

ફિલ્મ નિર્દેશક રોહિત શેટ્ટીના મુંબઈના જુહુ સ્થિત ઘર બહાર 1 ફેબ્રુઆરી 2026ની મોડી રાત્રે ફાયરિંગ થયું હતું. હુમલાખોરે શેટ્ટી ટાવરની બહાર અનેક રાઉન્ડ ગોળીબાર કર્યો હતો. ઘટના સમયે રોહિત શેટ્ટી પોતાના ઘરમાં જ હાજર હતા. જોકે, આ ઘટનામાં કોઈને ઈજા થઈ નહોતી.

ફાયરિંગની ઘટના બાદ સોશિયલ મીડિયા પર એક પોસ્ટ સામે આવી હતી. તેમાં શુભમ લોનકર, આરઝૂ બિશ્નોઈ, હેરી બોક્સર અને હરમન સંધુએ હુમલાની જવાબદારી લેવાનો દાવો કર્યો હતો. પોસ્ટમાં રોહિત શેટ્ટીને ધમકી પણ આપવામાં આવી હતી. અગાઉ ચેતવણી આપવા છતાં તેને ગંભીરતાથી ન લીધી હોવાનો ઉલ્લેખ કરીને ભવિષ્યમાં વધુ મોટી ઘટનાને અંજામ આપવાની ધમકી આપવામાં આવી હતી.

ઘટના બાદ મુંબઈ પોલીસે તપાસ શરૂ કરી હતી. ક્રાઇમ બ્રાન્ચે પણ તપાસ હાથ ધરીને આસપાસના CCTV ફૂટેજ તપાસ્યા હતા. તપાસમાં સામે આવ્યું હતું કે હુમલાખોર બાઇક પર આવ્યો હતો અને ત્યારબાદ પગપાળા શેટ્ટી ટાવર સુધી પહોંચ્યો હતો. ત્યાં ફાયરિંગ કર્યા બાદ તે ફરાર થઈ ગયો હતો. પોલીસે આ કેસમાં અનેક આરોપીઓની ધરપકડ પણ કરી હતી.

રણવીર સિંહને પણ મોકલ્યા હતા ધમકીભર્યા ઓડિયો

ફેબ્રુઆરી 2026માં રોહિત શેટ્ટી અને અભિનેતા રણવીર સિંહને ધમકીભર્યા ઓડિયો મેસેજ મોકલવામાં આવ્યા હોવાની ઘટના સામે આવી હતી. આ ઓડિયોમાં બંનેને ગંભીર પરિણામો ભોગવવાની ચેતવણી આપવામાં આવી હતી. મેસેજ મોકલનારે પોતાની ઓળખ હેરી બોક્સર તરીકે આપી હતી. મુંબઈ પોલીસ આ ઓડિયો મેસેજની તપાસ કરી રહી હતી. તેમાં અવાજ ખરેખર હેરી બોક્સરનો હતો કે પછી ટેક્નોલોજીની મદદથી તૈયાર કરવામાં આવ્યો હતો તે દિશામાં પણ તપાસ હાથ ધરવામાં આવી હતી. હવે અમેરિકામાં હેરી બોક્સરની અટકાયત થતાં આ મામલો ફરી ચર્ચામાં આવ્યો છે.