બોલિવૂડમાં નવો વિવાદ: હવે તાપસી પન્નુ પર ભડકી કંગના, ઈન્સ્ટાગ્રામ પર માતા-પિતા સુધી પહોંચી ગઈ વાત!

બૉલીવુડમાં અભિનેત્રી અને સાંસદ કંગના તેમજ તાપસી પન્નુ વચ્ચેનો જૂનો વિવાદ ફરી એકવાર ચર્ચામાં આવ્યો છે. તાપસી પન્નુએ તાજેતરમાં આપેલા એક ઇન્ટરવ્યુમાં જણાવ્યું હતું કે વર્ષોથી ચાલી રહેલી જાહેરમાં ખેંચતાણ છતાં તે ક્યારેય અંગત રીતે કંગનાને મળી નથી. આ સાથે જ તાપસીએ 'સંસ્કાર'નો ઉલ્લેખ કરતાં કંગના રણૌતે સોશિયલ મીડિયા પર અત્યંત આકરા શબ્દોમાં વળતો પ્રહાર કર્યો છે અને ફરી એકવાર 'સસ્તી કૉપી' વાળો જૂનો વિવાદ જીવંત બન્યો છે.

કંગના રણૌતનો ઈન્સ્ટાગ્રામ પર આકરો પલટવાર

તાપસીની ટિપ્પણીઓ સામે આવ્યા બાદ કંગના રણૌતે પોતાની ઇન્સ્ટાગ્રામ સ્ટોરી પર ગુસ્સો વ્યક્ત કરતા લખ્યું હતું:

એક સસ્તી કૉપી તેની આગામી B-ગ્રેડ ફિલ્મ સાથે બહાર આવી ગઈ છે, પરંતુ હંમેશની જેમ મીડિયા માટે હેડલાઇન બનાવવાનો એકમાત્ર પોઇન્ટ કંગના રણૌત જ છે. આજે તેણે બેશરમીથી મારા સંસ્કાર અને માતા-પિતાની મજાક ઉડાવીને તમામ હદો વટાવી દીધી છે. મને લાગે છે કે તમામ માતા-પિતા તેમનાથી બનતા શ્રેષ્ઠ પ્રયાસો કરે છે અને હું ક્યારેય કોઈના માતા-પિતાને કોઈ વિવાદમાં વચ્ચે લાવતી નથી. પરંતુ આજે હું પણ તેના માતા-પિતાને પૂછવા માગું છું કે મારા માતા-પિતાની જેમ તેઓ કોઈ ઓરિજિનલ સંતાનને જન્મ કેમ ન આપી શક્યા? શા માટે એક સસ્તી કૉપી? તમારા પ્રયાસો માટે દયા આવે છે.

તાપસી પન્નુએ ઇન્ટરવ્યુમાં શું કહ્યું હતું?

એક ઇન્ટરવ્યુમાં તાપસીને પૂછવામાં આવ્યું કે શું તેણે અને કંગનાએ જૂના મતભેદો ઉકેલી લીધા છે? ત્યારે તાપસીએ સ્પષ્ટતા કરતા કહ્યું હતું:

હું તેને મળી નથી. જ્યારે આ કહેવાતા મુદ્દાઓ શરૂ થયા ત્યારે પણ હું તેને નહોતી મળી અને અત્યારે પણ હું તેને મળી નથી. તેના વિશેનો મારો અભિપ્રાય મારા સંસ્કાર, મારી વાત કરવાની રીત અને બાબતોને સમજવાના મારા દ્રષ્ટિકોણને દર્શાવે છે અને તેનો અભિપ્રાય તેના દ્રષ્ટિકોણને. તે તેના વિચારો પર અડગ છે. તેથી મને લાગે છે કે લોકો માટે એ જોઈને નક્કી કરવા માટે પૂરતું છે કે કોણ ક્યાંથી આવે છે.

'સસ્તી કૉપી' અને નેપોટિઝમ વિવાદનો ભૂતકાળ (2019-2020)

કંગના અને તાપસી વચ્ચેનો જાહેરમાં વિવાદ સૌપ્રથમ વર્ષ 2019માં શરૂ થયો હતો:

• વર્ષ 2019માં જ્યારે તાપસીએ ફિલ્મ 'જજમેન્ટલ હૈ ક્યા'ના ટ્રેલરના વખાણ કર્યા હતા, પરંતુ તેમાં કંગનાનું નામ નહોતું લીધું, ત્યારે કંગનાની બહેન રંગોલી ચંદેલે તાપસી પર કંગનાની નકલ કરવાનો આરોપ લગાવી તેને "સસ્તી કૉપી" કહી હતી.
• તે સમયે તાપસીએ જણાવ્યું હતું કે તે કાદવ ઉછાળવાની રમતમાં પડવા માંગતી નથી.
• ત્યારબાદ વર્ષ 2020માં નેપોટિઝમ અને હિન્દી ફિલ્મ ઇન્ડસ્ટ્રીમાં આઉટસાઇડર્સ સાથે થતા વર્તનની ચર્ચા દરમિયાન કંગનાએ તાપસી પન્નુ અને સ્વરા ભાસ્કરને "B-ગ્રેડ અભિનેત્રીઓ" તેમજ "ગરજવાન આઉટસાઇડર્સ" કહ્યા હતા.
• તાપસીએ તે સમયે જવાબ આપ્યો હતો કે આઉટસાઇડર્સે એકબીજાની સામે લડવું ન જોઈએ અને મૂળ મુદ્દો ઇન્ડસ્ટ્રીમાં વધુ સારી સિસ્ટમ ઊભી કરવાનો છે.

રાજકારણમાં પ્રવેશ અંગે તાપસી પન્નુનો ખુલાસો

આ જ ઇન્ટરવ્યુમાં જ્યારે તાપસીને રાજકારણમાં જોડાવા અંગે પ્રશ્ન પૂછવામાં આવ્યો ત્યારે તેણે જણાવ્યું હતું:

હું આ ક્ષેત્ર માટે ખૂબ જ પ્રામાણિક અને સંવેદનશીલ છું. ઉપરાંત, હું હજુ થોડી વધુ ફિલ્મો કરવા માંગુ છું. હું રાજકારણમાં જોડાવા અંગે બિલકુલ વિચારતી નથી અને મારામાં તે પ્રકારનું DNA પણ નથી.

તાપસીએ ઉમેર્યું હતું કે રાજકીય મુદ્દાઓમાં તેનો રસ એક શિક્ષિત નાગરિક તરીકે બોલવા પૂરતો છે, કોઈ રાજકીય દ્રષ્ટિકોણથી નહીં.