એવી અભિનેત્રી જેણે 1 વર્ષમાં 8 બ્લૉક બસ્ટર ફિલ્મો આપી, શ્રી દેવી-માધુરી પણ રેકોર્ડ તોડી ના શકી

Raveena Tandon Journey From Intern To Star: બોલિવૂડ ફિલ્મ ઇન્ડસ્ટ્રીમાં પોતાની ઓળખ બનાવવી ક્યારેય સરળ હોતી નથી. અહીં એક તક મેળવવા માટે કલાકારોએ લાંબો સંઘર્ષ કરવો પડે છે. 90ના દાયકાની મશહૂર અભિનેત્રી રવીના ટંડનની સફર પણ કંઈક આવી જ રહી છે. કારકિર્દીની શરૂઆતમાં સ્ટુડિયોનું ફ્લોરિંગ સાફ કરનારી રવીના આજે હિન્દી સિનેમાની દિગ્ગજ અભિનેત્રીઓમાં ગણાય છે. 26 ઓક્ટોબરે પોતાનો 54મો જન્મદિવસ ઉજવનારી રવીનાએ પોતાના કરિયરમાં ઘણી યાદગાર અને બ્લોકબસ્ટર ફિલ્મો આપી છે.

સ્ટુડિયોમાં સફાઈ કામથી લઈને મોડેલિંગની શરૂઆત

રવીના ટંડને પોતાના શરૂઆતના દિવસોના સંઘર્ષ વિશે ખુલીને વાત કરી હતી. તેણે જણાવ્યું હતું કે 10મું ધોરણ પાસ કર્યા પછી તરત જ તેણે જાણીતા જાહેરાત નિર્માતા પ્રહલાદ કક્કડને આસિસ્ટ કરવાનું શરૂ કર્યું હતું. તે દરમિયાન ઇન્ટર્નશિપ કરતી વખતે તેણે સ્ટુડિયોના ફ્લોર પર પોતા મારવાથી લઈને ઉલટી સાફ કરવા સુધીનાં કામો પણ કર્યાં હતાં.

સેટ પર જ્યારે પણ કોઈ મોડેલ સમયસર ન પહોંચતી, ત્યારે પ્રહલાદ કક્કડ રવીનાને જ મેકઅપ કરાવીને પોઝ આપવા માટે કહેતા. આ જોઈને રવીનાએ વિચાર્યું કે મફતમાં કામ કરવાને બદલે કેમ ન આ કામ દ્વારા પોકેટ મની કમાઈ લેવામાં આવે. બસ, આ જ વિચારથી તેની મોડેલિંગ કરિયરની શરૂઆત થઈ હતી. રવીનાના મતે, તેનું એક્ટ્રેસ બનવાનું કોઈ પૂર્વ આયોજન નહોતું, પરંતુ તેઓ સંજોગોવશાત આ ઇન્ડસ્ટ્રીમાં આવી ગયાં હતાં.

1 જ વર્ષમાં 8 સુપરહિટ ફિલ્મો આપવાનો અનોખો રેકોર્ડ

રવીના ટંડન બોલિવૂડની એકમાત્ર એવી અભિનેત્રી છે જેણે એક જ કેલેન્ડર વર્ષમાં 8 બ્લોકબસ્ટર ફિલ્મો આપીને ઇતિહાસ રચી દીધો હતો. વર્ષ 1994માં રવીના ટંડનની એક પછી એક 'મોહરા', 'લાડલા', 'દિલવાલે', 'આતિશ' અને 'અંદાઝ અપના અપના' જેવી ફિલ્મો રિલીઝ થઈ હતી. આ વર્ષમાં રવીનાએ બોક્સ ઓફિસ પર ધૂમ મચાવીને એક જ વર્ષમાં કુલ 8 સુપરહિટ ફિલ્મો આપી હતી. બોલિવૂડમાં આટલી મોટી સંખ્યામાં એક જ વર્ષમાં હિટ ફિલ્મો આપવાનો આ ઐતિહાસિક રેકોર્ડ શ્રીદેવી કે માધુરી દીક્ષિત જેવી સુપરસ્ટાર અભિનેત્રીઓ પણ તોડી શકી નહોતી.

શાહરુખ ખાન અને અજય દેવગનની ફિલ્મો નકારી હતી

મોડેલિંગના દિવસોમાં જ રવીનાને ફિલ્મોની મોટી ઓફરો મળવા લાગી હતી, પરંતુ કેટલાક સીન્સને લઈને અસહજ હોવાને કારણે તેણે મોટા સ્ટાર્સની ફિલ્મો પણ ઠુકરાવી દીધી હતી:

● ફિલ્મ 'ડર': યશ ચોપડાની બ્લોકબસ્ટર ફિલ્મ 'ડર' માટે પહેલી પસંદ રવીના ટંડન જ હતી. બાદમાં આ રોલ જૂહી ચાવલાએ કર્યો હતો. રવીનાએ સ્વિમિંગ કોસ્ચ્યુમ પહેરવા જેવા દ્રશ્યોમાં કમ્ફર્ટેબલ ન હોવાને કારણે આ ફિલ્મ કરવાની સ્પષ્ટ ના પાડી દીધી હતી.

● ફિલ્મ 'પ્રેમ કૈદી': કરિશ્મા કપૂરની ડેબ્યૂ ફિલ્મ 'પ્રેમ કૈદી'ની ઓફર પણ સૌપ્રથમ રવીના પાસે આવી હતી, પરંતુ એક ખાસ સીનને કારણે તેણે આ ઓફર પણ નકારી હતી.

● ફિલ્મ 'ફૂલ ઔર કાંટે': અજય દેવગનની પ્રથમ હિટ ફિલ્મ 'ફૂલ ઔર કાંટે' પણ રવીનાએ જતી કરી હતી, કારણ કે તે સમયે તેઓ એક્ટિંગમાં આગળ વધવું કે નહીં તે અંગે દ્વિધામાં હતાં.

સલમાન ખાન સાથે ડેબ્યૂ અને ફિલ્મફેર એવોર્ડ

અંતે રવીના ટંડને વર્ષ 1991માં આવેલી ફિલ્મ 'પત્થર કે ફૂલ'થી સલમાન ખાન સાથે બોલિવૂડમાં શાનદાર ડેબ્યૂ કર્યું હતું. તેના મિત્ર અને મોડેલ બંટી વાલિયાએ સલમાન ખાનને રવીના વિશે જણાવ્યું હતું કારણ કે સલમાન પોતાની ફિલ્મ માટે નવા ચહેરાની શોધમાં હતા. સલમાને તેનું કામ જોયું અને તેને ફિલ્મ માટે ફાઇનલ કરી લીધી.

પોતાની ડેબ્યૂ ફિલ્મ 'પત્થર કે ફૂલ' માટે રવીનાએ 'બેસ્ટ ફીમેલ ડેબ્યૂ'નો ફિલ્મફેર એવોર્ડ જીત્યો હતો. ત્યાર બાદ તેણે 'મોહરા', 'દિલવાલે', 'અંદાઝ અપના અપના', 'ખિલાડીયોં કા ખિલાડી', 'દૂલ્હે રાજા', 'શૂલ', 'દમન', 'અક્સ' અને 'KGF: ચેપ્ટર 2' જેવી અનેક સુપરહિટ ફિલ્મોમાં ઉત્કૃષ્ટ અભિનય આપ્યો છે.