શેરોન વર્મા સાથે ડેટિંગની અફવાઓ પર સમય રૈનાએ તોડ્યું મૌન; જુઓ શું જવાબ આપ્યો

Is Samay Raina Dating Sharon Verma? સ્ટેન્ડ-અપ કોમેડિયન સમય રૈના અત્યારે તેના લોકપ્રિય શો 'ઇન્ડિયાઝ ગોટ લેટેન્ટ'ની બીજી સીઝનને કારણે સતત ચર્ચામાં છે. તાજેતરમાં જ આ શોમાં સીઝન 1ની કન્ટેસ્ટન્ટ અને કોમેડિયન શેરોન વર્મા પેનલિસ્ટ તરીકે જોવા મળી હતી. શો દરમિયાન સમય અને શેરોન વચ્ચે થયેલી મજેદાર વાતચીત બાદ ફેન્સ આ બંને ડેટ કરી રહ્યા હોવાની અટકળો લગાવી રહ્યા હતા. જોકે, હવે સમય રૈનાએ આ અફવાઓ પર પોતાની પ્રતિક્રિયા આપીને સ્પષ્ટતા કરી દીધી છે.

શેરોન વર્મા સાથે ડેટિંગનો સમય રૈનાએ કર્યો ઇનકાર

બુધવારે સમય રૈનાએ ઇન્સ્ટાગ્રામ પર ચાહકો સાથે 'આસ્ક મી એનીથિંગ' (AMA) સેશન યોજ્યું હતું. આ દરમિયાન તેણે ફેન્સને માત્ર 'સાચા અને યોગ્ય પ્રશ્નો' જ પૂછવા જણાવ્યું હતું. ત્યારે એક ચાહકે તેને સીધો જ સવાલ પૂછ્યો કે શું તે શેરોન વર્માને ડેટ કરી રહ્યો છે? આ સવાલનો સીધો જવાબ આપતા સમયે સ્પષ્ટતા કરી કે, 'ના ભાઈ, અમે ડેટ નથી કરી રહ્યા, આ બસ ઇન્ટરનેટ પોતાનું કામ કરી રહ્યું છે.'

શોમાં થયેલી મજાક અને ભાજપ નેતાની કડક ટીકા

'ઇન્ડિયાઝ ગોટ લેટેન્ટ સીઝન 2'ના તાજેતરના એપિસોડમાં શેરોન વર્મા, ઓરી અને અર્ચના પૂરણ સિંહ સાથે પેનલિસ્ટ તરીકે આવી હતી. આ દરમિયાન સમયે શેરોનના બિહારી મૂળની મજાક ઉડાવી હતી, જેનો વળતો જવાબ આપતા શેરોને પણ સમયના કાશ્મીરી મૂળ વિશે રમૂજ કરી હતી. આ બંને વચ્ચેની મજાક અને આઇ-કોન્ટેક્ટના વીડિયો સોશિયલ મીડિયા પર વાઇરલ થયા હતા, જેના કારણે તેમના ડેટિંગની અફવાઓએ જોર પકડ્યું હતું.

જોકે, આ મજાક-મસ્તી પર વિવાદ પણ થયો હતો. મહારાષ્ટ્રના ભાજપના ધારાસભ્ય રામ કદમે સમય રૈનાની કડક શબ્દોમાં ટીકા કરી હતી. તેમણે કહ્યું કે, 'સમાજમાં કેટલાક લોકો માત્ર પબ્લિસિટી મેળવવા અને પ્રખ્યાત થવા માટે જાણીજોઈને વિવાદિત નિવેદનો આપે છે. આપણે એ સમજવાની જરૂર છે કે સનાતન ધર્મના દેવતાઓ અને કાશ્મીરી પંડિતોને મજાકનો વિષય બનાવી શકાય નહીં. જાણીજોઈને લોકોની ભાવના દુભાવીને પછી માત્ર માફી માંગી લેવી યોગ્ય નથી. આ દરમિયાન તેમને દેશભરમાં જે મફત પબ્લિસિટી જોઈતી હોય છે તે મળી જાય છે.'

મેધા શંકર સાથે પણ જોડાઈ ચૂક્યું છે સમયનું નામ

શેરોન વર્મા એકમાત્ર એવી યુવતી નથી જેની સાથે સમયનું નામ જોડાયું હોય. અગાઉ '12th ફેલ' ફેમ બોલિવૂડ એક્ટ્રેસ મેધા શંકર સાથે પણ સમયના ડેટિંગની અફવાઓ ઉડી હતી. ડેટિંગની અફવાઓ વચ્ચે મેધા શંકર એક્ટર વરુણ ધવન સાથે શોના એક એપિસોડમાં પેનલિસ્ટ તરીકે આવી હતી. શો દરમિયાન સમયે મેધાને તેની 'સૌથી સારી મિત્ર' કહી હતી. એટલું જ નહીં, અન્ય મહેમાનોની સરખામણીમાં તે મેધાને રોસ્ટ કરવામાં પણ થોડો નરમ પડ્યો હતો, જેના કારણે વધુ અફવા ફેલાઈ હતી.

'ઇન્ડિયાઝ ગોટ લેટેન્ટ' અને વિવાદ

ગત વર્ષે ફેબ્રુઆરીમાં સમય રૈનાના શો 'ઇન્ડિયાઝ ગોટ લેટેન્ટ'ની પહેલી સીઝન ભારે વિવાદમાં સપડાઈ હતી. રણવીર અલાહાબાદિયાએ શોમાં પેરેન્ટ્સ અંગે કેટલીક ટિપ્પણીઓ કરી હતી, જેના કારણે મોટો હોબાળો થયો હતો. રણવીરે પાછળથી માફી માંગી હોવા છતાં, તેની અને સમય સહિત શો સામે FIR નોંધાઈ હતી. આ વિવાદ બાદ સમયે યુટ્યુબ પરથી શોના તમામ એપિસોડ હટાવી દીધા હતા.

આ વર્ષે સમયે સીઝન 2ની જાહેરાત કરી હતી. જોકે, કેટલાક દર્શકોનું માનવું છે કે નવી સીઝન પહેલી સીઝન જેટલી રિયલ નથી અને તેમાં ઘણું ફિલ્ટર વાપરવામાં આવ્યું છે. તેમ છતાં આ શો દર્શકોને ખૂબ આકર્ષી રહ્યો છે અને સફળતાના નવા શિખરો સર કરી રહ્યો છે. અહેવાલો મુજબ, આ નવી સીઝનનો એક એપિસોડ રિલીઝ થયાના માત્ર 24 કલાકમાં જ 4 કરોડ વ્યૂઝ પાર કરી ગયો હતો.