...અને હવે ગરબા પાસ માટે જેન-ઝીનું આંદોલન

• અગડમ્ બગડમ્-બાબા આદમ
• નવરાત્રિ આવે ત્યારે ખબર પડે છે કે દેશનો ખરો પ્રાણપ્રશ્ન તો ગરબાના પાસ મેળવવાનો છે

જેન-ઝીનો એક મોરચો નીકળ્યો છે અને તેઓ આંદોલન પર બેસવાના છે એવી વાત ફેલાતાં શહેરભરમાં દોડધામ મચી ગઈ.
સંશયાત્મા તરત જ સ્પોટ રિપોર્ટિંગ માટે મોરચામાં જોડાયેલા જેન-ઝી પાસે પહોંચ્યો અને તરત જ આંદોલનકારીઓ પર સવાલોનો મારો ચલાવ્યો. 'શું થયું? પાછું કોઈ પેપર ફૂટયું? ફૂટેલાં પેપર પર કેટલા લોકો પાસ થઈ ગયા? આ વખતે કોનું રાજીનામુ માગો છો?'
એક આંદોલનકારી સંશયાત્માને હડસેલો મારતાં કહે, 'આ વખતે પેપર નથી ફૂટયું એ જ તો ઈશ્યૂ છે. આ વખતે કોઈ પરીક્ષામાં પાસ-નાપાસની નહીં ગરબાના પાસની બબાલ છે. કાશ ફૂટેલાં પેપરની જેમ જ ગરબાના પાસ પણ ફૂટી ફૂટીને અમારા સુધી પહોંચી ગયા હોત.'
'હેં? ગરબાના પાસ? એ તે કોઈ પ્રાણપ્રશ્ન છે?' સંશયાત્મા પોતે જાણે ગરબે ઘૂમતો હોય એમ ચક્કર ખાઈ ગયો.
'મિસ્ટર વડીલ, નવરાત્રિ નજીક આવે છે ત્યારે અમને સમજાય છે કે ગરબાના પાસ મળી જાય એ જ ખરો પ્રાણ પ્રશ્ન છે. દેશમાં યુપીએસસી અને નીટનાં પેપરોનાં સેટિંગ કરતાં પણ ગરબાના પાસનું સેટિંગ વધારે અઘરું છે.' જેન-ઝીએ વાસ્તવદર્શન રજૂ કર્યું.
'તો તમારો વાંધો કોની સામે છે? આંદોલન કોની સામે છે? ગરબા આયોજકો સામે?' હજુ પણ સંશયાત્માનું ઘૂમવાનું બંધ ન હતું થયું.
હવે પેલો આંદોલનકારી ઉકળ્યો. 'અલ્યા ભાઈ, આમ બુદ્ધુ જેવા સવાલો ન કરો. અમારો વાંધો ગરબા આયોજકો સામે હોય તો પણ અત્યારે તો ગામેગામ ને ગલીએ ગલીએ ગરબા આયોજનો છે, અમારો વાંધો લઈને અમે કેટલા આયોજકો સુધી પહોંચીએ? એટલે અમે સરકાર સામે જ મોરચો કાઢ્યો છે. સરકાર પ્રાઈવેટ હોસ્પિટલો, પ્રાઈવેટ સ્કૂલો અને ખાનગી યુનિવર્સિટીઓ મેનેજ કરે છે, હવે તો સાહિત્ય અને ફિલ્મો પણ મેનેજ કરે છે, તો પછી ગરબાના પાસ પણ મેનેજ કરે. આ સરકાર તો આમ પણ ઉત્સવો અને ઉજવણીઓની સરકાર છે. ઘરે ઘરે મતદાર સ્લીપ પહોંચે છે તેમ બધા ગરબા આયોજકો પાસેથી પાસ ઉઘરાવી ઘરે ઘરે મોકલી આપે. બસ, આ જ અમારી ડિમાન્ડ છે. પાસ ન લાવી આપે એ સરકાર નાપાસ.'
સંશયાત્મા કહે, 'તમારી ડિમાન્ડ તો જોરદાર છે, પરંતુ એક લોચો છે. સરકાર પાસનું વિતરણ ચૂંટણી પંચને સોંપશે અને તે આ વિતરણ 'સર' પછીની મતદાર યાદીઓ પ્રમાણે કરશે તો કદાચ ગરબડ થશે. તમારા એજ ગુ્રપના લોકોને પાસ જ નહિ મળે અને સિક્સ્ટી પ્લસ જનરેશન જ પાસ લઈને ગરબા મેદાનો પર પહોંચી જશે. પછી તમારે ભાગે શેરી ગરબામાં જ ગરબે ઘૂમવાનું બાકી રહેશે. વિચારુ જુઓ.'
મોરચો તરત જ બરખાસ્ત થઈ ગયો.
આદમનું અડપલું
નવરાત્રિમાં સંબંધો, સંપર્કો અને વગની પરીક્ષામાં પાસ લાવી આપે એ જ પાસ!