IRDAI ના પ્રસ્તાવમાં એવું તો શું હતું કે વીમા કંપનીઓના સ્ટૉક 36% સુધી તૂટી ગયા, આજે પણ કડાકો

IRDAI Proposal and Stock market : વીમા રેગ્યુલેટરી એન્ડ ડેવલપમેન્ટ ઓથોરિટી ઓફ ઇન્ડિયા (IRDAI) ના એક નવા પ્રસ્તાવના અહેવાલો બહાર આવ્યા બાદ ગુરુવારે શેરબજારમાં વીમા કંપનીઓના શેરોમાં ભારે કડાકો જોવા મળ્યો છે. પોલિસી બજાર (PB Fintech) ના શેરોમાં 36 ટકા સુધીનો મોટો ઘટાડો નોંધાયો હતો, જ્યારે ટર્ટલમિન્ટના શેરમાં 20 ટકા અને HDFC Life તથા ICICI Prudential Life જેવા અગ્રણી શેરોમાં પણ તીવ્ર ઘટાડો 20 જોવા મળ્યો હતો. આજે પણ આ શેરો પર ભારે દબાણ જોવા મળી રહ્યું છે. નિયમનકારના આ પ્રસ્તાવથી વીમા કંપનીઓ અને ડિસ્ટ્રીબ્યુટર્સની આવક, નફો અને માર્જિન ઘટે તેવી શક્યતા હોવાથી રોકાણકારોમાં નિરાશા વ્યાપી છે.

IRDAI ના પોલિસી પેપરમાં શું છે ખાસ?

• કમિશન પર ફરી મર્યાદા મૂકવાની તૈયારી: IRDAI એ લાઈફ, હેલ્થ અને મોટર ઇન્શ્યોરન્સમાં પ્રોડક્ટ્સ અને ડિસ્ટ્રીબ્યુશન ચેનલના આધારે કમિશન લિમિટ ફરીથી લાગુ કરવાનો પ્રસ્તાવ મૂક્યો છે. ઉલ્લેખનીય છે કે વર્ષ 2023માં કમિશન પરની સેગમેન્ટ વાઈઝ મર્યાદા હટાવી લેવામાં આવી હતી.
• હેલ્થ અને ટર્મ ઇન્શ્યોરન્સમાં કમિશનમાં કાપ: નિષ્ણાતોના મતે, પ્રસ્તાવિત માળખામાં હેલ્થ અને ટર્મ ઇન્શ્યોરન્સના નવા બિઝનેસ પર મિલકતના કમિશનમાં નોંધપાત્ર ઘટાડો થઈ શકે છે. કેટલાક કિસ્સાઓમાં આ કાપ એક-તૃતીયાંશથી બે-તૃતીયાંશ સુધીનો હોઈ શકે છે.
• લાઈફ ઇન્શ્યોરન્સ કમિશનનું વિતરણ: હાલમાં પોલિસી વેચતી વખતે જ મોટા ભાગનું કમિશન આપી દેવામાં આવે છે. પ્રસ્તાવ મુજબ, આ કમિશનને પોલિસીના સમગ્ર સમયગાળા (Term) દરમિયાન તબક્કાવાર રીતે વહેંચવાની ભલામણ કરાઈ છે, જેથી ડિસ્ટ્રીબ્યુટર્સની શરૂઆતની કમાણી અને કંપનીઓની આવક પર સીધી અસર પડશે.
• સંચાલન ખર્ચ (EoM) ની મર્યાદા ઘટાડવી: IRDAI એ એક્સપેન્સિસ ઓફ મેનેજમેન્ટ (EoM) ને પણ તાર્કિક બનાવવાનો પ્રસ્તાવ મૂક્યો છે. જનરલ ઇન્શ્યોરન્સ માટે પાંચ વર્ષમાં EoM ની મર્યાદા GWP ના 30% થી ઘટાડીને ડોમેસ્ટિક GDPI ના 20% સુધી લાવવાનું સૂચન છે.
• લોન સાથે ફરજિયાત વીમા વેચાણ પર રોક: બેંકો અને NBFCs દ્વારા લોન આપતી વખતે ગ્રાહકોને વીમો લેવા માટે મજબૂર કરવા પર રોક લગાવવાનો પ્રસ્તાવ છે. આનાથી બેંકોની ઇન્શ્યોરન્સ ડિસ્ટ્રીબ્યુશન ફી ઇન્કમ પર નકારાત્મક અસર પડશે.
• ડાર્ક પેટર્ન અને ગેરમાર્ગે દોરતી ડિઝાઈન પર પ્રતિબંધ: કંપનીઓ એવી કોઈપણ ડિઝાઈન કે પ્રક્રિયાનો ઉપયોગ કરી શકશે નહીં જેનાથી ગ્રાહકો ભ્રમિત થાય કે કોઈ ચોક્કસ વિકલ્પ પસંદ કરવા મજબૂર બને.

સરકાર અને IRDAI શા માટે લાવ્યા આ પ્રસ્તાવ?
IRDAI ના આ કડક પગલાં પાછળના મુખ્ય કારણો નીચે મુજબ છે :

• વીમાના વેચાણમાં થતી 'મિસ-સેલિંગ' (ગેરમાર્ગે દોરીને વેચાણ કરવું) અટકાવવી.
• ગ્રાહકો માટે વીમાની પડતર કિંમત (ખર્ચ) ઓછી કરવી.
• ગ્રાહકને સ્પષ્ટ ખબર પડે કે તેનો પૈસો ક્યાં અને શા માટે જઈ રહ્યો છે (પારદર્શકતા).
• બેંકમાંથી લોન લેતી વખતે પરાણે વીમો પધરાવી દેવાની ફરિયાદો પર કાયમી રોક લગાવવી.

ઉલ્લેખનીય છે કે આ અંગેના સંકેતો જુલાઈ મહિનામાં જ સામે આવ્યા હતા, જ્યારે રોયટર્સના અહેવાલમાં જણાવવામાં આવ્યું હતું કે IRDAI કમિશન વ્યવસ્થામાં મોટો ફેરફાર કરવાની તૈયારી કરી રહ્યું છે. હવે આ પ્રસ્તાવ સામે આવતાં જ બજારમાં તેની વ્યાપક નકારાત્મક અસર જોવા મળી રહી છે.