બજાર ખુલતાં જ સેન્સેક્સમાં 736 અને નિફ્ટીમાં 227 પોઈન્ટનો ઉછાળો, સોના-ચાંદીમાં કડાકો

Stock Market News : ગઈકાલના ભારે ઘટાડા બાદ આજે ભારતીય શેરબજારમાં ફરી એકવાર તેજીનો માહોલ જોવા મળી રહ્યો છે. વૈશ્વિક બજારના સકારાત્મક સંકેતો અને સ્થાનિક ખરીદીને પગલે સેન્સેક્સ અને નિફ્ટીમાં નોંધપાત્ર ઉછાળો નોંધાયો છે. આજે અમેરિકા અને ઈરાન વચ્ચે પાકિસ્તાનમાં યુદ્ધને લઈને શાંતિ મંત્રણા શરૂ થઇ રહી છે જેના પગલે કોઈ સારા સંકેત મળી શકે તેવી આશા પણ છે. 

SENSEXમાં તેજી 

સેન્સેક્સ આજે 77,316.30 પર ટ્રેડ કરી રહ્યો છે, જે ગઈકાલના બંધ ભાવ (76,631.65) ની સરખામણીએ 705.12 (0.92%) પોઈન્ટનો ઉછાળો દર્શાવે છે. આજે બજાર 77,121.01 પર ખૂલ્યું હતું અને અત્યાર સુધીમાં 77,367.30 ની ઊંચી સપાટીએ પહોંચ્યું છે.

NIFTY 50 પણ ઉછાળો 

નિફ્ટી 23,987.50 પર પહોંચી ગઈ છે, જેમાં 212.40 (0.89%) પોઈન્ટનો વધારો જોવા મળ્યો છે. નિફ્ટી આજે 23,880.55 પર ખૂલીને 24,002.85 ની સપાટીને સ્પર્શી હતી.

કોમોડિટી માર્કેટની સ્થિતિ 

બજારમાં તેજી હોવા છતાં કિંમતી ધાતુઓના ભાવમાં આજે થોડો ઘટાડો જોવા મળ્યો છે:

સોનું (Gold): એમસીએક્સ પર સોનાનો ભાવ ₹1,52,695.00 પર ટ્રેડ થઈ રહ્યો છે, જે ₹747.00 (0.49%) નો ઘટાડો દર્શાવે છે.

ચાંદી (Silver): ચાંદીના ભાવમાં પણ ₹1701.00 (0.64%) નો ઘટાડો જોવા મળ્યો છે અને તે હાલ ₹2,42,204.00 પર છે.

શેરબજારમાં તેજીના મુખ્ય કારણો

યુએસ-ઈરાન સીઝફાયરની અસર: અમેરિકા અને ઈરાન વચ્ચે બે સપ્તાહના યુદ્ધવિરામ અને હોર્મુઝ સ્ટ્રેટ મર્યાદિત રીતે ખૂલવાના સમાચારને કારણે વૈશ્વિક બજારોમાં રાહત જોવા મળી છે, જેની અસર ભારતીય બજાર પર પણ પડી છે. જોકે આજે અમેરિકા અને ઈરાન વચ્ચે ઈસ્લામાબાદમાં શાંતિ મંત્રણા શરૂ થવાની આશા છે જેને લઈને બજારમાં આશાવાદ છે. 

નીચલા સ્તરે ખરીદી: ગઈકાલે સેન્સેક્સમાં આશરે 853 પોઈન્ટનો કડાકો બોલાયો હતો. આ ઘટાડા બાદ બ્લુ-ચિપ શેરો આકર્ષક ભાવે ઉપલબ્ધ હોવાથી રોકાણકારોએ નીચલા સ્તરેથી વ્યાપક ખરીદી કરી છે.

આઈટી અને બેંકિંગ શેરોમાં ઉછાળો: માર્કેટ હેવીવેઇટ ગણાતા આઈટી અને બેંકિંગ ક્ષેત્રના શેરોમાં તેજીને કારણે ઇન્ડેક્સને મોટો સપોર્ટ મળ્યો છે.